Abanyarwanda 23 muri ba rwiyemezamirimo 1000 bazahabwa $10000 n’umuherwe Tony Elumelu

Yanditswe na Mukaneza M.Ange
Kuya 23 Werurwe 2017 saa 09:35
Yasuwe :
1 0

Ba rwiyemezamirimo b’abanyarwanda 23, baje ku rutonde rw’abantu 1000 bagiye guhabwa inkunga n’Ikigega cyashinzwe n’Umuherwe Tony Elumeru ukomoka muri Nigeria.

Tony Onyemaechi Elumelu w’imyaka 54 ni umwe mu bafite agatubutse muri Afurika, umutungo we ubarirwa muri miliyari imwe y’amadorali. Mu 2015 yari ku mwanya wa 31 mu banyafurika 50 bakize kurusha abandi.

Binyuze mu muryango Tony Elumelu Foundation, TEF, yashinze mu 2010, Uyu muherwe wigeze kuza ku rutonde rw’abantu 20 bavuga rikijyana muri Afurika, kuva mu 2014 atera inkunga ba rwiyemezamirimo baturutse mu bihugu bitandukanye.

Kuri iyi nshuro abagera ku bihumbi 93 baturuka mu bihugu 55 nibo bari biyandikishije, hakaba haratoranyijwemo 1000 barimo 23 bakomoka mu Rwanda.

Nyuma yo gutoranywa bazamara amezi icyenda bakabwa ubumenyi mu kwihangira imirimo, bakazabukoresha banonosora imishinga yabo, nyuma bahabwe inkunga y’ibihumbi 10 by’amadorali azabafasha guteza imbere ibikorwa byabo.

Imishinga irimo Ubuhinzi, Ikoranabuhanga, Ingufu z’amashanyarazi, Uburezi n’ubwikorezi niyo igaragara kuri uru rutonde.

Abanyarwanda baza kuri uru rutonde

Agathe Dusabe (ufite umushinga urebana n’iby’ingufu), Aime Nshizirunggu (ubuhinzi), Andrew Mugabe (ubuhinzi), Batamuriza Esther (ubuhinzi), Blandine Umuziranenge (Ikoranabuhanga), Dominique Uwase Alonga (uburezi), Igiraneza Alice (Gutunganya imyanda), Innocent Mutabazi (ubuhinzi), Josiane Irakiza (Ikoranabuhanga) na Justin Niyigena (ubuhinzi).

Hari kandi Mohamed Muvunnyi (ubuhinzi), Murekatete Delphine (uburezi), Nehemie Yesashimwe (Inganda ziciriritse), Noel Nizeyimana (ubuhinzi), Nyambizi Etienne (uburezi), Pacifique Nshimiyimana (ubuhinzi), Salwa Uwabasindi (ubuhinzi), Theophile Hategekimana (ubwikorezi), Thierry Mutwewingabo (ikoranabuhanga), Ujeneza Mbabazi Fabrise (uburezi Uwimbabazi Sifa (uburezi), Wellars Ndayambaje (inganda ziciriritse) na Yvette Mariza Mukamuhoza (ingufu).

Umuziranenge Blandine ugaragara kuri uru rutonde, afite umushinga wo gukora porogaramu ya telefoni izajya ifasha abagore batwite kumenya ibijyanye n’igihembwe bagezemo, n’ibijyanye no kwipimisha; izajya ifasha kandi abantu kumenya ahari abaganga bavura indwara runaka kandi babegereye, igihe ugize ikibazo kihutirwa kandi uzajya uhamagara uhabwe ubufasha.

Gahunda Tony Elumelu yo gufasha ba rwiyemezamirimo bakiri bato muri Afurika yashowemo miliyoni 100 z’amadorali, izamara imyaka 10.

Nubwo ari imwe muri gahunda zikomeye zifasha ba rwiyemezamirimo, Elumelu ufite ibikorwa bitandukanye birimo banki ifite amashami mu bihugu bisaga 20, n’ubucuruzi bw’ibikomoka kuri peteroli, avuga ko inkunga batanga idahagije.

Ati “Hari ba rwiyemezamirimo ibihumbi 92 batabashije gutsinda. Ruriya rubyiruko rw’abahungu n’abakobwa bagaragaje gukunda ibyo bakora no guhanga udushya mu busabe bwabo. Ntabwo dukwiye kugabanya umuvuduko tutarabafasha bose kugera ku nzozi zabo. Ndahamagarira abandi ba Nyafurika n’inshuti za Afurika kudufasha gukora ibiruseho.”

Kuva iyi gahunda yatangira abagera kuri 2000 nibo bamaze gufashwa. Mu 2015 abanyarwanda 15 bagaragaye ku rutonde rw’abagomba guterwa inkunga barimo Muhire Louis Antoine washinze Ikigo Mergims, gifasha abantu baba hanze kwishyurira ibintu bitandukanye, ababo bari muri Afurika.

Ubushakashatsi bwakozwe na TEF ku bimaze kugerwaho kuva iyi gahunda yatangira, bwagaragaje ko mu myaka itatu ishize hahanzwe imirimo isaga 1 297.

Tony Onyemaechi Elumelu w’imyaka 54 ni umwe mu bafite agatubutse muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza