Kigali: Ni gute umupolisikazi ahuza inshingano n’ubuzima bwa gikobwa?

Yanditswe na Claude
Kuya 19 Mutarama 2015 saa 11:25
Yasuwe :
0 0

Uretse abagore, usanga hari n’abagabo batinya umwuga w’igipolisi cyangwa igisirikare; ahari bitewe n’inshingano zikomeye baba bafite zo kurinda igihugu, gukurikirana abanyabyaha no kubungabunga umutekano.
Nta shiti, hari ababona umupolisi w’umugore, bakibaza uko ahuza ako kazi, bamwe bita ko gakomeye, n’ubuzima busanzwe bwa gikobwa bukunze, kuganzwa no kwishimisha, no koroshya ubuzima cyane kuri benshi.
Iyo bigeze ku ngingo y’urukundo ho biba ibindi bindi. Hari abibaza bati “Ese umusore (...)

Uretse abagore, usanga hari n’abagabo batinya umwuga w’igipolisi cyangwa igisirikare; ahari bitewe n’inshingano zikomeye baba bafite zo kurinda igihugu, gukurikirana abanyabyaha no kubungabunga umutekano.

Nta shiti, hari ababona umupolisi w’umugore, bakibaza uko ahuza ako kazi, bamwe bita ko gakomeye, n’ubuzima busanzwe bwa gikobwa bukunze, kuganzwa no kwishimisha, no koroshya ubuzima cyane kuri benshi.

Iyo bigeze ku ngingo y’urukundo ho biba ibindi bindi. Hari abibaza bati “Ese umusore w’umusivili ni gute yatinyuka kwegera umupolisi cyangwa se umusirikare w’umugore akamubwira ko amukunda?”

Ubuzima bw'Abapolisikazi bubabera bwiza kurusha ubwa gisivili kuko bagendana no kumenya inshingano

Iyo yamaze gushaka hari benshi bibaza uko umupolisi w’umugore yakwita ku mwana, urugo anabihuza n’akazi; aha ukaba wakwibaza niba na bo bajya bagira umwanya wihariye wo gukora bya bimenyetso bifatwa nk’ibyihariye nko gukuramo inkweto abagabo babo bageze mu rugo, kumumesera tumwe mu twenda, gusasa, gutera agapasi n’ibindi…

Mu gushaka gushira aya matsiko yose, twegereye Assistant Inspector of Police (AIP) Mwenzangu Goreth uhagarariye ishami ry’Uburinganire muri Polisi y’u Rwandana AIP Alphonsine Murekatete.

Ikiganiro kirambuye

IGIHE: Ubona ari iyihe mpamvu abapolisi b’abagore bakiri bake mu Rwanda?

AIP Murekatete Alphonsine: Abapolisi b’abagore ntekereza ko aho bageze atari bakeya, urebeye hamwe ubu abapolisi b’abagore basigaye biyongera ku buryo ubu tugeze kuri 20% by’abapolisi bose mu Rwanda.

IGIHE: Ubyakira gute wowe kuba umubare ugenda wiyongera?

AIP Murekatete Alphonsine: Ni ikintu gishimishije kuko iyo mbona ndi umupolisi w’umwofisiye ni imwe mu ntambwe zigaragaza ubutwari bw’abagore, kandi tubyakira neza dushimira Leta kuba yaraduhaye icyizere, ikaduha agaciro ikatwumvisha ukuntu natwe tubishoboye kandi natwe tugasanga tubishoboye.

U Rwanda rugenda rwunguka amaraso mashya y'Abapolisikazi umunsi ku wundi

IGIHE: Watubwira uko gahunda yawe y’umunsi, iba iteye?

AIP Murekatete Alphonsine: Gahunda yanjye y’umunsi, icya mbere mba ngomba kubahiriza akazi kanjye k’umunsi nkagatunganya, inshingano zanjye zose nkazubahiriza, ariko nyine nk’umugore mu rugo mba mfite izindi nshingano mba ngomba kubahiriza kandi nazo nkazitunganya neza uko bisabwa.

Ariko ibyo ni ibisanzwe nko ku wundi mugore w’umusivili abyuka saa kumi n’ebyiri za mugitondo (6:00aAM) akagera ku kazi saa moya (7:00AM) akaza gutaha saa kumi n’imwe (5:00PM), nanjye ni uko bigenda. Iyo ntashye mvuye ku kazi njya mu rugo nyine nanjye nkuzuza inshingano zo mu rugo nk’undi mugore wese.

IGIHE: Hari ubwo abantu bashobora kwibaza ko hari imirimo iba yaragenewe abagabo, isaba imbaraga cyangwa se imiterere yayo ituma abagore batayishobora wowe ubivugaho iki?

AIP Murekatete Alphonsine: Njye siko mbyumva kuko ahari wenda icyo abantu bita imirimo y’abagabo njyewe nayinyuzemo yaba iyo kosi, yaba ari iyi mirimo y’igipolisi; ibintu byose mbona biterwa n’imitekerereze y’umuntu iyo wumva ushobora gukora ikintu uragikora.

IGIHE: Hari abantu bacyumva ko umukobwa atajya mu gisirikare cyangwa mu gipolisi; wowe wabitinyutse gute?

AIP Murekatete Alphonsine: Nyine n’iyo mitekerereze, imwe mu mpamvu njye nabitinyutse ni uko igipolisi n’igisirikare ni akazi keza nk’akandi kose aha ngaha. Ahubwo kuri twe tuba tunumva ari n’akazi keza gafite akarusho n’umwihariko kuko iyo ugakora uba wumva uri umwe mu bantu barinda umutekano igihugu kigatera imbere, iyo tugakora tuba twumva biduteye ishema.

U Rwanda rumaze kugira umubare ufatika w'abapolisikazi ba Officers

IGIHE: Hari abibaza ibibazo by’amatsiko bati ‘buriya mu rugo ujya ugira umwanya wo gukora uturimo twitwa utw’abagore (wenda nko guterera ipasi umugabo) n’utundi nk’utwo?’

AIP Murekatete Alphonsine: Yego, uwo mwanya turawugira rwose. Erega nk’uko nakubwiye ko ari akazi nk’akandi, niba ari umunsi wo kuruhuka ari Weekend nanjye ndaruhuka ngakora ibyo ngibyo nk’uko n’uwundi mukozi wa Leta akora akageza ku wa Gatanu akaruhuka, abapolisi b’abagore turabikora rwose.

IGIHE: Ese koko hari imirimo ubona abagore batashobora, uhereye kuri ibyo bivugwa?

AIP Murekatete Alphonsine: Oya nta mirimo igenewe runaka na runaka, burya hari ukuntu Imana igenda itanga impano zitandukanye mu mitekerereze y’abantu, hari igihe usanga nk’umugore ari umuhanga afite ibitekerezo byakubaka akaba ahubwo ashobora no gukora ibintu bisumbye kure n’iby’abagabo.

PC Constable Birori Consolée, Amaze kuba ubukombe mu mukino wa Taekwondo

None se, reka nguhe urugero; ubu Liberiya ntiyobowe n’umugore? Ibi bisobanura rero ko nta bintu bigenewe umugabo umugore ahejweho, ahubwo byose bipfira mu myumvire, iyo wishyizemo ko ubishoboye utera intambwe, by’umwihariko twe mu Rwanda tubigeraho akenshi kuko tunashyigikiwe n’abagabo baba batwereka ko tubishobora.

IGIHE: Abapolisi n’abasirikare mufatwa nk’abantu batinyitse cyane, ku buryo hari uwibaza ati “buriya umukobwa w’umupolisi hari umusore w’umusivili upfa gutinyuka kumwegera akamuganiriza, wenda agiye nko kumutereta?”

AIP Murekatete Alphonsine: [Yakubise agatwenge…] Hmmm none se si abantu basanzwe? Ibyo biganiro by’urukundo bibaho nk’uko biba ku bandi, ni ibisanzwe. Erega ntabwo umupolisi cyangwa umusirikare ari inyamanswa. Ahubwo ni bo bantu usanga iyo habayeho ibyo biganiro by’urukundo abantu biyumvamo cyane kuko basanzwe bagira ishyaka ryo kurwanira amahoro, nta mpamvu yo kubatinya, ntabwo batinyitse rwose.

IGIHE: Ku buryo se umusore w’umusivili yakwiye kujya atinyuka akaba yatereta umupolisi?

AIP Murekatete Alphonsine: Yooo cyane rwose, umugore w’umufande abana n’umugabo w’umusivili urugo rukaba rwiza cyane, ingero ni nyinshi zirahari. Erega ni abantu basanzwe, no kubana cyangwa gukundana ni ibisanzwe rwose.

IGIHE: Uvuga iki ku kuba u Rwanda ari cyo gihugu cya mbere ku Isi gifite abagore benshi mu nteko?

AIP Murekatete Alphonsine: Ndabyishimira bigatuma ndushaho gushimira ubuyobozi bw’u Rwanda kuko bituma turushaho kugaragara ku ikarita y’Isi nk’igihugu kiri gutera imbere kinateza imbere uburinganire.

IGIHE: Ni iki wakunze nk’umugore mu gipolisi?

AIP Murekatete Alphonsine: Ni uko iyo ubaye umupolisi usobanukirwa ko uri umunyagihugu ukwiye gukorera igihugu. Nk’umugore hano uhabwa agaciro kuba uri umugore wemeye kuza mu gipolisi, abayobozi bakakumva, bakabizirikana bakakorohereza kugira ngo tumenye ingo zacu n’abana bacu.

Icyanshimishije kurusha ibindi ni ukumva amahanga yose ahururira kureba u Rwanda ku bw’uko tubungabunga amahoro hirya no hino ku Isi, byankoze ku mutima cyane.

Mu butumwa bw'amahoro baba ari nta makemwa, kandi babusohoza neza

IGIHE: Ni iki ubona kibangamira (cyangwa gishobora kubangamira) umupolisi bitewe n’uko ari umugore?

AIP Mwenzangu: Imbogamizi zirahari nk’uko ziri no mu kandi kazi. Urugero wenda nk’iyo ufite abana bato mu rugo, bigusaba no kwita ku rugo, ukareba abo bana, ukamenya umugabo wawe, ukita ku muryango mugari kandi uzirikana kubahiriza inshingano z’akazi.

Akenshi ntabwo biba byoroshye ku mugore, ariko uragerageza noneho n’uburyo ubuyobozi butworohereza bikadufasha tukita kuri izo ngo zacu kandi tugakora akazi dushinzwe ko gucunga umutekano neza.

IGIHE: Ni iki wabwira abandi bakobwa bakigingimira kuza mu gipolisi, wenda babikunze ariko bikabagora kwirekura?

AIP Mwenzangu: Nkanjye wageze mu gipolisi uri kugikorera nababwira ko iyo ugezemo wumva uhawe inshingano, ukumva ubushobozi bwawe bwiyongereye. Iyo umaze kuzuza ibyo ushinzwe noneho urushaho kugira ishema kuko uba ubona hari icyo umariye igihugu kandi harimo ibyiza byinshi bifasha iterambere ry’abagore.

IGIHE: Nk’ibihe?

AIP Mwenzangu: Ehh, nk’ubu abagore bari guhabwa amahirwe menshi kujya muri za misiyo (mission/ubutumwa bw’akazi), ariko ikirenzeho ni uko uba ukorera igihugu cyakubyaye.

IGIHE: Murakoze

AIP Murekatete Alphonsine: Murakoze namwe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza