Ibintu 25 utazi kuri Prof Shyaka Anastase

Ibintu 25 utazi kuri Prof Shyaka Anastase


Yanditswe kuya 27-03-2012 - Saa 10:46'

Prof. Shyaka Anastase ni Umuyobozi Mukuru (CEO) w’Ikigo cy’Igihugu Gishinzwe Imiyoborere (Rwanda Governance Board). Afite impamyabumenyi y’ikirenga mu bya Politiki, akagira n’impamyabushobozi ihanitse mu bya tekiniki. Arubatse, afite umugore n’abana batatu. Mu gushaka kumenya byinshi kuri we, umunyamakuru wa IGIHE Ruzindana RUGASA yagiranye nawe ikiganiro, amusubiza ibibazo 25 bikurikira.

IGIHE : Ni ikihe kintu cy’ibanze kikuranga ?

Prof Shyaka : Kugira ishyaka.

IGIHE : Ni ikihe kintu cyiza kigushimisha ku wundi muntu, yaba umugabo cyangwa umugore ?

Prof Shyaka : Urugwiro.

IGIHE : Ni iki wanga ?

Prof Shyaka : Nanga umugayo.

IGIHE : Ni iyihe ndangagaciro yawe y’ibanze ?

Prof Shyaka : Gukunda abantu.

IGIHE : Iyo uri kumwe n’umuryango wawe uba wumva umeze ute ?

Prof Shyaka : Numva nuzuye.

IGIHE : Inzu yawe iramutse ihiye ni iki wakuramo bwa mbere ?

Prof Shyaka : Umugore n’abana banjye.

IGIHE : Imana iguhaye kurema umuntu ni ibihe bintu bitatu byiza wamuha ? Naho wamurinda iki ?

Prof Shyaka : Namuha gukunda abantu, kugira ibakwe no kureba kure ; ; nkamurinda ubwirasi n’amatiku, urwango n’ubunebwe.

IGIHE : Ni ikihe kintu wakoze uri umwana gisekeje utazigera wibagirwa ?

Prof Shyaka : Ubwana bwanjye ni filime ; sinabona icyo mpitamo.

IGIHE : Ni ikihe kintu wagezeho ubwawe ujya wibuka ukumva kiragushimishije cyane ?

Prof Shyaka : Nigize uko ndi.

IGIHE : Mushatse kuvuga iki ?

Prof Shyaka : Ibintu mpa agaciro mbikomeraho nta mususu.

IGIHE : Ni akahe kazi wakoze wakunze cyane ?

Prof Shyaka : Ni ukubwira abanyamahanga u Rwanda uko ruri, ukabona babyakiriye uko bimeze !

IGIHE : Iyo urebye politiki y’u Rwanda unezezwa n’iki ?

Prof Shyaka : Nezezwa n’ubushake bukomeye bwo gusana umuryango nyarwanda ndetse no kubona hari umuhate ugamije iterambere.

Prof. Shyaka Anastase

IGIHE : Ubona ute amadini n’amatorero byo mu Rwanda ?

Prof Shyaka : Ni menshi cyane.

IGIHE : Ni uwuhe muhanzi ukunda mu Rwanda ?

Prof Shyaka : Nkunda indirimbo zituje zirimo inyigisho n’inganzo. Nk’iza Rugamba, Kayirebwa na Nkurunziza.

IGIHE : Mu buzima bwa buri munsi, ni iki gishobora gutuma wishima kandi wari ubabaye ?

Prof Shyaka : Kubona abandi bishimye.

IGIHE : Ni iki gishobora gutuma urara udasinziriye ?

Prof Shyaka : Ntibikunze kumbaho.

IGIHE : Ninde muntu ukunze cyane kurusha abandi muri iyi minsi ?

Prof Shyaka : Nkunda benshi.

IGIHE : Ku bwawe, urukundo ni iki ?

Prof Shyaka : Ni urugwiro, ni ukwishimira mugenzi wawe, ni ubumuntu no kuba umuntu.

IGIHE : Wumva uzakora uwuhe murimo igihe uzaba utakiri mu mirimo nk’iyi ?

Prof Shyaka : Nzakomeza gukora ubushakashatsi no kwigisha.

IGIHE : Ni ikihe gitabo uherutse gusoma  ?

Prof Shyaka : Mperutse gusoma icyitwa “The Next hundred years”.

IGIHE : Ni uruhe rugingo ukunda ku mubiri wawe kurusha izindi ?

Prof Shyaka : Sinabitekerejeho.

IGIHE : Ni uwuhe muntu ubona nk’intwari, wumva wakwigana bibaye ngombwa ?

Prof Shyaka : Martin Luther King.

IGIHE : Ni irihe funguro ukunda kurusha ayandi ? Naho ikinyobwa kikugwa neza ?

Prof Shyaka : Nkunda imbuto n’imboga ; kunywa byo biterwa n’icyo abo turi kumwe barimo kunywa, ariko ubusanzwe nkunda divayi.

IGIHE : Urumva umeze ute muri aka kanya ?

Prof Shyaka : Nejejwe n’uko mufite ibibazo bityaye.

IGIHE : Uratekereza iki ku byo umaze kubazwa ?

Prof Shyaka : Birimo ubuhanga cyane.

IGIHE.com : Murakoze cyane.

Prof Shyaka : Murakoze cyane namwe.

Iyi nkuru yasohotse mu Kinyamakuru IGIHE nimero 5 cyo kuva tariki 20 - 26 Werurwe 2012.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO