Amadini yo mu Rwanda ntavuga rumwe ku gisobanuro cy’Intumwa

Yanditswe na

Kayitare Jean Paul

Kuya 11 Werurwe 2015 saa 06:44
Yasuwe :
0 0

Intumwa (Apostle) ni iki? Ese mu Rwanda hari intumwa? Amatorero atandukanye mu Rwanda agira abakirisitu bafite inshingano zitandukanye. Hashingiwe ku myemerere n’imiyoborere, hari amadini n’amatorero bigira abakozi b’Imana bitwa abigisha, abavugabutumwa, abashumba, abahanuzi, n’Intumwa.

Kiliziya Gatolika yo igaragaza ko abo bose baba ari abepisikopi, kuko intumwa z’imana zabaye 12 ziyongeraho babiri basimbuye bagenzi babo nyuma.

Ijambo “Intumwa” mu Rwand rimaze gusakara, by’umwihariko umuntu wese ushinze itorero batangira kumwita Intumwa.

Intumwa yari umuhamya wavutse ubwa kabiri muri Yezu/Yesu Kirisitu, akaza kumenyekanisha itorero no kuvuga ubutumwa bwiza ku Isi, akarenga imbibi za Isiraheli (zatoranyijwe na Yesu zikomeza umurimo nyuma ye amaze gusubira mu ijuru nk’uko abakirisitu babyemera).

Mu butumwa bwiza bwa Matayo 10:2-4 herekana amazina y’ intumwa. Naho muri Matayo 10:6-13 hagaragaza ko inshingano z’intumwa ari ukuzana intama zazimiye z’Umuryango wa Isiraheli, gukiza abarwayi, kuzura abapfuye, gukiza ababembe, kwirukana abadayimoni, ...

Ijambo ry’Imana dusoma mu butumwa bwiza bwa Luka 6:13 haragira hati “Ijoro rikaye ahamagara abigishwa be, atoranyamo cumi na babiri abita “Intumwa”.

Ibyanditswe dusoma mu gitabi cy’Iyakozwe n’Intumwa 1:26 haravuga ngo “Barafindafinda ubufindo bufata Matiyasi. Nuko abaranwa n’intumwa cumi n’imwe...”

Intumwa z’ibinyoma na zo zabayeho nk’uko Ijambo ry’Imana ribivuga. Nyamara bamwe mu Banyarwanda, usanga bavuga ko abamaze gushinga amatorero bose biyita intumwa.

Mu rwandiko rwa 2 rw’Abakorinto 11:13 hagaragaza neza ko hari intumwa z’ibinyoma bigaragaza nk’abakozi barangwa no kuriganya, bakigira intumwa zatumwe na Kirisitu.

Bishop Elissa Habimana uhagarariye itorero “Isoko Imara Inyota” akaba n’umuhanga mu Iyobokamana, yahamirije IGIHE ko mu Rwanda hari Intumwa ariko ko hari n’ababyiyitirira.

Yifashishije urugero, Bishop Elissa yabwiye IGIHE ko ntagushidikanya Paul Gitwaza ari Intumwa kuko avuga ubutumwa akarenga imbibi za Kigali, u Rwanda, ndetse akarenga na Afurika.

Apotre Gitwaza

Yavuze ko kuvuga ubutumwa no kuba Intumwa, ari ibintu bitandukanye. Yibajije ati “Umuntu aracyavugira ubutumwa i Kigali, ntararenga ubutaka bw’u Rwanda, nta n’aho aragera ariko akiyita intumwa?”

“[…] Sawuli yatunguwe n’Umucyo w’Imana, imubwira ko azabatizwa na Ananiya na we iramubwira ngo agiye kubona Sawuli namara kumubona azamubatize.”

Nyuma yo kumubatiza Pawulo, yahise aba Intumwa ava muri Isiraheli ajya mu mahanga yose, atangira kuvuga ubutumwa, ni ko kuvuga ngo Intumwa Pawulo.

Intumwa za Yesu/Yezu zifatwa zite muri Isilamu?

Abayisilamu bemera ko Yezu/Yesu (Îsâ) yari afite Intumwa. Ku rundi ruhande higishwa ko zitwaga Abayisilamu mu gihe zizeraga Imana (Allah). Mu gitabo cya Coran intumwa zitwa Hawâriyyoûn (bisobanura abigishwa).

Coran, Sourate 3 versets 50-54 havuga ko abizera Allah, nk’uko Yezu/Yesu umuhungu wa Mariya yabibwiye Intumwa, ngo bazamukurikira.

Kiliziya Gatolika yemera intumwa zasizwe na Yezu

Musenyeri Smaragde Mbonyintege uyoboye Inama y’Abepiskopi mu Rwanda, avuga ko Bibiliya Ntagatifu igaragaza ko Intumwa ari 12.

Yagize ati “Intumwa zizwi ni 12 zabanye na Yezu Kristo hakiyongeraho Pawulo na Matiyasi wasimbuye Yuda. ”

Mgr. Mbonyintege ahamya ko mu Rwanda kimwe no ku Isi nta muntu uragera ku rwego rwo kwitwa Intumwa.

Akomeza avuga ko ku isi hari abepesikopi, ari bo bafite inshingano zo gukomeza umurimo w’Intumwa ariko ngo na bo ntibasimbura intumwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza