Igihembo mpuzamahanga cy’amahoro cyahawe Yolanda Mukagasana

Igihembo mpuzamahanga cy’amahoro cyahawe Yolanda Mukagasana


Yanditswe kuya 16-01-2013 - Saa 15:53' na Karirima A. Ngarambe

Mu kwezi k’Ukuboza 2012 mu gihugu cy’u Butaliyani, umunyarwanda w’umwanditsi w’ibitabo Yolanda Mukagasana yahawe igihembo cyitwa « Prix international de la Paix », we utangaza ko igihembo yahawe atari icye wenyine ahubwo cyahawe igihugu cyose.

IGIHE twegereye Yolanda Mukagasana, atuganiriza kuri icyo gihembo, ku bindi yahawe ndetse no ku gitabo yanditse bwa mbere yise « La mort ne veut pas de moi » cyahinduwe mu Gifarama, Igitaliyani, ikidanuwa, iki Norvegien, igi Turc, igi Portugais, ndetse n’Igiheburayo kivugwa mu gihugu cya Israël.

Ikiganiro kirambuye

IGIHE : Mwatwibwira

Mukagasana : Nitwa Yolanda Mukagasana, ndi umunyarwandakazi, nkaba naracitse ku icumu rya Jenoside yakorewe Abatutsi mu 1994, ariho bishe umuryango wanjye wose. Ntuye mu Rwanda, nkora muri Komisiyo y’igihugu ishinzwe kurwanya Jenoside, nkaba ndi umujyanama w’Umunyamabanga nshingwabikorwa mu buvugizi bw’abacitse ku icumu. Ariko mu bihe bitari iby’akazi nkomeza no gukora ibyo nakoraga ngituye mu Burayi, nko gukorana na société civile yo hanze mu mahanga mu kurwanya ingengabitekerezo ya Jenoside. Nakomeje no kwandika ibitabo, no gufasha abanyamahanga bamwe banyuraho basura u Rwanda, baza bansanga ngo mbayobore, bibonere aho u Rwanda rwikuye n’aho rwigejeje nyuma ya Jenoside, nkuko mpora ndubaratira.

IGIHE : Igihembo mpuzamahanga cy’amahoro « Prix international de la Paix » mwabonye mu minsi ishize mwacyakiriye mute ?

Mukagasana : Igihembo nacyakiriye neza, kuko uko mbyumva ni uko icyo gihembo atari icyanjye gusa, ahubwo ni icy’igihugu cyacu. Ngira ngo mwese muzi ukuntu u Rwanda rudahwema guharanira amahoro ku Isi, nyamara rwaravuye habi hashoboka. Hari abibwira ko iyo wagize amakuba akomeye nk’ayo twaciyemo ya Jenoside, nta yandi marangamutima wagira uretse urwango. Nyamara si ko byangendekeye, nibaza ko iyo ntaza guhura n’urwango rukabije nk’urwo nabonye, ntari kumenya indangagaciro z’urukundo.

IGIHE : Iki gihembo kigenerwa bande ? Gitangwa nande ?

Mukagasana : Ni ukuri abo kigenerwa nanjye simbazi ! Sinzi n’uko bigenda ngo babahitemo. Ahubwo icyo nzi gusa nabonye kuri internet, ni uko muri Afurika cyahawe Nelson Mandela na Kwame Nkrumah. Ariko bambwiye ko jye impamvu nakibonye ari imirimo igiye inyuranye nakoze nyuma ya Jenoside, kwaba kurwanira ko Jenoside imenyekana kugira ngo itazasubira ukundi haba mu Rwanda cyangwa se mu mahanga. Kurwanya abayihakana mu bihugu byose nagiye njyamo, cyane cyane ibyo muri Afurika, mu Burayi no muri Aziya, no kurwanya ingengabitekerezo yayo. Haba se inama nagiye mvugamo mu nzego zinyuranye, zaba iza Leta cyangwa amashyirahamwe, ndetse n’ibitabo nagiye nandika haba iby’ubuhamya kuri Jenoside cyangwa se n’ubushakashatsi. Muri byo bitabo kandi, bitatu bikaba byarasohotse mu Gitaliyani, cyane cyane icyo mperutse kwandikira urubyiruko.

Igihembo cyahawe Yolanda

IGIHE : Kuba waragihawe bifite iyihe nyungu kuri wowe cyangwa ku gihugu cyawe ?

Mukagasana : Kuba narakibonye, ikintu cya mbere cyanshimishije ni uko ibyo nakoze byakiriwe neza n’ibindi biremwa, bikabiha agaciro nifuje guha ibyo bikorwa. Sinabikoreye igihembo cy’amafaranga kuko ari yo ashyirwa imbere cyane. Nshobora kwibeshya ariko nsanga ahubwo cyaba gifitiye inyungu igihugu cyacu.

IGIHE : Mu bihe byashize wanditse ibitabo n’inyandiko nyinshi, muri iyi minsi haba hari umushinga wundi wo kwandika uteganya ?

Mukagasana : Sinjya ndekera aho, mpora nandika. Ubu ndangije igitabo ndimo nkosora kugira ngo gisohoke. Nacyanditse kuri Loni (ONU), nagitangiye mu 2001, ariko kubera ibibazo binyuranye nagiye ngira birimo ko n’amazu asohora ibitabo yose nakoranye na yo mbere, yatinye kugisohora kuko mvugamo ukuri kwambaye ubusa kuri Loni nk’igikoresho cya ba Mpatsibihugu. Ubu noneho byarigaragaje cyane, nkabona ari igihe cyo kugisohora nimara kurangiza utuntu duke ngikoraho, nk’ibibazo bya Loni muri iyi ntambara ya Congo.

IGIHE : Nyuma ya Jenoside yakorewe Abatutsi mu 1994, watuye mu Burayi igihe kinini, ubu urabarizwa mu Rwanda ; watubwira uko ubona u Rwanda rw’uyu munsi ?

Mukagasana : U Rwanda rw’ubu ruteye ishema ku Banyarwanda, ruteye kurwifuza ku banyamahanga, kuko ruteye ishyari abatarukunda, rugatera ubwuzu abarukunda. Ntawabona aho twavuye ngo yumve ko ubu twaba tugeze aho turi ubu kandi dufite n’icyerekezo kizima. Uwo kandi ni umuhate w’Abanyarwanda kuko dukeneye kwihesha agaciro, bishingiye ku rukundo dukunda urwatubyaye. Mvuze u Rwanda sinahagarara kuko ndukunda byimazeyo. Numva ari we mwana nsigaranye, kandi rukaba n’umubyeyi. Nkeka ntafite u Rwanda ntabaho, kuko ntacyo byaba bikimariye. Ni byo koko, namaze imyaka cumi n’itandatu mu Bubiligi kandi ngenda Isi, ariko mbona nari naravuye mu Rwanda umutima wanjye ukarusigaramo. Nabaye mu Bubiligi, nkabaho mu kinyarwanda, narose mu Kinyarwanda, ngatekereza mu Kinyarwanda. Inshuti zose kandi nagize zikunda u Rwanda.

Sinzi uko naruvuga keretse nduvuze nk’umwari uvuga uwo akunda, kandi bazabana akaramata. Ntitwavuga kandi u Rwanda tutavuze ubuyobozi rufite, ari na bwo bwaruhaye isura rufite ubu. Aha ngashimira abagize uruhare bose muri iyo politiki nzima yatugiriye iguhugu Ikirezi, nkeka ko n’ubu tutaramenya ko cyera, kandi ari cyo tuzaraga abana bacu bavuka ubu.

Icyo nemeza kandi ni uko nta Jenoside igishoboka mu Rwanda. Abanyarwanda barababajwe cyane ku buryo batakwibeshya basubira mu byabahekuye. Sinakwihandagaza ngo nemeze ko ntababa bagifite ingangabitekerezo ya Jenoside. Abakiyirimo ni abarwayi tugomba kwitaho, tukavura, kuko ibyaye ikiboze ikirigata. Na ho abanzi bo bakiyidukururamo, tuzabarwanya kandi tudafashe intwaro. Tuzarwanisha ibikorwa byiza n’urukundo rw’igihugu cyacu, ni zo ntwaro nyazo z’amahoro. Ngira ngo kandi muzi mwese ko u Rwanda rwatangiye kuyaharanira kuva rwayavutswa na Jenoside. Aho ingabo zacu ziri hose zishakisha amahoro murahazi. No kumenya indangagaciro z’amahoro, umenya twarabyigishijwe na Jenoside.

IGIHE : Nk’umutegarugori wavuga iki kuri Nyakwigendera Inyumba Aloyiziya niba waramumenye cyangwa waramenye ibikorwa bye ?

Mukagasana : Nta munyarwanda n’umwe utazi ibikorwa bya Inyumba, abagore by’umwihariko, ndetse no hanze birazwi. Kubura Inyumba byahindura umuntu ikiragi. Kuri jye Inyumba yari umuvandimwe. Muri make nongeye gupfusha. Sinabigereranya n’agahinda k’uwamubyaye, uwamushatse cyangwa se n’abana yasize birumvikana. Ndetse nta n’urugero ku gihugu yakoreye kikaba cyarabuze intwari kandi ingirakamaro. Inyumba Mudatenguha naruhuke yarakoze. Inyumba yahoraga yiteguye, nkeka n’urupfu yararwiteguye. Aho mwasezeraniraga ni ho mwahuriraga. Adusigiye indangagaciro nyinshi z’ubumuntu, ubutwari, urukundo. Kunsaba kuvuga Inyumba, ndumva ari nko kungira ikiragi, kuko uko umutima wanjye umutekereza si ko mbashije kumuvuga.

IGIHE : Ku byerekeranye no gusiga amateka y’akarengane kabayeho mu Rwanda, ikaba ari imwe mu ntambara mwarwaniye, ni iki wabwira urubyiruko n’abandi bazasoma iyi nkuru ?

Mukagasana : Nkunda urubyiruko cyane, kuko iyo ndubonye ndugereranya iteka n’uko abana banjye baba bangana uyu munsi. Iteka rumpa icyizere cy’ejo hazaza. Ni rwo ruzavamo abayobozi b’ejo, ni rwo tuzakesha u Rwanda rw’ejo ruzira amacakubiri. Aho umwana azarererwa neza, agakura ari umwana k’abandi bose, akazaba umuntu mukuru usobanutse dushobora kwizera. Icyo rero narubwira ni ikintu cyoroshye cyane. Muri bo, abagize amahirwe ntibabonye Jenoside ; nibayirinde. Abandi, baravuga ngo ikidutanya ni cyo gito kurusha ikiduhuza. Jye nkavuga ngo ibidutandukanya ni byo bukire dufite. Kuko iyo hari icyo urusha mugenzi wawe muragurana, ukamuha icyo akeneye, na we akaguha icyo ukeneye. Urubyiruko niruhagurukire kubaka neza igihugu ruzasigarana tutakiriho.

IGIHE : Ese kiriya gihembo ni cyo cya mbere wahawe mu byo wakoze ?

Mukagasana : Oya. Nahawe ibihembo byinshi ndetse n’imidari mbere ya kiriya kuva mu 1998 nkimara gusohora igitabo cya mbere.

IGIHE : Mwatubwira se ibyo bihembo mwabonye ?

Mukagasana : Ibyo nibuka kandi numva kuri jye byarandutiraga ibindi ni ibi :

1998 : Prix Alexander Langer

2000 : Igihembo nahawe na Collège européen muri Université ya Iena mu Budage.

2001 : Igihembo cy’uwataye (gutara) amakuru neza nk’umunyamakuru nahawe na Mairie ya Roma, ifatanije n’ishyirahamwe ryitwa Archivio Disarmo mu Butaliyani.

2003 : Nabonye igihembo cyitwa « Mention d’honneur » (du Prix UNESCO de l’éducation pour la Paix.) Muri uwo mwaka kandi amashyirahamwe y’abagore ba Bruxelles bampaye na bo igihembo cyitwa ngo « Prix de la femme du 21 siècle pour la résistance » mu kwezi k’Ukuboza.

2008 : Nahawe igihembo n’Abayahudi bo muri Amerika i Washington

Kuva muri 2010 maze gutererwa ibiti by’ubutwari mu mijyi itatu mu Butaliyani ari yo Ceveso, Milano na Genova ngo kubera kurwanya ingengabitekerezo ya Jenoside mu Burayi. Banampaye ubwenegihugu bw’icyubahiro bw’u Butaliyani nk’umuturage wa Genova mu mwaka ushize.

IGIHE : Murakoze kuduha umwanya wanyu.

Yolanda Mukagasana : Namwe murakoze.

Yolanda hagati y'umukuru w'abayislamu muri Toscana na Mayor wa Pistoia
Yolanda n'uhagarariye Dalaï Lama mu Butaliyani n'umugore we
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO