Amwe mu magambo akomeye ya PLO Lumumba, intyoza muri Afurika mu mbwirwaruhame

Yanditswe na Mukaneza M.Ange
Kuya 26 Kamena 2018 saa 09:28
Yasuwe :
1 0

PLO Lumumba ubusanzwe witwa Patrick Loch Otieno Lumumba, ni umunyamategeko w’Umunya-Kenya wayoboye Komisiyo ishinzwe kurwanya ruswa muri iki gihugu, ariko akaba yaramenyekanye kubera imbwirwaruhame zikomeye agenda avuga.

Lumumba ufite impamyabumenyi y’ikirenga mu bijyanye n’amategeko yakuye muri Kaminuza ya Ghent mu Bubiligi, yanayoboye Ishuri ryigisha amategeko muri Kenya. Ndetse ni umwe mu bakunda guhagararira leta igihe ifite imanza igomba kuburana.

Uyu mugabo w’imyaka 55 akunda ndetse agafata nk’ikitegererezo Patrice Lumumba waharaniye ubwigenge bwa Repubulika Iharanira Demokarasi ya Congo, ndetse na Thomas Sankara wa Burkina Faso.

Izina PLO Lumumba ryamenyekanye cyane kubera imbwirwaruhame yagiye avuga mu bihe bitandukanye, aho yagiye akoresha amagambo akomeye mu kugaruka ku mpamvu Afurika idatera imbere, ndetse no kubitagenda neza muri Kenya.

Anazwiho ariko gukoresha Icyongereza kidapfa kumvwa n’uwari wese, ndetse nawe ubwe akaba yarabihamije ubwo yatsindwaga urubanza Komisiyo y’amatora yari yarezwemo na Raila Odinga asaba ko amatora asubirwamo mu 2017.

Icyo gihe yahamije ko yatsinzwe kubera Icyongereza gihambaye yakoresheje, ndetse ahamya ko iyo Shakespeare aza kuba ari umucamanza, nta rubanza na rumwe yari kuzajya atsindwa kuko we yabasha kumva ibyo avuga.

Twifashishije imbuga zitandukanye zirimo Goodreads, twagerageje kubakusanyiriza amwe mu magambo yagiye avugwa na Lumumba ku bintu bitandukanye.

-  Ibyago bya Afurika n’uko Abanyafurika barajwe ishinga no gutagatifuza ibisambo, ndetse no kwangiza imitima y’abatagatifu bayo

-  Tuba mu gihugu aho abakobwa bacu bageze mu bwangavu batabasha kubona impapuro z’isuku (pads), ariko nyamara abagabo n’abagore bari mu myanya y’ubuyobozi bafite ipads batazi n’uko zikoreshwa.

-  Umubu umaze kukuruma ntuwuhiga ukoresheje inyundo

-  Nemera ko iterambere rya Afurika rimaze kugera ku rwego aho gukomeza kujya imbere ari inzira y’inzitane, gusubira inyuma bikaba ubugwari n’aho kuguma aho tugeze bikaba nko kwiyahura, ariko tugomba gushikama kuko abashaka kugera ku ntsinzi badacika intege n’abacitse intege badatsinda na rimwe.

-  Iyo nitegereje Afurika nibaza ibibazo byinshi, akenshi nibajije uko byagenda Dr Kwame Nkrumah na Patrice Lumumba baramutse bazutse bakibonera ibiri kuba, akenshi nibajije uko byamera Nelson Madiba Mandela aramutse azutse akibonera ibiri kuba; kubera ko icyo babona ni Afurika aho Repubulika Iharanira Demokarasi ya Congo idatuje, hari intambara iriyo kandi nyamara ntibiri ku rupapuro rwa mbere mu binyamakuru byacu kuko nta bubasha dufite ku binyamakuru byacu n’itangazamakuru.

-  Turi mu gihugu gikennye atari uko izuba rirasira Iburengerezuba, rikarengera Iburasirazuba, ahubwo ni uko twahisemo gusubira inyuma, tugenda ku muvuduko uri hejuru nk’abayobye. Ibi tugomba kubihindura, dukura amaboko mu mifuka tugatangira guharanira iterambere ry’igihugu cyacu.

-  Kuba mu bihugu bikennye ni ibintu biri mu mitekerereze, kandi igihe cyose tutarahindura imyumvire nk’Abanyafurika, niharamuka habayeho isi ya kane, iya gatanu ndetse n’iya gatandatu nayo tuzaba tuyirimo.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza