Ubuzima bwihariye bw’abatwara amakamyo azwi nka ‘Rukururana’

Yanditswe na David Eugène Marshall
Kuya 20 Gicurasi 2018 saa 01:29
Yasuwe :
0 0

Si rimwe si kabiri abantu bumva indirimbo nka ‘Taxi moto Tugende’ ya Masabo Yuvenali Nyangezi n’izindi zaririmbwe n’abahanzi b’abahanga nka Amadou Balaké w’umunya-Côte d’Ivoire wagize ati ‘Taximen d’Abidjan’ mu gushaka kuvuga ku buzima bwihariye bw’abahuriye ku mwuga runaka.

Kuri iyi nshuro, IGIHE yavuye imuzi ibyihariye ku bagabo bahorana Pasiporo ku mufuka atari abadipolomate. Iminsi yabo amanywa n’ijoro bayimara mu mihanda mu ngendo ndende zambukiranya imipaka bavana cyangwa bajyana ibicuruzwa mu bihugu bitandukanye.

Icyitwa ifaranga ribahora ku mufuka, atari uko ari abakire karundura, ku bwabo aho bageze bahita mu rugo.

Ubasanga batetse, udusafuriya ku mbabura, mu nsi y’amakamyo yabo ni ho barira, niho bambariza Imana mu gihe cy’isengesho, niho babika ibikoresho byose bakenera, ariko ikigeretse kuri ibyo muri ayo makamyo ni naho baryama iyo bubiriyeho, yewe usanga baranamanitsemo inzitiramubu! Kuri bo, ikamyo ni nk’urugo rwa kabiri batemberena.

Kubyara abana aho bageze ni ukubaka imijyi

Bamwe muri bo bajya bacikwa ‘bakubaka imijyi aho bagenda iyo hose’. Bo babyita kugenda barema ibirindiro n’ibyicaro bikuru, mbese nk’abubaka imijyi.

Gusa buri wese muganiriye muri bo, akwereka ko kubaka imijyi cyangwa gushinga ingo aho bageze hose bitakigezweho, kandi ko bitajyanye n’igihe Isi igezemo, cyane ko muri uyu mwuga usangamo n’abakiri bato, bakubwira ko bashishikajwe n’iterambere ry’ejo hazaza.

Mugenzi Yusuph Husseni Kabale, ni umugabo ufite umugore n’abana batanu i Dar-es-Salaam, ndetse anarambye muri uyu mwuga wo gutwara amakamyo.

Ati “Urabona ikinyejana turimo ibintu byarahindutse, bitandukanye n’uko byahoze, mu bihe byashize abatwara amakamyo bavugwagaho ibyo kugira amahabara aho bagenda hose twe twita ‘kubaka imijyi’, nyamara ntitwirengagize ko n’iposho ba ‘Boss’ baduhaga ubu yagabanutse, hamwe ibyo ubyishinze ntacyo wageraho.

Yongeyeho ati “Ikindi kandi, imodoka ubwayo ni urugo ukwarwo, bisaba kurya, bisaba kunywa, kuryama n’ibindi, hamwe utakongeraho urundi rwa gatatu. Ese ubundi ubwo bushobozi twabukura he?”

N’ubwo ingano y’impamba y’urugendo bahabwa [Pocket Money ] itandukana bitewe n’ikompanyi baba bakorera, abavuganye na IGIHE bagaragaje ko batajya munsi y’amadolari 400 ya Amerika. Aya niyo bakuramo ibyo bakeneye byose mu rugendo rushobora kumara n’icyumweru mu nzira, bakanasaguraho ayo gushyira imiryango yabo yunganira umushahara baba basanzwe bahabwa.

Ismael Rachid Lijonjo umusore uri mu kigero cy’imyaka 18, abajijwe icyamuteye kwinjira muri uyu mwuga akiri muto yagize ati “Nabyirutse nkunda ikamyo, nabona abagabo bahora bacigatiye ibyuma biyobora imodoka nkumva ngomba kuba umushoferi w’amakamyo manini ubuzima bwanjye bwose, cyane ko nta shuri ryo gukora uyu mwuga wabona risumba kubanza kugendana n’abayatwara.”

Serivisi za gasutamo zihuse mu Rwanda, isoko y’ubwizigame ku mafaranga y’urugendo bagenerwa

Yusuph Husseni Kabale avuga ko ubusanzwe bajya bahura n’ingorane amafaranga y’impamba bahawe akabashiriraho bitewe n’uburyo batindijwe mu nzira, nyamara ngo iyo bageze mu Rwanda bataha ayo babahaye atarashira.

Ati “Nubwo mu mwuga wacu duhura n’ingorane zitandukanye, harimo impanuka, kumara amafaranga duhabwa yo kudufasha mu rugendo hakiri kare, kimwe mu bintu bitangaje njya mbona mu Rwanda kandi cyiza nk’igisubizo ku ngorane zacu, ni umwete udasanzwe abatanga serivisi za gasutamo bakorana.”

Yongeyeho ati “Bituma tubasha kwizigama kuko niba umukire ampaye amafaranga azamaza icyumweru, mu Rwanda nkahamara umunsi umwe undi nkataha, bituma amwe nari kuzakoresha mu rugendo nsaguraho ayo kwiteza imbere no gufasha umuryango. Umushoferi babwiye kuza mu Rwanda ahita amwenyura kubera inyungu abibonamo.”

Undi witwa Bakhressa Bakhar Katema amaze imyaka 40 mu mwuga wo gutwara amakamyo manini. Yatangaje ko kuva yatangira aka kazi nta buyobozi bwiza arabona nk’ubwa Perezida Kagame.

Mzee Katema agaragaza itandukaniro hagati y’ibihe bya kera n’uko ibintu bimeze ubu mu Rwanda, aho ngo mu ngendo bakoraga kera bahohoterwaga n’abajandarume n’abasirikari bahozeho mu Rwanda, ibintu bitakibaho ubu.

Ati “Iyo ikamyo yagonganaga n’indi modoka yo mu gihugu imbere, uko byagenda kose yabwirwaga ko ari we wayendereje, hagahanwa imodoka y’inyamahanga, indi bakayireka. Ariko ubu mu Rwanda ntibishoboka, igisabwa ni ukwigengesera amategeko no kuyakurikiza, nta kindi, Paul Kagame yarakoze, turamukunda.”

Ntibemeranya n’ababatera urubwa, babashinja ubushurashuzi

Kimwe mu bintu bibabaza aba bashoferi, ngo ni imyumvire mibi y’ababashinja guca inyuma abagore babo. Ntibatinya no kwemeza ko impamvu imwe ituma utwara ikamyo aramba muri uwo mwuga, harimo ‘kugendera kure umuvumo waturuka kubo aba yasize inyuma’ ngo kuko ikamyo ikenera ubuyobozi butuje cyane, bukoresha ubwenge n’amahoro yo mu bitekerezo.

Yaba Yusuph cyangwa mugenzi we Bakhressa Bakhar, bahuriza ku kuba n’ubwo imibiri yabo iba ikandagiye umuriro na feri z’amakamyo batwara, ariko ngo ‘imitima iba yibereye mu ngo zabo’ ku buryo nta mwanya wo gutekereza ubushurashuzi baba bafite.

Yusuph ati “Ni inshingano zitoroshye zisaba ko umuryango ukuba hafi, nawe kandi ntutakaze inshingano zo kuba uri umutware w’urugo, ukamenya uko abana bameze, ugahamagara mukavugana, niba bagiye ku masomo, niba bitaweho uko bikwiye n’ibindi.”

Barasaba ikurikiranwa ry’ikibazo cy’abajura mu ishyamba rya Musha i Rwamagana

Ikibazo cy’abagizi ba nabi, bakata utwuma tuba ku makamyo, twemeza ko kontineri itapakururiwe mu nzira bo bita dukatirwa ku gaterera n’umuteremuko wa Musha mu Karere ka Rwamagana, ngo kiri muri bimwe mu bibagusha mu gihombo.

Bakressa ati “Duhura n’ikibazo ku gateremuko kari mu ishyamba urenze uruganda rukora ibyuma, ugana i Kigali, ahari abagerageza gusahura za kontineri, gusa ntawe bariba, ariko baca utwuma tuzifunga, ubwo kandi turirwariza mu kwishyura amadolari 2000 y’amande biratubangamiye”.

Umuyobozi w’Akarere ka Rwamagana, Mbonyumuvunyi Rajab, yavuze ko aho hantu hashyirwa umutekano uhagije ku buryo abo bajura bavugwa batabona aho bamenera.

Nubwo aba bashoferi b’imodoka zizwi nka ‘Rukururana’ batabura kugira ibibazo bahura na byo mu nzira bagendamo bemeza ko u Rwanda ari cyo gihugu gifite umutekano bagendamo bisanzuye.

Aba bashoferi bavuga ko mu bindi bihugu nka Zambia, RDC na Tanzania bitaborohera kugenda mu mihanda yose ngo bayisoze batahahuriye n’ibibagora cyane cyane abapolisi babaka ruswa, imihanda mibi, serivisi zibatinza mu nziza n’ibindi.

Aha bari bakaranze ifunguro ry'amanwa. Imirimo yose ibera munsi y'ikamyo, aya masaha hari hahindutse mu gikoni
Kuri bo ikamyo ni byose, bayikinga iruhande bakiragiza Imana
Muri iyi kamyo imbere bamanitsemo inzitiramibu kugira ngo birinda malariya
Bakhressa Bakhar Katema amaze imyaka isaga 40 azana ibicuruzwa mu Rwanda, arashimira Paul Kagame kubera imiyoborere myiza n'umutekano utagereranywa
Yusuph Husseni Kabale (iburyo) Hashim Omar Mwake na Rashid Lejonjo batetse umutsima

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza