Umunyarwandakazi Salma Ingabire yahawe kuyobora Visa mu Rwanda

Yanditswe na IGIHE
Kuya 19 Kamena 2018 saa 05:45
Yasuwe :
0 1

Umunyarwandakazi Salma Ingabire, wari usanzwe ari umuyobozi ukuriye ibikorwa muri AC group Ltd (Ikigo cyazanye ikoranabuhanga rya Tap & Go ryo kwishyuza ku modoka zitwara abagenzi hifashishijwe ikoranabuhanga ry’ikarita), yahawe kuba Umuyobozi mukuru uhagarariye ikigo cya Visa Inc. mu Rwanda.

Visa Inc. ni ikigo mpuzamahanga cyashyizeho uburyo bwo kwishyura ukoresheje ikarita izwi nka ‘Visa’ hifashishijwe ikoranabuhanga rigezweho. Iri koranabuhanga rikoreshwa mu bihugu birenga 200 aho kwishyurana bikorwa hifashishijwe iri koranabuhanga nta wukoze ku mafaranga.

Ubusanzwe Visa, ifite icyicaro muri Leta Zunze Ubumwe za Amerika, aho yahinduye ubuzima bw’abantu bacika ku muco wo kugendana amafaranga batangira guhaha no kwishyura icyo bifuza. Iki kigo nticyagiraga Umuyobozi Mukuru mu Rwanda.

Yagiraga gusa umuyobozi uyihagarariye mu bihugu bitatu ari byo u Burundi, Malawi n’u Rwanda; uwo akaba yari uwitwa Lucy Mbabazi.

Mu kiganiro yagiranye na IGIHE, Salma Ingabire, yavuze ko ku wa Mbere, tariki 18 Kamena 2018, yahuye n’Ubuyobozi bwa Banki Nkuru y’u Rwanda ku bijyanye n’ukwemezwa kwe.

Salma Ingabire ni muntu ki?

Salma Ingabire, ari mu bagize uruhare runini mu guteza imbere ikoreshwa rya telefone mu kubitsa no kohererezanya amafaranga (mobile banking) mu Rwanda; by’umwihariko mu kigo cy’itumanaho cya Aritel.

Mbere yaho yakoreye ikigo cy’imari hifashishwa ikoranabuhanga cya Wari SA cyo muri Afurika y’Epfo, ashinzwe kwagura ibikorwa byacyo mu Karere ka Afurika y’Iburasirazuba; mu bihugu bya Kenya, Tanzania, Uganda, Rwanda, Burundi, Ethiopia na Sudani y’Epfo.

Aha yafashije iki kigo mu bufatanye na za banki zirimo Bank of Africa, United Bank for Africa na Ecobank mu gutangiza serivisi zacyo nko kohererezanya amafaranga, kwishyura za fagitire no gucuruza amakarita n’ibindi.

Yakoze no muri Banki y’Abaturage (BPR-Atlas), aho yari akuriye ishami ry’ibikorwa bya banki bihabwa abakiriya (Head of Products), harimo n’ikoreshwa rya telefone mu itangwa rya serivisi z’iyi banki.

Salma afite impamyabumenyi y’icyiciro cya gatatu cya Kaminuza (MBA) yakuye muri Kaminuza ya Oxford Brookes yo mu Bwongereza.

Mu 2011, U Rwanda na Visa Inc. basinyanye amasezerano y’ubufatanye mu mikoranire, mu rwego rwo kwihutisha gahunda Leta y’u Rwanda yihaye mu cyerekezo cya 2020 cy’uko umusaruro w’umunyarwanda mu 2020 ugomba kuzaba ugeze ku madolari 1000 uvuye ku madolari 220 wari uriho mu 2000.

Ubu bufatanye bwaje busanga gahunda ya Banki Nkuru y’Igihugu yo kugabanya ikoreshwa ryo guhanahana amafaranga mu ntoki mu banyarwanda, hakongerwa amafaranga mu ma banki aho kuba mu ntoki, bikaba bizatuma amafaranga yatangwaga ku nyungu igihe umuntu agujije muri banki agabanuka.

Ubu buryo bwa VISA bwo kwishyurana bwateye imbere cyane muri Amerika, aho benshi ubu basigaye banabukoresha mu guhaha no kwishyura ibyo bifuza byose batiriwe bava aho bari, ibyo baguze bikabasanga aho baherereye.

Umuyobozi Mukuru wa Visa, Joseph W. Saunders, ubwo hasinywaga aya masezerano, yavuze ko Visa yahisemo gukorerera mu Rwanda ku mpamvu z’uko ari igihugu gitanga icyizere mu iterambere, bityo ikanagira umuyobozi usanzwe uzobereye iby’ikoreshwa ry’ikoranabuhanga.

Umunyarwandakazi Salma Ingabire yahawe kuyobora Visa mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza