Twaganiriye na Samusuri

Twaganiriye na Samusuri


Yanditswe kuya 24-05-2012 - Saa 16:44' na Nyampeta Abdu

Kalisa Ernest uzwi ku izina rya Samusuri kubera gukina filimi yitwa ’Ntawe umenya aho bwira ageze’, ni umwe mu bakinnyi kandi b’abanyarwenya ukina filimi mu Rwanda, twarambwegereye maze atubwira byinshi kuri we.

Mu kiganiro yagiranye n’umunyamakuru wa IGIHE Olivier Muhirwa, Samusuri yamubwiye ibirebana n’ubuzima bwe bwite, icyo ahugiyemo muri iyi minsi, ndetse n’ibyo ateganya gukora.

• Kera intara zikiri cumi n’ebyiri, najya mvuga nti : « Buri Ntara ngomba kuyigiramo umwana ».

• Mbere na mbere nkunda umuntu ariko nkanga umuntu.

• Mukarujanga uretse kuba duhurira muri filimi ubundi nta kindi kintu duhuriraho.

Dore uko ikiganiro cyari giteye :

IGIHE: Watangira wibwira abakunzi ba IGIHE.com uwo uri we muri make?

SAMUSURI: Nitwa Kalisa Ernest, ayo ni amazina asanzwe, izina ry’ubuhanzi nitwa Samusuri.

IGIHE: Hanyuma se kwitwa iryo zina Samusuri waryiswe na nde?

SAMUSURI: Iryo zina naryiswe n’umuhanzi wa filimi. Filime ya mbere twatangiye gukina yitwa:”Ntawumenya aho bwira ageze”. Habyarimana Charles ngira ngo niwe wari wayikoze. Nyuma yaho tuza gukina n’izindi filimi nkomeza kugenda nitwa iryo zina gutyo. Igihe kiragera rero abantu bararimenyera, numva nanjye ntacyo ritwaye ndarikomeza.

IGIHE: Umaze guhura n’abakunzi bawe benshi. Ese iyo abakunzi bawe bumvise Samusuri bumva ari umuntu umeze gute?

SAMUSURI: Ubundi nkurikije icyo abo duhura, bagenda bambwira bati:” Samusuri, uri umuntu ukina ibintu bigaragaza ko ushobora kuba uri umuntu mwiza, umuntu ugira impuhwe”, ibintu nk’ibyo. Ariko bakagira amatsiko yo kwibaza niba ariko no mu buzima busamzwe ariko nteye, rimwe na rimwe bikananira gusubiza kuko ntawimenya amenywa n’abandi.

IGIHE: Ubundi mu buzima busanzwe uteye ute,?ukunda iki?, utwibwire mbega nk’umuntu utakuzi abashe kukumenya.

SAMUSURI: Mbere na mbere nkunda umuntu ariko nkanga umuntu.

IGIHE:Ubundi uri umugabo ufite umugore?

SAMUSURI: Eeeh… ndi umugabo ufite umugore n’abana babiri.

IGIHE: Ese mu by’ukuri waba ufite umugore umwe cyangwa barenze umwe?

SAMUSURI: Oya nkurikije wenda mbere y’uko nshaka, nari mfite abagore benshi, kuko bamwe nagiye mbabyaza abana, ariko ubungubu mfite umugore umwe.

IGIHE: Ufite abana bangahe batari muri uwo mubare?

SAMUSURI: Abo nemeza neza ubu ni batanu, hari undi rero bakomeje kunyima ariko nawe ndakeka ko ashobora kuba ari uwanjye byanze bikunze, ndacyamuburana ningira amahirwe nzamubona babe babaye batandatu.

IGIHE: Uvuze ko ukiburana umwana wawe, hanyuma se umugore mwashakanye, mumaze kubyarana abana bangahe ?

SAMUSURI: Abana twabyaranye ni babiri

IGIHE: Ese mu myaka, ufite ingahe?

SAMUSURI: Mfite imyaka ihagije, ubu maze kugeza ku myaka mirongo itatu n’itanu izuzura neza mu kwa cumi.

IGIHE: Ubundi mu buzima busanzwe uretse gukina ariya ma filimi ukora iki?

SAMUSURI: Mu buzima busanzwe, nkora mu makwe, nkunda kuba umushyushabirori, kuvuga amazina y’inka, gusabira abantu cyangwa gusaba kubasabwa, ibintu nk’ibyo. Ubu rero ikindi ndimogukora, ndimo ndakora indirimbo ku buryo uyu mwaka uzashira maze gukora album. N’ubwo amashusho azaba atararangira neza ariko ndumva hari aho bizaba bigeze.

IGIHE: Hanyuma se ubuhanzi bwakujemo gute bwo?

SAMUSURI: Ubuhanzi rero navuga ko ari nk’impano navukanye, kubera ko nabitangiye nkiri umwana cyane, njya mu Basaveri ngira ngo mbone ukuntu nihimbira utuntu, mbone aho ndusohorera. Igihe kiragera njya mu ba Pantekoti kugira ngo ntangire nige gitari, gucuranga no kumenya kuririmba neza. Bikomeza bityo biza buhoro buhoro nyuma y’aho nza kwivumburamo indi mpano yo gukina filimi bitewe n’abantu twaganiraga bakumva hari icyo nashobora bityo biza buhoro buhoro. Nta mashuri nigeze mbyigamo ibyongibyo.

IGIHE: None nyuma yo gucukumbura izo mpano zawe wasanze ushoboye gukina filimi, cyangwa wasanze ushoboye kuririmba ?

SAMUSURI: Nasanze byose mbishoboye, kuko kugeza ubungubu indirimbo maze gukora uyumvise yumva atari indirimbo yo kwigirwaho.

IGIHE: Ni nk’iyihe?

SAMUSURI: Hari indirimbo abantu bazi benshi muri filimi yitwa « Mukarujanga ».

IGIHE: Hanyuma duheruka ukina mu Basare ubu uhugiye kuki ?

SAMUSURI : Ubungubu ndiho ndakora album, izitwa « Mukarujanga » , izaba igizwe n’indirimbo umunani, nzayisohora maze gukora amashusho yayo zose. Ubu rero ibyo nibyo mpugiyemo ubundi ibindi byo ni igihe umuntu aba ari mu ma « répétitions » ya filimi tuzakina mu gihe kiri imbere, kuva natangira gukina si ndava mu Basare ngo nkine ahandi hantu.

IGIHE : Ariko Mukarujanga ubundi ko umuririmba ari muri abo mwabyaranye batanu watubwiye, n’umwe wa gatandatu murimo kuburana?

SAMUSURI : Hmhm… Mukarujanga uretse kuba duhurira muri filimi ubundi nta kindi kintu duhuriraho.

IGIHE : Nta rukundo rw’ibanga mwaba mufitanye?

SAMUSURI: Oya ntarwo. Kuririmba iriya ndirimbo kandi ngakomeza no kuyiririmba ikaba yaraturutse muri filimi ni urugero naguha ni nk’uko Céline Dion yaririmbe indirimbo ya “Titanic” igakundwa kurusha uko filimi yakunzwe.

IGIHE: Tugarutse mu buzima bwawe bwite watubwiye y’uko wabyaye abana bagera kuri batanu n’uwa gatandatu urimo kuburana, kugeza ubungubu se umugore mubana azi ko ufite abo bana barenze intoki z’ikiganza kimwe?

SAMUSURI: Eehh, nawe ubwe n’umwe muri abo nari narabyaje abo bana, urumva nawe ubwe yaje afite umwana w’imyaka ine, ni ukuvuga rero nta kibazo afite kuko bose arabazi. Iyo ari nko ku munsi mukuru, nkoranya umuryango, bose bakaza.

IGIHE : Muri abo bana batanu n’umwe uri kuburana, wababyaranye n’abagore bangahe ?

SAMUSURI : Ukuyeho babiri bavuka ku mugore umwe ariwe mfite, abandi bose buri mwana afite nyina burya.

IGIHE: Iyo uhuye na banyina kuri ubu bigenda gute?

SAMUSURI: Nyina w’umwana umwe muri abo? Bamwe bagiye bashaka abagabo abandi n’abantu bari aho nta kibazo bafite runaka, mfa kwita ku bana banjye nta kindi.

IGIHE: Ba bana wabatse ba nyina?

SAMUSURI: Hnhnm. Ntabwo igihe cyari cyagera cyo kuba bava kuri ba nyina uretse ko na ba nyina baba babakomeyeho burya nta mubyeyi wifuza ko umwana we yarerwa n’undi mubyeyi, kandi nawe yumva ntacyo bimutwaye cyane cyane ko ntawe natereranye, niyo mpamvu mburana n’uwo wundi.

IGIHE: None ubu iyo ugeze kwa Samusuri uhasanga abana bangahe?

SAMUSURI: Iyo ugeze kwa Samusuri uhasanga abana babiri na nyina.

IGIHE: Na nyina umwe cyangwa….?

SAMUSURI: Na nyina umwe.

IGIHE: Abo bandi warabibagiwe cyangwa uracyakomeza ukinyabyayo?

SAMUSURI: Hmhm. Kandi ndakubwira ko najya kuburana uwo wa gatandatu?

IGIHE: Ndavuga abagore…!

SAMUSURI: Urumva ra..! Niba naravuze nti muri aba bagore bangahe ndakuramo uyu nguyu abe ariwe nzana n’ukuvuga ko abandi bose ntacyo tuba dupanga.

IGIHE: Warabibagiwe?

SAMUSURI: Ntabwo ari kubibagirwa. Ni ukuvuga ko nta kindi, tuvuge yenda nk’izindi gahunda zijyanye n’imibonano mpuzabitsina ntazo tugirama.

IGIHE: Izindi gahunda mugirana uretse izimibonano ni izihe?

SAMUSURI: Ni izo kwita ku bana twabyaye, ni ukuvuga umwana yarwaye, umwana afite ikibazo agomba kwiga, ni ibyo nta kindi.

IGIHE: Abantu benshi bakuzi muri ziriya filimi mwajya mukina, hanyuma se indi filimi nyuma ya ziriya wakinnyemo hari iyaba ihari? cyangwa ntayihari?

SAMUSURI: Oya, nta filimi yo hanze ya ziriya nigeze nkina, si uko batampamagara, ahubwo ni uko mba ngira ngo filimi igire izina imenyerwe aho. Bavuge bati iriya filimi kuba irimo Samusuri ni iyabo koko. Ariko hakabaho, mbese ndi nk’ikimenyetso cya filimi yacu.

Ni ukuvuga ngo filimi ntarimo ntabwo iba ari iy’Abasare kabona niyo wasangamo abakinnyi bose b’Abasare.

IGIHE: Mu buzima bwawe ni iki cyagusekeje ?

SAMUSURI : Ikintu nakoze kikansetsa ni filimi nakinnye. Hanyuma ikindi kintu tuvuge kitantuguye, kera intara zikiri cumi n’ebyiri, najyaga mvuga nti buri ntara ngomba kuyigiramo umwana, niyo mateka nashakaga gukora yatuma menyekana, noneho nkagira n’abuzukuru benshi, nkumva ari amateka ndiho nubaka, nyuma y’aho ariko sinari nzi ko nzaba umukinnyi wa filimi ngo umuntu umenyekana. Uwo niwo wari umuhigo wo kugira amashami mu gihugu.

IGIHE: None bazihinduye ugeze kuri kimwe cya kabiri, wa muhigo wawe se waba ukiwukomeje cyangwa warawuretse ?

SAMUSURI: Ntabwo nkiwukomeje ibihe byarahindutse bimeze nabi.

IGIHE: Murakoze ku kiganiro ugiranye na IGIHE.

SAMUSURI: Nawe urakoze cyane, kandi nshimiye IGIHE.com ihora itugaragariza ko ifite umuhate wo guteza abahanzi imbere, no kubazamura muburyo bw’ibitekerezo runaka.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO