Bimwe mu biranga umuyobozi w’Itorero ry’Igihugu, Rucagu Boniface

Bimwe mu biranga umuyobozi w’Itorero ry’Igihugu, Rucagu Boniface


Yanditswe kuya 18-11-2012 - Saa 10:23' na Gaston Rwaka

Umuyobozi w’Itorero ry’Igihugu , Rucagu Boniface, yagiranye ikiganiro na IGIHE , tubasha kumenya byinshi kuri uyu muyobozi uzwi na mbere ya Leta y’Ubumwe.

Rucagu Boniface yavukiye mu murenge wa Nemba mu karere ka Burera, mu ntara y’Amajyaruguru yabereye Guverineri.

Afite impamyabushobozi y’amashuri yisumbuye mu bijyanye n’Uburezi .Afite umugore, Mukamazera Victoire, bafitanye abana batanu.

IGIHE: Ni ikihe kintu cy’ibanze kikuranga?

Rucagu Boniface: Gukunda akazi ni cyo cya mbere.

IGIHE: Ni ikihe kintu kigushimisha ku wundi muntu, yaba umugabo cyangwa umugore?

Rucagu: Wenda navuga byinshi, ariko muri rusange nshimishwa no kubona umuntu
ufite ubumuntu mu mibanire ye ndetse akanuzuza inshingano ze.

IGIHE: Ni iki wanga?

Rucagu: Nanga umuntu wikunda, wibaza ko mugenzi we adafite uburenganzira
kimwe na we.

IGIHE: Ni iyihe ndangagaciro yawe y’ibanze?

Rucagu : Ubworoherane, ubwumvikane n’ubumuntu.

IGIHE: Ni izihe ntege nke zawe?

Rucagu : Ncika intege cyane iyo mbonye umuntu w’umunebwe, umuntu utorohera
abandi n’utagira ubumuntu.

IGIHE: Iyo uri kumwe n’umuryango wawe uba wumva umerewe ute?

Rucagu: Mbona ari bo buzima bwa kabiri kuko amasaha menshi y’ubuzima bwanjye
nyamara mu kazi.

IGIHE: Inzu yawe iramutse ihiye n’iki wakuramo bwa mbere?

Rucagu : Bwa mbere nakuramo impamyabushobozi yanjye.

IGIHE: Imana iguhaye kurema umuntu, ni ibihe bintu 3 byiza wamuha?

Rucagu: Ubworoherane, ubumuntu no gukunda gukora.

IGIHE: Ni ikihe kintu wakoze uri umwana gisekeje utazigera wibagirwa?

Rucagu : Nkitangira ishuri, Data yanjyanaga yo nkaguma mu nzira, abandi bataha
nanjye nkabakurikira tugasubirana imuhira.


IGIHE
: Ni ikihe kintu wagezeho ubwawe ujya wibuka ukumva kiragushimishije kurusha ibindi?

Rucagu: Nta na kimwe mbona nagezeho ku bwanjye, gusa sinakwibagirwa ko maze
guca akenge, Imana yampaye impano yo kuyobora abandi banyeshuri ku buryo niga muri Ecole
Normale de Byumba nigeze kuyobora ibintu birenga bitandatu ndi umwe.

IGIHE: Ni uwuhe wigeze gukora wakunze kurusha indi yose?

Rucagu: Imirimo yose nakoze mu buzima bwanjye narayishimiye gusa ikitaragenze
neza n’umwanya wa Depite nagize kuva mu 1984 kugeza 1994.

IGIHE: Iyo urebye politiki y’u Rwanda unezezwa n’iki?

Rucagu: Nezezwa n’ubworoherane, iterambere, ubumwe n’ubwiyunge nk’uko
bishimangiwe mu itegeko nshinga.

IGIHE: Ubona ute amadini n’amatorero mu Rwanda?

Rucagu: Nta dini ryigisha inabi, umuntu ni we wahemuka ku bw’inyungu ze,
ahubwo nsanga amadini n’amatorero afite uruhare rukomeye mu kwigisha abayoboke bayo
indangagaciro na za kirazira.

IGIHE: Ni uwuhe muhanzi ukunda mu Rwanda?

Rucagu: Uwo ari wese waza atera avuga amahoro y’ukuri numva nanjye
namwikiriza.

IGIHE: Ni iki gishobora gutuma wishima wari ubabaye?

Rucagu : Iyo mbonye abo nyobora buzuza inshingano zabo.

IGIHE: Ni iki gishobora gutuma urara udasinziriye?

Rucagu: Keretse igihugu cyatewe ni bwo numva ntasinzira.

IGIHE: Ni nde muntu ukunze kurusha abandi muri iyi minsi?

Rucagu: Uwayoboye urugamba rwo kubohora iki gihugu, akongera kubaka ubumwe
bw’Abanyarwanda kugeza magingo aya akaba anabifuriza iterambere rirambye.

IGIHE: Ku bwawe urukundo ni iki?

Rucagu: Urukundo ni urutireba cyangwa ngo rugarukire kuri wowe n’abawe, ahubwo
ni rwa rundi rurenga imipaka, rugatsinda ishavu.

IGIHE: Wumva uzakora uwuhe murimo igihe uzaba utakiri mu nzego za politiki?

Rucagu: Numva nzandika ibitabo bizafasha abakiri bato.

IGIHE: Ni ibihe bitabo uherutse gusoma?

Rucagu: “Histoire du Rwanda Dès Origines à la fin du XX è Siècle”.

IGIHE: Ni uruhe rugingo ukunda ku mubiri wawe?

Rucagu: Ingingo zanjye zose ndazikunda kuko zose zirakora neza kandi ziruzuzanya.

IGIHE: Ifunguro ukunda kurusha ayandi ni irihe?

Rucagu: Nkunda imboga rwatsi n’imbuto z’umwimerere.

IGIHE: Naho ikinyobwa ukunda kurusha ibindi?

Rucagu: Nkunda kunywa amazi.

IGIHE: Urumva umeze ute muri aka kanya?

Rucagu: Ndumva meze neza.

IGIHE: Uratekereza iki ku byo umaze kubazwa?

Rucagu: Nzi neza ko abantu bagira amatsiko yo kumenya amakuru y’umuntu uzwi,
ngira ngo ni yo mpamvu bahora bamwibazaho.

IGIHE: Murakoze cyane ku kiganiro kirambuye tugiranye.

Rucagu: Namwe turabashimiye cyane.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO