Umunyarwanda yatoranyijwe mu bazitabira amahugurwa yo kongerera ubushobozi abagore mu miyoborere

Yanditswe na IGIHE
Kuya 6 Nyakanga 2017 saa 09:32
Yasuwe :
2 0

Umunyeshuri wiga mu mwaka wa gatatu muri Kaminuza y’u Rwanda, Grace Ineza Umuhoza, yatoranyijwe mu bazitabira gahunda yo kongerera ubushobozi abagore mu miyoborere n’iterambere rya Afurika.

Iyi gahunda izwi nka ‘Moremi Initiative Leadership and Empowerment Development (MILEAD)’ itoranya muri Afurika yose abagore batanga icyizere kurusha abandi mu bijyanye n’imiyoborere, kandi bakaba bafite umuhate n’umurava wo kuyobora abandi no guharanira impinduka z’uyu mugabane.

Uyu mwaka abagore bagera ku 2500 bo mu bihugu bya Afurika 45 no muri Diaspora bari basabye kujya muri aya mahugurwa ariko 26 barimo Umuhoza wiga amasomo ajyanye n’iby’amazi no kubungabunga ibidukikije muri Kaminuza y’u Rwanda, baba aribo batoranywa.

Abayitabira baba bari mu kigero kiri hagati y’imyaka 19 na 25 bafite imishinga ijyanye no guhanga imirimo, ubuzima bw’abagore, ubutabera, kugira uruhare muri politiki, guhanga udushya mu bijyanye n’ibidukikije n’uburinganire nkuko The NewTimes yabitangaje.

Umuhoza umwaka ushize wanatsindiye igihembo cyo guhanga udushya tugamije ubucuruzi muri Afurika, kubera umushinga we Baby An Angel ugamije gufasha abagore n’imiryango yo mu cyaro abinyujije mu kwita ku bana bato, avuga ko aya ari amahirwe abonye yo kongera ubumenyi bwe.

Yagize ati “Nishimiye kuba natoranyijwe kwitabira iyi porogaramu ya MILEAD 2017, ndizera ko aya ari amahirwe kuri njye yo kwiyungura ubumenyi kugira ngo mbashe gukemura ibibazo byugarije umugore mu gihugu cyanjye na Afurika muri rusange bityo babeho neza.”

Moremi Initiative ni umuryango ugamije guteza imbere abagore mu miyoborere n’ubutabera muri Afurika. Ufite icyicaro muri Ghana no muri Leta Zunze Ubumwe za Amerika.

Iyi gahunda itanga ubumenyi bufasha abayitabiriye kugira imiyoborere ibereye Afurika kandi izatuma uyu mugabane uba ahantu heza ku Isi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza