00:00:00 IGIHE NETWORK KN KINYARWANDA EN ENGLISH FR FRANCAIS

Iby’ingenzi utamenye ku mibonano mpuzabitsina

Yanditswe na Dufitumukiza Salathiel
Kuya 24 Gashyantare 2021 saa 05:16
Yasuwe :
0 0

Umuntu muzima wese akenera umunezero uva mu kuryoherwa n’ubuzima uboneka gusa mu mibonano mpuzabitsina, nubwo habaho kwijijisha kuri bamwe bijyanye n’imyemerere yabo cyangwa hakabaho kwitwararika kubera umuco n’indangagaciro bakirinda kubigaragaza hose.

Nta bisobanuro byimbitse bikenewe kuri iyo ngingo kuko usibye no kuba ari isoko y’umunezero no kororoka kwa muntu, bimwongerera imbaraga zo kuyobora Isi n’ibiyirimo, kandi gutera akabariro bigira akamaro kanini ku buzima n’imibereho ya nyir’ukubikora.

Icyakora nubwo buri wese umubajije yakubwira ko ibijyanye n’icyo gikorwa abizi, umunsi ku munsi havumburwa amakuru mashya ajyanye nacyo ndetse ateye amatsiko cyane.

Uwavuga ko amakuru mashya kuri byo atazanigera abura ntiyaba agiye kure y’ukuri kuko buri wese ahora yifuza kurushaho kubisobanukirwa, bigatuma abashakashatsi bagerageza kugaragaza amakuru yimbitse kuri byo.

Nk’ubu Greatist iherutse gukusanya ingingo zigera kuri 25 zavuzweho mu nyigo zakozwe mu bihe bitandukanye, zibumbatiye amakuru yihariye ajyanye n’imibonano mpuzabitsina.

Icya mbere abashakashatsi berekanye ni uko abageze mu kigero cy’imyaka 20 ari bo bakora imibonano mpuzabitsina kenshi cyane, aho bageza nibura ku nshuro 80 ku mwaka. Ni umubare ugabanyuka cyane iyo bageze mu myaka y’ubusaza kuko bo bayikora inshuro 20 ku mwaka.

Hagaragajwe ko abantu benshi baryoherwa n’icyo gikorwa iyo kibaye mu gihe kiri hagati y’iminota irindwi na 13, ndetse ni na cyo gihe abenshi bifuza ko cyamara.

Abahanga muri ibyo kandi bagaragaje ko imibonano mpuzabitsina cyane cyane ikozwe mu gitondo igira uruhare runini mu kuba umubiri wabyaza ingufu ibyo wariye. Ibyo ariko ntibikwiye gutuma hari abayisimbuza gukora imyitozo ngororamubiri isanzwe.

Icya kane benshi batamenye, ni uko 70% by’abagabo bakunda kureba amashusho y’urukozasoni biherereye cyangwa bari bonyine. Ni mu gihe abagore benshi baba bashaka gufashwa n’undi muntu kugera ku munezero wa nyuma, 33% byabo gusa akaba ari bo bareba amashusho y’urukozasoni.

Na none kandi hari abo usanga bajya kure y’icyo gikorwa bagiye imugongo, kandi ubushakashatsi bwaragaragaje ko muri ibyo bihe imibonano mpuzabitsina igira imimaro itandukanye irimo gutuma umugore ataribwa cyane, gutuma igihe amara imugongo kiba kigufi, kongerera ubushake n’ibindi.

Buri wese agira urugero rwe rw’ubushake ntawe unganya n’undi! Muri rusange inyigo zagaragaje ko nta rugero runaka rw’ubushake umuntu muzima yakabaye afite, ahubwo buri wese agira urugero rwe rushobora kwiyongera cyangwa rukagabanyuka bitewe n’impamvu. Izo mpamvu zirimo ahanini imisemburo, imyaka y’umuntu, ubuzima bwo mu mutwe n’imibereho ye n’ibindi.

Nyuma y’inyigo z’inzobere, byagaragaye ko mu mibereho ya muntu nta kindi kintu gishobora kumuha umunezero udasanzwe kurusha uwo agira iyo aryohewe n’imibonano mpuzabitsina.

Hasobanuwe ko uko imyaka y’umuntu igenda yiyongera [agana mu busaza] ari ko n’ubushake bwo gutera akabariro bugenda bukendera. Abagore ni bo babutakaza mbere cyane ugereranyije n’abagabo.

Hari ibintu byinshi bishobora gutuma umuntu atagira ubushake bwo kwinjira mu gikorwa, uhereye ku misemburo y’umubiri, imiti runaka ari gufata muri iyo minsi n’ibindi. Niba uwo mujyana mu gikorwa ubona abikora bitamuvuye ku mutima, banza ugenzure ikibyihishe inyuma nibiba ngombwa mugane muganga wabihuguriwe.

Niba waragiraga ubushake bwo gutera akabariro ukaba utakibugira nta rirarenga wabusubirana! Byagaragajwe ko gukora siporo, kurya indyo yuzuye ndetse ugasinzira bihagije biri mu bifasha gusubirana ubukaka bwo mu gitanda.

Bitandukanye n’umuco w’abantu runaka utuma baterwa ipfunwe no kwikinisha, ubushakashatsi bugaragaza ko bituma umuntu asobanukirwa uko yitwara mu gihe cyo gutera akabariro, ashingiye ku kunyurwa abigiriyemo n’uko agira iyo abikoranye n’undi muntu.

Si ako kamaro konyine kuko ubushakashatsi bwanemeje ko kwikinisha byongera icyizere umuntu yigirira kuko bituma arushaho kwibona mu isura nziza.
Abarenga kimwe cya kabiri cy’abantu 3.000 bakoreweho inyigo mu Bwongereza bo bagaragaje ko imibonano mpuzabitsina yongera ingufu z’umubano no gushyikirana hagati y’abayikoranye.

Ngo uwariye ni we urya! Wasomye byinshi byagutunguye ariko icyatangaje n’abashakashatsi bakivumbuye ni uko iyo umuntu akoze imibonano mpuzabitsina ari bwo arushaho kumva ayishaka, bikaba intandaro yo kumva agomba kuyikora kenshi.

Birashoboka cyane ko utigeze umenya ko gutera akabariro mbere yo gusinzira byatuma urara aharyana nk’uko benshi babyifurizanya. Inyigo yakozwe mu 2019 yerekanye ko abenshi mu bakora icyo gikorwa mbere yo gusinzira bituma babona ibitotsi vuba kandi bagasinzira neza.

Ibikoresho bizwi nka Sex toys hari ababihaye isura mbi ariko inyigo zitandukanye zagaragaje ko byongerera umuntu amarangamutima, ibyiyumvo bikarushaho kuzamuka mbere yo kujya mu gikorwa nyirizina.

Ku bagore, hagaragajwe ko gukora imibonano mpuzabitsina bizagufasha kugira amatariki yo kujya mu mihango adahindagurika.

Inzobere muri icyo gikorwa zisobanura kandi ko kuba umuntu yakora utuntu tw’imyitozo ngororamubiri mbere yo kucyinjiramo bimwongerera imbaraga akagikorana umurava n’ingufu ku buryo bigenda neza kurushaho.

Uretse gutanga umunezero w’imbonekarimwe, imibonano mpuzabitsina ifasha umubiri kurema abasirikari bawufasha guhashya indwara zimwe na zimwe zirimo ubukonje n’ibicurane.

Ingingo ya 20 yerekanywe ni uko imiterere y’umubiri w’umuntu [ibigaragara inyuma] nayo igira uruhare rukomeye mu migendekere myiza y’igikorwa. Ugaragara ko afite imbaraga, ukora imyitozo ngororamubiri n’ufite umubyibuho uri mu rugero bazabyitwaramo neza ugereranyije n’abatameze batyo.

Hasobanuwe kandi ko umuntu udakora imibonano mpuzabitsina nta bumenyi aba ayifiteho, ibintu abashakashatsi bashingiyeho bemeza ko uko umuntu abikora kenshi ari na ko abigiraho ubumenyi bwimbitse.

Ni mu gihe inyigo yakozwe muri Gicurasi 2020 yo yahamije ko iyo waryohewe n’icyo gikorwa mu ijoro, akazi ukoze mu gitondo ukanoza.

Ibyo biniyongeraho kuba kubyitwaramo neza ukagera ku byishimo bya nyuma bigabanya intekerezo nyinshi mu mutwe, bigatuma ubwonko buruhuka bugakora neza kurushaho.

Ku rundi ruhande ariko si byiza kwinjira muri icyo gikorwa ugamije kugabanya umunaniro mu ntekerezo. Hagaragazwa ko kubijyamo ubishyizeho umutima ari byo bituma urushaho kuryoherwa nabyo.

Ingingo ya 25 ari nayo ya nyuma, ni uko imigendendekere y’igikorwa ijyana n’ubuzima bwo mu mutwe. Ibyo bivuze ko ufite ihungabana n’agahinda gakabije atazashimishwa n’icyo gikorwa, mu gihe ufite akanyamuneza azagira umunezero udasanzwe.

Abantu benshi bakora imibonano mpuzabitsina bagamije kugera ku munezero, ariko hari izindi nyungu nyinshi bigira ku mubiri n’ubuzima z’umwihariko. Ni igikorwa kigomba kwitonderwa kandi kikitabwaho kugira ngo kigende neza.

Ibikubiye muri iyi nkuru byakuwe mu bushakashatsi butandukanye bwahurijwe mu nkuru yashyizwe ku rubuga rwa Greatist ku wa 9 Nzeri 2020. Yanditswe na Chantelle Pattemore ayiha umutwe ugira uti “Just the Facts: Sex”

Ubushakashatsi butandukanye bwagiye bugaragaza ko imibonano mpuzabitsina ari myiza ku buzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .