Abanyarwanda batanu mu bagomba gutoranywamo 100 bakomoka muri Afurika bavuga rikumvikana

Yanditswe na Mukaneza M.Ange
Kuya 14 Gicurasi 2018 saa 08:55
Yasuwe :
1 0

Abanyarwanda batanu barimo na Minisitiri w’Umuco na Siporo, Uwacu Julienne, bashyizwe ku rutonde rw’abantu bari munsi y’imyaka 40, bazatoranywamo 100 bafite inkomoko muri Afurika bavuga rikumvikana.

Uru rutonde ruzwi nka MIPAD (Most Influential People of African Descent), rushyirwaho abantu bagaragara mu byiciro bine birimo politiki n’imiyoborere, ubucuruzi no kwihangira imirimo, itangazamakuru n’umuco ndetse n’iyobokamana n’ibikorwa by’ubugiraneza. Hatoranywa 100 baba muri Afurika, n’abandi bangana nabo baba muri diaspora.

Ni gikorwa cyatangijwe mu rwego rwo kubaka umuryango mugari uzahuza imbaraga mu gushyigikira ishyirwamubikorwa rya gahunda ya 2015-2024 yo kuzirikana abakomoka muri Afurika (International Decade for People of African Descent), yashyizweho n’umwanzuro wa 68/237 w’Inama Rusange y’Umuryango w’Abibumbye.

Abategura uru rutonde bashyira hanze abari muri buri cyiciro, muri bibiri bimaze gusohoka kugeza ubu hagaragaramo Minisitiri Uwacu Julienne na Uwizeye Judith, Minisitiri muri Perezidansi baza muri politiki n’imiyoborere, aho bahatanye n’abandi 45.

Ni mu gihe icyiciro cy’ubucuruzi no kwihangira imirimo kirimo abantu 85 kigaragaramo Abanyarwanda batatu barimo Umuyobozi Mukuru wa Rwandair, Yvonne Manzi Makolo; Umuyobozi Mukuru wa Banki ya Kigali, Dr Diane Karusisi na Patrick Buchana Nsenga washinze ikigo AC Group kizwi cyane mu gukora amakarita yifashishwa kwishyura amafaranga y’urugendo mu modoka rusange.

Mu bigenderwaho mu gutoranya abantu bashyirwa muri buri cyiciro harimo umwanya w’ubuyobozi, uko ibyo ukora bizana impinduka, ndetse n’ibihembo waba warahawe ku bari muri politiki n’imiyoborere.

Mu bucuruzi no kwihangira imirimo nabwo harebwa impinduka zizanwa n’ibyo ukora, umutungo ufite, inyungu yinjizwa n’ikigo uyobora ndetse n’umutungo mbumbe. Ku bashyirwa mu itangazamakuru n’umuco harebwa uburyo ukurikirwa, uko ukoresha imbuga nkoranyambaga, ndetse n’ibyo waba waragezeho cyangwa ibihembo wahawe.

Mu Iyobokamana n’ibikorwa by’ubugiraneza hatoranywa abantu hagendewe ku mpinduka zizanwa n’imirimo yabo, abayoboke bafite ndetse n’ibihembo cyangwa ishimwe baba barigeze guhabwa. Buri wese aba afite uburenganzira bwo gutanga umukandida.

Abazaba batoranyijwe bazashimirwa mu birori biteganyijwe kuva tariki ya 28 Nzeri kugeza ku wa 3 Ukwakira 2018 mu Mujyi wa New York muri Leta Zunze Ubumwe za Amerika, bizabanzirizwa n’umuhango wo gufungura Inama Rusange ya 73 y’Umuryango w’Abibumbye.

Minisitiri w'Umuco na Siporo, Uwacu Julienne, ni umwe mu bari kuri uru rutonde
Uwizeye Judith, Minisitiri muri Perezidansi ari mu baza mu cyiciro cya politiki n’imiyoborere
Umuyobozi Mukuru wa Rwandair, Yvonne Manzi Makolo
Umuyobozi Mukuru wa Banki ya Kigali, Dr Diane Karusisi
Patrick Buchana Nsenga washinze ikigo AC Group kizwi cyane mu gukora amakarita yifashishwa kwishyura amafaranga y’urugendo mu modoka rusange
Abantu 85 bagaragara mu cyiciro cy'abari mu rwego rw'ubucuruzi no kwihangira imirimo
Abari mu cyiciro cya politiki n'imiyoborere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza