Ubuhamya bw’umwangavu watotejwe bikamuviramo kwandura Sida, akanayitera umwana we

Yanditswe na Evariste Nsengimana
Kuya 7 Ukuboza 2017 saa 06:01
Yasuwe :
0 0

Nta bushakashatsi burakorwa bugaragaza umubare w’abantu banduye Virusi itera Sida biturutse ku ihohoterwa, gusa hari abagaragaza ko barikorewe bagashorwa mu busambanyi bakayanduriramo.

Imibare yakusanyijwe mu 2015 n’Ikigo cy’Ibarurishamibare (NISR) yerekanye ko ubwandu bushya mu Rwanda bumaze imyaka isaga 10 kuri 3%, ab’igitsina gore bari hejuru kuri 3,6% naho abagabo kuri 2,2%. Inagaragaza ko Abanyarwanda 22% bakorerwa ihohoterwa rishingiye ku gitsina, rishobora kuganisha ku bwandu bw’agakoko gatera Sida, naho 45,8% by’abantu bakora uburaya, bafite Virusi itera Sida.

Umukobwa w’imyaka 23 utuye mu Karere ka Nyarugenge, avuga ko yakorewe ihohoterwa n’umuryango we bikamuviramo kujya mu buraya yanduriyemo Virusi itera Sida, ingaruka zikanagera ku mwana yabyaye.

Ubu buhamya uyu mukobwa wavukiye mu Karere ka Kamonyi, yabutangiye mu nama Urugaga Nyarwanda rw’ababana na Virusi itera Sida rwagiranye na Polisi, Minisiteri y’Uburinganire n’Iterambere ry’Umuryango, Ikigo cy’Igihugu cyita ku Buzima n’izindi nzego, ku wa Gatatu, igamije kugaragaza uko ihohoterwa rishingiye ku gitsina rigira uruhare mu gukwirakwiza Virusi itera Sida.

Uyu mukobwa avuga ko nyuma y’aho ababyeyi be bapfuye umwe mu 1994 undi mu 1995, yaje gufashwa na Croix Rouge, ariko nyirarume wasigaye amurera, akajya yirira imfashanyo zose imugenera.

Uyu mukobwa uvugana ubuhamya bwe agahinda, icyo gihe yari ageze mu mwaka wa Gatanu w’amashuri abanza, yageragezaga kumubaza impamvu imfashanyo yose ahawe ayigurishiriza, undi akamubwira ko na we amutunze, ibyo arya atabyishyura.

Yagize ati “Marume naramubazaga akansubiza ati ‘ibyo urya uba wabyishyuye, nanjye nkamubwira ko ababyeyi banjye basize iminani igomba kuturera. Ubwo akajya antoteza, hari n’igihe yazaga yanyoye inzoga, ibiryo narindi kurya akabikubita umugeri.”

Uyu mukobwa wari ufite musaza we wabaga i Kigali, yaje kwiba nyirarume amafaranga 2000Frw, aza kumureba ahitwa mu Cyahafi, ahageze asanga yarimutse, afata icyemezo cyo gushaka akazi ko mu rugo.

Aka kazi ntiyakagiriyemo amahirwe kuko nyirabuja yamutotezaga nubwo Shebuja we yamukundaga, byaje no gutuma ahava atangira uburaya.

Yagize Ati “Nahise ntangira uburaya ariko nahise nanduriramo Virusi itera Sida. Nagiye kwipimisha, bambwira ko badapima umuntu udafite umugabo, mbabwira ko ndi indaya ntamugira.”

Uku gusiragizwa kwa muganga bamutuma umugabo cyangwa icyangombwa kigaragaza ko ari ingaragu, byaje kumuviramo kudakurikiranwa neza bituma ku myaka 18 yari afite, abyara umwana wanduye Virusi itera Sida.

Uyu mwangavu avuga ko yakomeje kugirwa inama n’abaganga n’umwana we batangira gufata imiti igabanya ubukana, ariko agakomeza n’umwuga w’uburaya.

Yatanze ubuhamya bw'uburyo yatotejwe bikamuviramo kwandura Sida, akanayitera umwana we

Yasabaga abagabo gukoresha agakingirizo bakanga

Uyu mukobwa ukiri muto umurebeye ku maso, avuga ko yakomeje uburaya, akajya abwira abo baryamanaga ko afite Virusi itera Sida ariko bakanga kubyumva, rimwe na rimwe uwanze gukoresha agakingirizo akamureka yanga kuburara.

Yagize ati “Hari uwo nabwiraga ko mfite Virusi itera Sida, namusaba gukoresha agakingirizo akabyanga. Nareba ukuntu maze iminsi itatu, njye n’umwana ntacyo tubona, kandi imiti igabanya ubukana, ntiwayinywa utariye, nkamwemerera, tugakoreraho kugira ngo ndamuke.”

Uyu mukobwa avuga ko nta cyiza cyo mu buraya, ko hari igihe abagabo bararaga bamukubitira mu buriri n’abaturanyi bose bakajya bamwita umukobwa w’indaya.

Avuga ko abonye akazi akora yareka uburaya. Ati “Kugeza ubu, uburaya burandambiye. Mbonye umuntu untera inkunga, akanshakira umushinga nakora, nagenda nkawiga. Niyo nabona amafaranga yanshoboza gucuruza ibintu biciciritse nabikora kuko umwuga w’uburaya nta keza kawo, uwo muhuye wese akuvumira ku gahera ngo dore ya ndaya.”

Akomeza asaba abayobozi kurinda abana b’abakobwa ihohoterwa ribakorerwa kuko akenshi ribashora mu ngeso mbi.

Ku munsi mpuzamahanga wo kurwanya Sida uyu mwaka, u Rwanda rwahisemo insanganyamatsiko ishishikariza abantu kwipimisha ubwandu bwa Virusi yayo no gufata neza imiti igabanya ubukana ku wanduye igira iti “Twipimishe Sida, k’uyifite, gutangira no kuguma ku miti ni ubuzima burambye.”

U Rwanda kandi ruri mu bukangurambaga bugamije kurwanya ihohotera rishingiye ku gitsina, aho rwihaye insanganyamatsiko igira iti “Rwanya ihohotera rikorerwa abana b’abakobwa n’abagore, wirihishira.”

[email protected]


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza