Uko gushyigikira amasezerano ya Arusha byatumye Amb. Habineza ‘Joe’ aterwa n’Interahamwe

Yanditswe na Twarabanye Venuste
Kuya 12 Ukuboza 2019 saa 06:32
Yasuwe :
0 0

Amb. Habineza Joseph uzwi nka Joe azwi cyane muri Politiki y’u Rwanda. Yabaye Minisitiri w’Urubyiruko, Umuco na Siporo imyaka isaga irindwi ndetse yahagarariye u Rwanda muri Nigeria na Ghana nka Ambasaderi, ubu ni Umuyobozi Mukuru wa Radiant Insurance Yacu.

Nubwo yagiye muri politiki akayikora kandi akayikunda nk’uko abitangaza, Habineza ngo ntabwo yari yarigeze yifuza kuyijyamo.

Avuga ko agendeye ku isura amashyaka ya Politiki yari afite mbere ya Jenoside nta gitekerezo cyo kuba umunyapolitiki yigeze agira.

Ati “Kwinjira muri Politiki navuga ko byangwiririye, muzi amateka y’igihugu cyacu, amashyaka ntabwo yakunze kuba mahire ku bantu ku buryo numvaga njye politiki ntayo nshaka kujyamo. Nta ntego ya politiki nari mfite, ntabwo nashakaga kujya muri politiki.”

Mbere gato ya Jenoside, Habineza yakoraga muri Bralirwa muri Serivisi z’Ikoranabuhanga, akaba n’Umukinnyi wa Volleyball kandi kuri we ibyo ngo byari bihagije.

Ati “Numva akazi kanjye ari tekiniki, ikoranabuhanga (ICT) ubundi nkakina Volleyball ubundi nkataha nkumva bihagije. Nyuma rero ukuntu umuntu agenda mu nzira hari igihe ahura n’ibintu atiteguye, Interahamwe zatumye ntekereza politiki.”

Ubwo hasinywaga amasezerano ya Arusha hagati ya Habyarimana Juvenal na FPR-Inkotanyi, byavuzwe ko amahoro abonetse.

Habineza yabwiye RBA ko icyo gihe yateguye umukino wa Volleyball agamije ko abantu basabana bakongera kwishima ariko ngo byakiriwe ku buryo butandukanye.

Ni umukino wahuje abana b’i Nyamirambo [aho Habineza yakuriye] n’abana bo ku Mulindi, bari basanzwe baziranye barakinanye. Wahuruje imbaga kuko witabiriwe n’abagera ku bihumbi 10.

Kuba warimo abana bo ku Mulindi kandi ariho Ingabo za FPR-Inkotanyi zari zifite ibirindiro byabaye ikibazo gikomeye Habineza atangira gukekwaho gukorana n’Inkotanyi yitwaje amayeri yo gutegura uwo mukino.

Ati “Ni umukino wa Volleyball nari nakoze wahuzaga abana b’i Nyamirambo n’abana bari bavuye ku Mulindi, kuko abenshi bari mu ikipe ya FPR ya Volleyball ni abantu twari twarakinanye tuziranye.”

“Ndavuga nti rero kuva amasezerano ya Arusha yari amaze gusinywa mu kwezi kwa munani mu 1993 tubihuze, reka dukine umukino wa volleyball abantu bose bongere basabane, bongere bumvikane, ariko nsanga ndimo kubikora Interahamwe zikabona ndimo kuzirwanya.”

Interahamwe zamuteye mu rugo rwe

Ati “Icyo gihe baza kuntera iwanjye, ndahunga. Ni inkuru ndende byari mu 1994 Jenoside itaratangira hari mu kwa Kabiri. Icyo gihe nibwo navuze nti ariko rero ibi bintu ntabwo byoroshye. Aho kugira ngo umuntu agume aha atazi aho ahagaze, reka njye gushaka umutekano wanjye muri FPR.”

Icyo gihe ngo yahise yohereza umugore we, aho avuka i Goma muri Repubulika Iharanira Demokarasi ya Congo we atangira ubuzima bwo gukorana n’Inkotanyi byeruye.

Ati “Nohereza umugore wanjye n’abana muri Congo kuri Goma. Nguma hano ariko numva nta mutekano mfite. Ku itariki ya Gatatu z’ukwa Kane mu 1994 nibwo nafashe icyemezo nti aho bigeze noneho, njye reka nerure nsange FPR. Ngenda ngiyeyo nzi ko nzamarayo iminsi mike nkajya hanze. Jenoside itangira nari hariya ku Mulindi.”

Nyuma ya Jenoside yabaye aho, kugeza mu 2004 ubwo yahamagawe ngo ajye kuba Minisitiri. Ibintu ngo byamutunguye cyane.

Ati “Nyuma mu 2004 numvise bampamagara ngo njye kuba Minisitiri. Birantangaza kubera ko numvaga nta gitekerezo na gito nari mfite, cyo kugira ngo njye muri Politiki.”

Habineza Joseph yagizwe Minisitiri w’Umuco na Siporo tariki ya 28 Nzeri 2004 asimbuye Bayigamba Robert, yegura ku mpamvu ze bwite mu Ugushyingo 2011.

Nyuma yaje guhabwa inshingano nshya zo guhagararira u Rwanda muri Nigeria na Ghana.

Ku wa 24 Nyakanga 2014 yongeye kugaruka muri Guverinoma yari iyobowe na Anastase Murekezi nka Minisitiri w’Intebe; asubira na none ku kuba Ministeri w’Umuco na Siporo, umwanya yamazeho iminsi 183 kuko ku gicamunsi cyo ku wa 24 Gashyantare 2015, byatangajwe ko asimbuwe na Uwacu Julienne.

Habineza Joseph ubu ni Umuyobozi Mukuru wa Radiant Yacu
Amb. Habineza Joseph yatunguwe no kugirwa Minisitiri atari yarigeze atekereza kujya muri Politiki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza