Ibanga abageze ku ntsinzi mu buzima bahuriyeho

Yanditswe na Nshimiyimana Gonzalde
Kuya 25 Ukwakira 2017 saa 11:26
Yasuwe :
1 0

Burya uko twitwara buri munsi n’ibyo dukora byamaze kwinjira mu buzima bikaba akamenyero, akenshi ni byo usanga bigenga n’uburyo twinjiza amafaranga mu mifuka yacu.

Bamwe mu bageze ku ntsinzi mu buzima buri wese yifuza kumera nkabo agakora hasi hejuru anyura inzira zose nyamara ugasanga aho twerekeza imbaraga nyinshi siho hari ipfundo ry’ibyo dukeneye muri icyo cyerekezo.

Ibi bituma benshi bibaza umuhora abantu bageze ku ntsinzi banyuzemo ngo na we uwushoremo ibirenge.

Abantu baca mu nzira zitandukanye kugira ngo bagere aho biyemeje, ariko ihuriro rimwe rukumbi abantu bageze ku ntsinzi bahuriraho ni uguhaha ubumenyi mu mpande zose haba mu biganiro n’abandi ndetse no gusoma ibitabo bihishe ubuhanga bashiritse ubute.

Amateka y’abanyapolitiki bakomeye, abashoramari n’abafite imitungo myinshi irimo n’inganda zizwi nko muri Leta Zunze Ubumwe za Amerika, agaragaza inzira banyuzemo iganisha ku bukire, ko ishingiye ku cyita rusange cyo gusoma ibitabo no gucukumburamo ubumenyi bwisumbuye.

Dufatiye urugero kuri Warren Buffett w’imyaka 87 uyobora Uruganda rwa Berkshire Hathaway ruherereye mu Mujyi wa Omaha muri Leta ya Nebraska na Charles Thomas Munger w’imyaka 93, Umwungirije, ubuzima banyuzemo bushimangira uko iyi migirire itanga umusaruro.

Warren Edward Buffett yageze kuri byinshi abikesha ubwenge yahashye mu gusoma ibitabo

Aba bagabo bakuriye mu buzima bugoye bakora akazi ko guca inshuro mu isoko riri mu Mujyi wa Omaha muri Nebraska ngo babone amaramuko.

Mu bwana bwabo batangiye bacuruza utuntu tworoheje binjiza amadorali abiri ku munsi mu gihe ubu ari abashoramari bakomeye muri Amerika babona arenga miliyari 20 z’amadorali ya Amerika ku mwaka.

Charlie Munger yahaye inama abanyeshuri b’imwe muri Kaminuza yabahishuriye ibanga ryatumye agera ku ntsinzi aho abisanisha no kurushaho guhaha ubumenyi mu buryo buhoraho.

Yagize ati “ Mu buzima nkunda kubona abantu badafite ubumenyi buhambaye ariko biga umunsi ku wundi. Bajya kuryama hari icyo biyunguye ku byo bari bazi.”

Yatanze urugero rw’uburyo mu myaka yo hambere Umuherwe Buffett yasomaga amapaji ari hagati ya 600 n’igihumbi ku munsi ndetse 80% by’umunsi we abimara asoma ibitabo.

Yagize ati “Mukwiye gusoma nibura amapaji 500 ku munsi. Ndababwiza ukuri yuko imvano y’ubwenge iri mu gusoma ibitabo. Mwese mufite ubushobozi bwo kubikora ariko siko mwabikora. Aho waba uri hose mu buzima bwawe, ugomba gukomeza kwiga kandi uzagera ku ntsinzi.”

Usibye aba bagabo, Umuherwe w’Umunyamerika washinze uruganda rwa Microsoft, Bill Gates, uri ku isonga ry’abaherwe ba mbere ku Isi, ni umwe mu bagaragaza inyota yo gusoma cyane.

Bill Gates asoma ibitabo bigera kuri 50 ku mwaka

Uyu mugabo w’imyaka 61 ufite umutungo ubarirwa muri miliyari 89.5 z’amadorali ya Amerika, asoma ibitabo 50 ku mwaka byiganjemo ibirimo iby’amateka, ubukungu n’iby’imfashanyigisho n’izindi nkuru zakangura intekerezo z’umuntu mu nzira y’iterambere.

Umwanditsi w’Umunyamerika, William Foege, wakoze nk’umujyanama mu Muryango wa Bill and Melinda Gates, kuva mu 1999, yahaye Gates urutonde rw’ibitabo 81 bigaruka kuri raporo z’ibibazo by’ubuzima biri ku isi.

Bill Gates yagize ati “Ibi bitabo byamfunguriye ubuzima bushya. Byatumye ngira ubushake bwo guhangana n’ubukene no kurwanya indwara z’ibyorezo.”

Ibi niko bimeze kuri Elon Musk, Umuherwe uyobora SpaceX, wize uburyo bwo kubaka ibisasu bya ‘rockets’ no gushaka ubundi bumenyi binyuze mu gusoma ibitabo. Uyu mugabo w’imyaka 46, ufite umutungo ubarirwa muri miliyari 20.4 y’amadolari ya Amerika nk’uko Forbes Magazine yabitangaje akunda gusoma ibitabo bya siyansi byatumye amenyekana ku isi.

Mark Zuckerberg uyobora Facebook na we mu 2015 yasabye isi yose kugira umuco wo gusoma nibura igitabo kimwe mu byumweru bibiri.

Umuco wo gusoma ni ingenzi, nubwo abantu benshi bibabera umutwaro, gusa bisaba kubiha umwanya uhagije bikaba akarango kamwe mu buzima bwawe.

Elon Reeve Musk w'imyaka 46 uyobora SpaceX
Mark Zuckerberg amara igihe kirekire asoma ibitabo

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza