Dieng, Umunya-Sénégal wazengurutse ibihugu byinshi akagirira amahirwe mu Rwanda

Yanditswe na David Eugène Marshall
Kuya 6 Mata 2018 saa 11:58
Yasuwe :
1 0

Politiki y’u Rwanda yo kwakirana na yombi abanyamahanga baza kurukoreramo ni iya vuba ariko hari abahamaze imyaka myinshi, bahorana akanyamuneza bitewe n’inyungu baharonkeye, bagahamya ko n’abaza ubu bakwisanga.

Uri mu mijyi, ntawavuga umubare w’Abahinde, Abashinwa, Abanye- Congo, Abanya-Uganda ubasha kubona mu bucuruzi. Ariko burya hari n’abandi baturuka mu bindi bihugu bya Afurika nka Sénégal, bamaze gufatisha mu bushabitsi i Kigali.

Yakunze u Rwanda, ni umugabo wubatse, afite n’abana bane babana i Nyamirambo.

IGIHE yasuye Umunya-Sénégal, Sada Dieng (S.D), umaze imyaka isaga 20 i Kigali, wahiriwe mu mwuga w’ubudozi, yaje kuhakorera nyuma yo gukundishwa u Rwanda n’Umunyarwandakazi bahuriye i Burundi.

IGIHE: Wari ubayeho ute muri Sénégal, uza kuza mu Rwanda ute?

S.D: Nkiri muri Sénégal mu 1990 nari umusore ushabutse kandi w’icyamamare mu by’ubudozi mu Mujyi wa Touba mvukamo.

Nari mfite inshuti muri Bénin, zari zinziho ubuhanga muri uwo mwuga, bakajya bansaba kujya gukorerayo, kubera ubudozi iyo bwari bukiri hasi cyane, nibo banteye gushirika ubute nkava muri Sénégal. Nagezeyo ngira amahirwe yo kumenyekana ndetse nkajya nambika n’abategetsi baho bo mu nzego nkuru.

IGIHE: Wavuye muri Bénin ute?

S.D: Byatangiye hari umwe muri bo twakoranaga muri Bénin waje gukorera i Bujumbura mu Burundi, agezeyo arampamagara ngo nanjye nzeyo.

Mpageze nahuye n’umunyamakuru wakoreraga Radiyo na Televiziyo y’u Burundi, yasomaga amakuru ya saa mbiri z’ijoro, nkajya mwambika, kuva ubwo abamubonye bakajya bamubaza umudodera, akabandangira, nza kwamamarayo gutyo.

Hari n’abategetsi bakomeye mu Burundi muri icyo gihe nambikaga, nguko uko nageze muri aka Karere ka Afurika y’Iburasirazuba.

Sada Dieng, Umunya-Sénégal uzobereye mu budozi i Kigali

IGIHE: Kuki wavuye i Bujumbura ukaza i Kigali kandi uvuga ko wari uhamereye neza?

S.D: Mu Burundi haje kuba ibibazo by’umutekano bituma ntangira gutekereza kuvayo ariko ntazi aho nakwerekeza, hari mu myaka ya za 1993 gutyo.

IGIHE: U Rwanda rwaje rute mu cyerekezo gishya wahisemo?

Nagize amahirwe yo kumenyana n’umukobwa w’Umunyarwandakazi [simvuga amazina ye], wigaga muri imwe muri kaminuza yo mu Burundi, niwe wanshishikarije kuza gukorera mu Rwanda, ntiyatuzaga kumbwira kuhaza.

IGIHE: Yakwizezaga ate ko mu Rwanda wahirwa kurusha i Bujumbura?

S.D: Yakundaga imyambaro nadodaga, agahora ambwira ati ‘Ntureba iyi myambaro udoda, uramutse uyidodeye mu Rwanda, uzaba icyamamare kandi uzagira iterambere rikataje.’

Gusa sinari nzi u Rwanda neza, uretse kurwumva ku byarubayemo mu 1994, ndetse icyo gihe nari mfite ubwoba bwo kuba nahaza, ariko akampatiriza, anyumvisha ukuntu igihugu gifite amahoro n’umutekano ndetse kurusha mu Burundi, hari mu 1996.

IGIHE: Ni ibyo gusa byatumye uza gukorera i Kigali?

S.D: Uwo mukobwa yaje kujya gukomereza amasomo muri Canada, ariko ansigira inshuti ze z’abanyeshuri biganaga ngo njye mbadodera. Yewe anampa nimero ze za telefoni ngo tujye dukomeza kuvugana ari muri Canada. Byatumye ntangira kujya nza mu Rwanda nzanye imyenda idoze, ariko ngasubira i Burundi. Nyuma gato mu 1997 nanzura kuza burundu, nko kugerageza amahirwe nk’uko wa mukobwa yabimbwiraga.

IGIHE: Ugeze mu Rwanda, ibyo wabwirwaga na wa mukobwa waje gusanga ari ukuri?

S.D: Ku ikubitiro byarankomereye. Nakoreshaga ururimi rw’Igifaransa gusa kumvikana n’abakiliya bikangora. Nta Cyongereza, nta Kinyarwanda, nta Giswahili nari nzi, kumvikana mu rurimi byari bigoye cyane.

IGIHE: Ni iki cyatumye ushikama kandi harimo ingorane?

S.D: Ikintu cyantangaje, ni ubupfura nasanganye Abanyarwanda, n’ubwo tutumvikanaga neza mu rurimi ariko bafite ukuntu bakira umuntu uturutse ahandi, ukumva murasa n’abari kumvikana. Abanyarwanda ni imfura cyane, banyakirije amaboko yombi.

IGIHE: Ubushabitsi bwashinze imizi ryari?

S.D: Nkigera hano, nahasanze umuvandimwe ukomoka muri Guinea, tukajya dukorana. Byamfashe imyaka ibiri kugira ngo ntangize Atelier yanjye bwite mu 1998.

IGIHE: Wasanze ubushabitsi mu Rwanda buhagaze bute ugereranyije n’ibindi bihugu wanyuzemo?

S.D: Ni ibintu bitangaje! Abaturage bo mu Rwanda bakunda ibyo nkora, nta kibazo ku mikorere cyangwa imibereho mfite.

Ndetse n’abo nari narasize mu Burundi baje kunsanga hano, abandi baturuka muri Sénégal baraza kuri ubu tugeze kuri 30. Dukorera mu Rwanda, nta kibazo na kimwe dufite, gusa abantu ntibazi kudutandukanya n’abandi bakomoka za Mali, Togo, Bénin n’ahandi. Bose bakunze kubita Abanya-Sénégal!

IGIHE: Watubwira ibyo umaze kwigezaho n’icyo yenda abandi bakungukiyeho inaha?

S.D: Ngerageje kuvuga nk’uhagarariye Abanya-Sénégal baba mu Rwanda by’umwihariko abakora ubudozi, usanga tumeze neza, kandi tumaze kwigisha Abanyarwanda batari bake umwuga w’ubudozi ari nawo twibandaho ahanini.

Dufite atelier eshanu z’Abanya-Sénégal muri uyu Mujyi wa Kigali kandi zikomeye, hari n’Abanyarwanda bagera kuri batandatu cyangwa barindwi bamaze kubaka ama-atelier y’ubudozi akomeye, abagore n’abagabo ndetse turi ku rwego rumwe, kandi nigishije.

Ikindi dutanga imisoro ya Leta kandi n’ibisanzwe iyo wakoze imibare neza mu by’ubucuruzi, ukagira uruhare mu gusorera igihugu, wumva ufite ishema ry’ibyo ukora.

IGIHE: Ugize amahirwe yo guhura na Perezida Macky Sall cyangwa Paul Kagame w’u Rwanda wabasaba iki?

S.D: Nagize amahirwe nk’ayo yo guhura na Makcy Sall inshuro ebyiri muri iyi minsi ishize ubwo yazaga mu Rwanda. Bwa nyuma hari ku wa 21 Werurwe 2018. Yatwakiriye twese uko tuba hano, tumubwira ko iyo turi mu Rwanda twisanzura nk’abari muri Sénégal.

Ikibazo duhura nacyo ni iyo dukeneye kongereza Pasiporo kuko bidusaba kujya i Nairobi muri Kenya. Twasabye Perezida wacu kuduhera ubutumwa bw’ishimwe Perezida Kagame, tunamuha indamukanyo yacu ngo amudusuhurize.

Wari umwanya wo kumubwira kandi ko mu Rwanda iyo ukurikije amategeko n’amabwiriza agenga igihugu, nta kibazo na mba wahagirira.

IGIHE: Dusoza watubwira ibintu byagutangaje ukigera mu Rwanda?

Icya mbere Abanyarwanda bagira urugwiro, ubupfura buzira uburiganya ubasangana. Iwacu abantu barwanira mu muhanda ku manywa y’ihangu, bagatongana, abantu bigendera ntawe ubyitayeho. Mu Rwanda ntibibaho.

Mu Rwanda hari isuku kandi imihanda n’ibikorwaremezo biri ku rwego rukomeye, nagiye nirebera ubwanjye uko igihugu cyihuse mu majyambere mu myaka 21 maze mu Rwanda, biratangaje!

IGIHE: Iyo utekereje Sénégal ni iki ukumbura kurusha ibindi?

S.D: Si kenshi nkumbura muri Sénégal mu gihe maze mu Rwanda ahubwo iyo ngiye iwacu nkumbura mu Rwanda cyane kurusha uko nkumbura Sénégal ndi mu Rwanda, uko ni ukuri kwanjye.

IGIHE: Ni ayahe maherezo ya wa Munyarwandakazi wagukundishije u Rwanda?

S.D: Wa munyarwandakazi turacyavugana, kuri ubu akorera ku Biro bya Afurika Yunze Ubumwe, Addis Abeba muri Ethiopia.

Dieng ni we ukuriye Ishyirahamwe ry’Abanya-Sénégal batuye cyangwa bakorera mu Rwanda.

Sada Dieng afite atelier i Nyamirambo
Sada Dieng azwiho kudoda imyenda ya kinyafurika izwi nka "boubou"

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza