Depite Bazivamo yamaganye filimi ya BBC ipfobya jenoside- Ikiganiro kirambuye

Yanditswe na Shaba
Kuya 6 Ukwakira 2014 saa 09:32
Yasuwe :
0 0

Ku mugoroba wo kuwa Gatandatu tariki ya 4 Ukwakira 2014, Visi Perezida wa FPR Inkotanyi Bazivamo Christophe, yagiranye ikiganiro na bamwe mu banyamuryango ba FPR Inkotanyi batuye i Buruseli mu Bubiligi.
Mu kiganiro cyihariye yagiranye na IGIHE, Depite Bazivamo wari mu ruzinduko rw’akazi akaboneraho kuganira n’abayoboke ba FPR Inkotanyi, yagarutse kuri filimi iherutse gusohorwa na BBC, avuga ko ibiyikubiyemo bigamije kuyobya uburari no kujijisha abantu kuko amakuru nyayo ku biyivugwamo (...)

Ku mugoroba wo kuwa Gatandatu tariki ya 4 Ukwakira 2014, Visi Perezida wa FPR Inkotanyi Bazivamo Christophe, yagiranye ikiganiro na bamwe mu banyamuryango ba FPR Inkotanyi batuye i Buruseli mu Bubiligi.

Mu kiganiro cyihariye yagiranye na IGIHE, Depite Bazivamo wari mu ruzinduko rw’akazi akaboneraho kuganira n’abayoboke ba FPR Inkotanyi, yagarutse kuri filimi iherutse gusohorwa na BBC, avuga ko ibiyikubiyemo bigamije kuyobya uburari no kujijisha abantu kuko amakuru nyayo ku biyivugwamo yatanzwe mbere n’abacamanza b’Abafaransa Marc Trevidic na Nathalie Poux.

Depite Bazivamo yavuze kandi ku mashyaka atavuga rumwe na Leta y’u Rwanda avuka ubutitsa, aboneraho kuvuga ko ayo adakwiriye kuyobya abantu ahubwo bakwiriye kuzajya bigerera mu gihugu bakamenya by’ukuri ibihabera.

Bazivamo Christophe ni umwe mu badepite bahagarariye u Rwanda mu Nteko Ishinga Amategeko y’Umuryango w’Afurika y’I Burasirazuba.

Depite Bazivamo yabasabye kwirinda ibinyoma by'abasebya u Rwanda

Ikiganiro kirambuye…

IGIHE: Urugendo rwawe mu Bubiligi rugamije iki?

Bazivamo: Ndi hano i Buruseli aho naje mu rwego rw’akazi nkora muri komisiyo iyobora Inteko y’ibihugu by’Afurika y’iburasirazuba, nkaba ndi mu rugendo shuri mu nteko y’ibihugu by’u Burayi, kugirango tuganire ku mikorere n’imikoranire, ariko noneho tunigire ku byo bakoze byiza bibafasha cyangwa se n’ibyo bagerageje bikagenda nabi, tukareba natwe ngo ni iki twakora ngo ibyacu bigende neza.

Ni muri urwo rwego rero nifuje ko ubwo ndi hano mu Bubiligi nabonana n’abanyamuryango ba FPR Inkotanyi, mu buryo bw’ibiganiro n’ubusabane kugirango mbagezeho amakuru ku bijyanye n’umuryango muri rusange kandi twungurane n’ibitekerezo kuri byinshi, ndetse tunibukiranye amahame n’amatwara y’umuryango kugirango buri wese aho ari yumve kurushaho uruhare akwiye kugira muri gahunda yubaka mu bikorwa by’umuryango ari nabyo bikorwa by’igihugu muri rusange.

IGIHE: Muri iyi minsi hari filimi yiswe "Rwanda’s untold story" yakozwe na BBC, ivuga ibitandukanye n’ibyo FPR yemera. Wayivugaho iki?

Bazivamo: Nkurikije amakuru mfite kuri iyo filimi, navuga ko ibyo bifuza ari ukuyobya uburari no kujijisha kuko ukuri kwaravuzwe igihe kwagaragaraga mu bushakashatsi bwakozwe n’abacamanza b’Abafaransa Marc Trévidic n’abo bafatanyije, berekanye ibimenyetso bifatika babashije kugeraho, baje mu gihugu aho ibintu byagiye bibera baganira n’ Abanyarwanda b’ingeri zose babaha ubuhamya, bo ubwabo bikorera isesengura ryimbitse.

IGIHE: Mu biganiro wahaye abanyamuryango wibanze ku ijambo "kugira umutekano ku mutima" n’iki washakaga kuvuga?

Bazivamo: Icyo nashakaga kuvuga ni uko ubuyobozi bwo mu Rwanda ari ubuyobozi bwiza, buha abaturage icyizere, kandi noneho bukabaha n’ingamba zibubaka, muri icyo cyizere bigatuma ibikorwa bafite iteka babona ari ibikorwa birambye, bakaba kandi ari abaturage bibona mu buyobozi bwabo.

Nk’uko nabibaganirije rero, bakwiriye gukomeza guharanira kubaka icyizere mu bandi Banyarwanda ku bijyanye n’ubuyobozi bwiza bw’igihugu cyabo kuko ni ubuyobozi bwifuriza bose kugira umutekano ku mutima n’iterambere rirambye mu gihugu. Ariko kandi twamaze gutera intambwe igaragara kandi Abanyarwanda benshi bibonamo, ibi ndabivuga ngo bamwe bake baba hano mu bindi bihugu, u Bubiligi, u Buholandi, u Bufaransa n’ahandi badashaka kumva ukuri babyumve bahinduke baze dufatanye kubaka igihugu.

IGIHE: Si kenshi Abanyarwanda bo muri diaspora basurwa n’abayobozi bakuru ba FPR, ubutumwa bw’umwihariko mubasigira ni ubuhe?

Bazivamo: Umunyarwanda wese aho ari yumve ko ari Umunyarwanda, cyane ko mu rwego rw’igihugu icyashyizwe ku isonga ari ubumwe bw’Abanyarwanda, tukemera ko abashyize hamwe bagira ingufu kandi bakagera kuri byinshi bifuza, kandi nkasaba ko umuntu wese ufite amakuru meza yashishikarira no kuyasakaza kuri bose, abafite ibitekerezo bibi nabo bakaganirizwa kugirango bahinduke.

Birumvikana ko abatahinduka baba ari intagondwa, nkaba navuga nti udashaka kubona azageraho abone kuko ibyo dushaka ni imibereho myiza n’amahoro ku Banyarwanda. Abanyarwanda bari mu mahanga bagafatanya n’abari mu gihugu.

IGIHE: Gusa hano muri Diaspora havuka amashyaka menshi atavuga rumwe na Leta y’u Rwanda…

Bazivamo: Nabwira abayoboke bayo ko bakwiye gushishoza bakareba neza ibyo babwirwa hari igishya kirimo u Rwanda rudakora, ayo mashyaka azabazanira, nkaba nababwira ko batera indi ntambwe bakava mu byo babwirwa bakaza mu Rwanda kwihera amaso aho tugeze, u Rwanda rurafunguye kuko mu mahame ya FPR harimo ikintu cyo guca ubuhunzi, kuko tuzi ikibi cy’ubuhunzi, kutagira igihugu nta bwisanzure nta ruvugiro ntibyoroshye. Kandi rero wubaka igihugu ari uko ukizi, bazaze rwose birebere basesengure ibyo twamaze gukora n’ibyo twifuza gukora biri muri gahunda.

Abayobozi rero bayo mashyaka nabo nababwira nti ‘umuntu uyobora kandi ukunda abaturage be ntabacamo ibice, ngo ababibemo inzangano cyangwa asenya mu mvugo no mu ngiro ibikorwa bigejejeho bibavunnye, kandi rero umuntu yakwibaza ati ‘ese Abanyarwanda bo barabashaka?’, nemera ko urubuga rwo gukiniramo politiki ari mu gihugu kandi bikarangizwa n’amatora, niba rero bumva bafite ingufu nibiyandikishe mu Rwanda nk’amashyaka bazajye mu ipiganwa 2017, Abanyarwanda nibareba bagasanga ibyo bazanye ari ibintu bifatika icyo gihe bazabatora kandi badatowe bemere bajye mu zindi gahunda zo gukorera igihugu zirahari mu kwiteza imbere aho gukorana n’interahamwe. Birababaje kubona umuntu ashaka ubutegetsi ajya gukorana n’abantu basize bishe abantu.

IGIHE: Ndabashimiye

Bazivamo: Murakoze

Bazivamo Christophe (uwa kabiri uhereye iburyo) na Ambasaderi Masozera uhagarariye u Rwanda mu Bubiligi (uwa kabiri uhereye ibumoso)
Abanyamuryango ba FPR barangwa na morali
Abanyamuryango ba FPR Inkotanyi mu Bubiligi bakurikiye impanuro za Depite Bazivamo
JPEG - 211.9 kb
Bamwe mu banyamuryango ba FPR batanze ibitekerezo ku kiganiro bahawe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza