Ibuka irashima ubuvuzi bw’ingabo ku bacitse ku icumu

Ibuka irashima ubuvuzi bw’ingabo ku bacitse ku icumu


Yanditswe kuya 27-11-2012 - Saa 06:35' na Karirima A. Ngarambe

Perezida w’Umuryango Ibuka arashima ubuvuzi ingabo z’u Rwanda zikora zivura abacitse ku icumu rya Jenoside yakorewe Abatutsi muri Mata mu mwaka w’1994, akavuga ko ibi bifasha mu kuzamura imibereho yabo.

Ibi Perezida wa Ibuka Dr Dusingizemungu Jean Pierre yabitangaje mu kiganiro yagiranye n’umunyamakuru wa IGIHE ukorera mu Bubirigi, ubwo yari mu ruzinduko muri iki gihugu.

Muri iki kiganiro, haganiriwe ku ndishyizi zahabwa abacitse ku icumu rya Jenoside yakorewe Abatutsi, kubuvuzi ingabo z’u Rwanda zikora mu turere dutandukanye bavura indwara zitandukanye abacitse ku icumu basigiwe na jenoside, n’uko Ibuka ihagaze ubu.

Dore ikiganiro cyose :

IGIHE : Turabashimiye kuba mwemeye kuganira na IGIHE. Hari abaganga bo mu Ngabo z’u Rwanda bavura abacitse ku icumu rya Jenoside yakorewe Abatutsi, ubwo buvuzi bukorwa gute ?

Dusingizemungu : Hari ikibazo cyariho kirebana n’uburwayi bwagiye bukomoka ku ngaruka cyangwa ibikomere bya jenoside, hakaba rero hari abacitse ku icumu benshi bagendana ubwo burwayi, mu gihe gishize rero umuryango Ibuka, ndetse n’abandi dufatanya gukora ubuvugizi twagiye tugaragaza ikibazo cy’ubwo burwayi uko giteye, ubu rero tukaba twishimira yuko Ingabo z’Igihugu arizo ziri ku isonga mu gutanga igisubizo kandi bagatanga igisubizo mu buryo burambye bukozwe neza.

Uko bikorwa rero binyuzwa muri gahunda y’ibitaro bya Gisirikare by’u Rwanda by’i Kanombe bafatanyije na FARG mu byerekeranye n’ibikoresho, habanje kubaho ibarura ry’abacitse ku icumu bafite ibibazo by’uburwayi bukomeye batewe na jenoside, iryo barura rikaba ryaragiye rigaragaza imibare muri buri karere uko iteye n’uburwayi buhari, na Minisiteri y’Ubuzima ikaba yarabigizemo uruhare kugirango iryo barura rikorwe ,kimwe n’indi miryango inyuranye ihuriye muri Ibuka.

Nka Ibuka rero dusanga ari igikorwa gikwiye kumenyekana abantu bakamenya ko Ingabo z’u Rwanda uretse no kuba zarahagaritse jenoside zikomeje no kurinda ubusugire bw’igihugu no gufasha abenegihugu mu buzima busanzwe bwa buri munsi.

IGIHE : Ese mwatubwira aho umuryango IBUKA ugeze kuva mwatangira kuyiyobora, naho mukura umutungo utuma mukora ubushakashatsi n’ibindi bikorwa mukora ?

Dusingizemungu : Mpereye kukibazo cy’uko umuryango Ibuka uhagaze ubu, twavuga ko uhagaze neza kuko icyo twihatira muri iki gihe ni ugukora ubuvugizi bushingiye kubushakashatsi tuba twakoze bigatuma rero nabo dukorera ubwo buvugizi bubagiria akamaro kuko buba bushingiye ku bushakashatsi bufatika nabo tubwira batwumva vuba, nkaba mbona rero ari ikintu kiza turimo kugeraho, twihatira no kugirana ubufatanye n’andi mashyirahamwe yibumbiye mu muryango wacu Ibuka kugirango tujye tugira imyumvire imwe kubibazo ibi n’ibi. Bigatuma hari byinshi bigenda bibonerwa ibisubizo ukurikije ubuvugizi tuba twakoze.

Kukibazo kirebana n’umutungo mwabajije byo turacyafite ibibazo byawo ariko turimo turagenda dukora imishinga dushyikiriza abantu batandukanye.

IGIHE : Ese birya bikorwa by’abaganga b’Abasirikare nibo ubwabo byaturutseho cyangwa Ibuka ibifitemo uruhare ?

Dusingizemungu : Ubuvuzi bw’abacitse ku icumu n’ibibazo twakozeho ubuvugizi kenshi ubu tukaba twishimira y’uko ingabo z’igihugu zabwumvise vuba kandi bugafatirwa ingamba mu buryo bwihuse twishimiye, ibi bigakomeza kuduha ingufu kugirango n’ibindi bibazo biriho nabyo bikorerwe neza ubushakashatsi n’ubuvugizi buzatanga umusaruro mwiza twifuza.

IGIHE : Mwatubwira muri make ibyavuye mu nama muherutsemo kubyerekeranye n’indishyi ku barokotse Jenoside yakorewe Abatutsi ?

Dusingizemungu : Twakoze inama kubyerekeranye n’indishyi tugirango tuganire n’abahagarariye imiryango inyuranye yibumbiye muri Ibuka, ngo tumenye icyo indishyi (réparation) bivuze, tumenye uburenganzira bwacu kuri izo ndishyi, duhane ibitekerezo twageza kuri Leta ndetse no ku bandi kugirango ubwo burenganzira bw’indishyi buboneke, twumvikanye ku bitekerezo by’ingenzi dushingiraho dusobanurira abantu batandukanye kugirango icyo kibazo kindishyi nacyo kive munzira kuko hari ibintu byinshi byagiye bikorwa mu rwego rwo gufasha abacitse ku icumu ariko twumva ko nacyo cyakorwaho.

Turifuza ko ubutaha hashyirwa ku buryo bugaragara ibitekerezo by’uko indishyi zatangwa abantu bakaba bakwiga uburyo zatangwa n’aho zava, twanumvikanye ko n’igihugu cyacu gishobora gushyiraho itsinda rigenewe ibirebana n’icyo kibazo uko cyakemurwa nta bindi bibazo bivutse, Abanyarwanda bingeri zose bakabiganiraho, tukareba kandi uburyo umuryango mpuzamahanga nawo (ONU) wagira icyo ukora kuri icyo kibazo, kuko nawo ufitemo uruhare. Hakaba hashyirwaho nk’igihe runaka abantu bihaye kugirango bagere kuri izo nshingano.

IGHE : Murakoze.

Dusingizemungu : Namwe murakoze !

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO