Impamvu zo kwitondera usanga umuntu ashingiraho mu gushaka umugore cyangwa umugabo

Yanditswe na Tombola Felicie
Kuya 27 Mutarama 2018 saa 03:19
Yasuwe :
0 0

Ragira Ruhangara Agatha, umugore w’Umupasiteri akaba n’inzobere mu bijyanye n’ubujyanama n’imitekerereze, avuga ko hari impamvu zishingirwaho mu gushaka umugore cyangwa umugabo zikagira ingaruka zo gutuma umuryango utaramba kuko ziba zasimbujwe urukundo.

Mu kiganiro ‘Nawe Birakureba’ atambutsa kuri Radio Ijwi ry’Ibyiringiro, Ragira yagarutse ku nsanganyamatsiko igira iti “ Kuki umuntu ashaka umufasha.” Akibaza na none ati “Akenshi umuntu afata icyemezo cyo kurongora cyangwa kurongorwa kubera iki?”

Avuga ko mu itangiriro Imana yabonye atari byiza ko umuntu aba wenyine imuremera umufasha umukwiriye kandi ikamuvana mu rubavu rw’uwo mugabo kugira ngo umugore azabe asa n’umugabo we .

Ati “Umugabo akeneye umufasha wo kumufasha urugendo rw’ubuzima. Umufasha umugabo akeneye agomba kuba asa nawe niyo mpamvu umugore yakuwe mu mugabo ngo bagire icyerekezo kimwe bahuje umutima.”

Nubwo bimeze bityo, vuga ko hari abashingira ku mpamvu zitarizo ingo zigasenyuka.

Ati” Iyo ushatse umugabo cyangwa ugashaka umugore kuko udashaka gusaza utabyaye, kuko ufite umutungo mwinshi ukaba ushaka uwitaho cyangwa uwo muwusangira, cyangwa se kuko ushaka umuntu uzazana umutungo nawe ukaba umukire, uwo si umugambi w’Imana.”

Yakomeje agira ati “ Cyangwa se uti nanjye ndabikoze kuko mbona ko ari ikintu abantu bose bakora , icyo gihe ntuzatinda kubona ko wibeshye kuko urugo rwawe ntiruzarama. Iyo uje hari ibyo ukurikiye noneho ukabibura igikurikiraho ni ugusenyuka k’umuryango kuko icyakuzanye kiba gishize.”

Ku bakobwa yavuze ko avuga ko hari ushaka umugabo kugira ngo abone umuntu umutembereza, abone aho abarizwa ariko mu by’ukuri adakunze uwo bagiye gushakana.

Avuga ko bene uwo muntu wibereye muri izo gahunda igikurikiraho ni uko atazasohoza inshingano ze neza nk’umugore kuko atigeze azitekerezaho mbere yo gushaka.

Yaburiye abakobwa bavuga ngo bagiriye impuhwe abagabo kuko gushakana ari umwanzuro umuntu afata w’ubuzima bwose atari uw’igihe gito.

Ati “ Hari n’abakobwa uzumva bavuga ngo uriya mugabo namushatse kubera impuhwe nabonaga ari wenyine kandi yihebye, yaragize ibyago mugirira impuhwe ndamwemera izo mpuhwe si urukundo , nawe ntuzatinda kubona ko wibeshye .”

Yavuze ko ku bahungu babona batangiye kuzamuka mu bukungu, bagashaka umugore uzamufasha kuwucunga na byo ni ikibazo gikomeye.

Ati “Umuhungu utangiye kuzamuka mu mafaranga agatangira kubona ko abakozi bamwiba, batamufata neza uko bikwiye, akumva ashaka gushaka umugore uzaza gucunga umutungo, iyo ashatse kubera izo mpamvu aba ashatse umugore w’umucungamutungo we ariko ntabwo ashatse umufasha bazakomezanya urugendo rw’ubuzima.”

Agatha avuga ko ubundi gushaka umufasha (umugore cyangwa umugabo) ari amahitamo y’ubuzima bwose.

Ati “Abantu babiri bakundana bashyira hamwe bagashimishanya buri wese akagira ibyo yigomwa ku nyungu za mugenzi we ngo anezerwe, niwo musingi w’urukundo. Iyo urukundo ruhari ntiwumva ko ibyo ukoze ari umutwaro cyangwa ko ari ikibazo, ntusigana kandi ibibi ntibihabwa umwanya mu muryango wanyu.”

Akomeza avuga ko kugira ngo umuryango urambe hagomba kwitabwa ku buryo mwamenyanye, uburyo mukundanyemo n’intego mufite, niba muhuje.

Ati “Ababukaba amazu bita ku kintu cyitwa umusingi kuko nicyo kerekana niba inzu izakomera cyangwa izasenywa n’inkubi y’umugaya no mu gushing urugo ni nkabyo ni ikintu witegura , menya impamvu ugiye kubaka niba atari urukundo ngo wifuze kunezeza mugenzi wawe aho kwinezeza ubwo indi mpamvu yose izashirana narwo usanga umuryango ushyizweho iherezo.”

Tombola Felicie


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza