Abasore mu Rwanda bagisha inama kurusha inkumi iyo bagiye gushakana n’ababaruta cyane

Yanditswe na Tombola Felicie
Kuya 21 Gashyantare 2018 saa 04:07
Yasuwe :
0 0

Ni kenshi hajya humvikana abantu bakangaranye kubera abagiye gushakana, umwe arusha undi imyaka myinshi.

Kuri ubu haravugwa Miss w’Akarere ka Rusizi ugiye gushakana n’umugabo umurusha imyaka 24, bamwe bakamwibazaho nubwo nta tegeko yishe.

Mukanzigiye Marie Goretti washinze Umuryango uharanira uburinganire, Ubwuzuzanye n’Ubusugire bw’Umuryango mu Iterambere (GEFAPRODO), ufite impamyabushobozi y’icyiciro cya gatatu cya kaminuza mu bijyane n’uburinganire n’amasomo y’iterambere, ahamya ko abasore bagisha inama cyane iyo bagiye gushakana n’abakobwa barusha imyaka ariko abakobwa ni mbarwa bazigisha mu gushakana n’abagabo babaruta cyane.

Uyu muryango utegamiye kuri leta ukorera mu Karere ka Bugesera na Kicukiro, ufite ibiro byakira abagisha inama.

Aganira na IGIHE, Mukanzigiye yavuze ko iyo hari ubusumbane bugaragarira amaso hagati y’umusore cyangwa inkumi bagiye kurushingana, bitera ipfunwe hagati yabo bombi bikanagera no ku babareba.

Ati “Abashakana buri wese akwiye kureba ko ubusumbane bw’imyaka arutanwa n’umugabo we cyangwa n’umugore we butagaragarira buri wese ubabonye. Ni ikibazo gitera ipfunwe, ugasanga niba abashakanye bashobora kwishimana bakagenda bafatanye agatoki ku kandi kuri bene abo ntabwo bibaho.”

Avuga ko kunyuranya imyaka irenze15 biba bigoye ko abashakanye bombi batekereza mu murongo umwe kuko hari ushobora gufata undi nk’umwana akajya amufatira ibyemezo.

Ati “Ikibazo cy’imyaka irutanwa cyane ni uko niyo bageze mu rugo rwabo umwe atanga igitekerezo mugenzi we ati ‘ni iby’abana’ naho undi yavuga mugenzi we nawe ati ‘ni iby’abasaza’ maze rukabura gica.”

Uyu mubyeyi akomeza avuga ko usanga ab’igitsina gore akenshi bumva ntacyo bivuze kuba bashakana n’abagabo babaruta.

Ati “Si inzi impamvu usanga byarafashwe nk’aho umukobwa ugiye gushakana n’umugabo umubyaye atibaza aho bazahurira, haba mu guteteshanya, mu gufata ibyemezo ndetse no kuzuzanya mu iterambere ry’urugo rwabo.”

Abasore bagisha inama cyane

Mukanzigiye agaragaza ko usanga abasore bagira impungenge cyane gushaka ababaruta, bakagisha inama zituma bafata icyemezo cyo gushakana cyangwa kurekana n’uwo bakundanaga batari mu kigero kimwe.

Yagize ati “Igitandukanye n’ibyo rero usanga nko mu bantu bagera ku 1000 tumaze gukorana nabo muri serivisi zitandukanye za GEFAPRODO, abagera ku 10 % ni abasore batinyuka bakatugisha inama igihe bagiye gushakana n’abakobwa babaruta cyane, abakobwa bo ntabo ndabona."

Ahamya ko kubana kose kwakabaye gushingiye k’urukundo mbere y’ibindi bintu, byaba bitameze bityo hakabaho kubwizanya ukuri.

Mu bibazo ugisha inama abazwa, hasuzumwa niba adakurikiranye ibintu ku buryo yakunda uwo bashakanye no mu gihe atamwandikisha kuri konti cyangwa ku mitungo.

Ubukwe si ubw’umuntu ku giti cye

Iyi nzobere mu by’uburinganire bw’abagabo n’abagore avuga ko ikindi baganiriza ari ukubamenyesha ko ubukwe atari ubw’umusore n’inkumi bagiye kurushinga bonyine, akaba ariyo mpamvu badakwiye kwima amatwi imiryango, kandi ingaruka zo gushakana kwabo zishobora kugera kuri sosiyete nini.

Ati “Abasore n’inkumi ndabasaba kugira umuco wo kugisha inama, ibyo bavuga ku mukunzi wawe byiteho ushishoze n’ubwo wenda hari abivanga mu rukundo bagakabya ariko ntabwo abavandimwe ndetse n’inshuti zawe bose bakugira inama mbi, burya haba hari impamvu nawe wagira ayo makenga."

Mukanzigiye avuga ko igihe cyose umuntu yujuje imyaka y’ubukure aba yemerewe guhitamo uwo ashaka ariko akanareba kure niba koko ayo mahitamo ye ashingiye ku rukundo ruzihanganira ibyo abandi bose babona nk’ikibazo.

Mukanzigiye Marie Goretti washinze Umuryango uharanira uburinganire, Ubwuzuzanye n’Ubusugire bw’Umuryango mu Iterambere (GEFAPRODO)

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza