Kigali: ‘Baby shower’ yararikoze, umugabo ahambiriza shishi itabona abayitabiriye

Yanditswe na Tombola Felicie
Kuya 17 Ukwakira 2017 saa 04:36
Yasuwe :
0 0

Baby shower ni ibirori bikorerwa umugore ugiye kubyara bigamije guha ikaze umwana ugiye kuza ku isi cyangwa umukobwa ugiye kubyara bwa mbere mu cyiciro cy’ababyeyi.

Ni ibirori byitabirwa n’ab’igitsina gore, baba bitwaje impano zitandukanye zirimo imyenda y’umwana, ibikinisho, ibikoresho by’isuku nka pampex/pampers, amasabune, amavuta, amabase yo kumwuhagiriramo, imitako yo mu cyumba cye n’ibindi.

Ibi birori uko iminsi igenda iza bigenda bitakaza umwimerere wabyo, abantu babigize ibya buri wese n’ubyaye gatanu barabimukorera. Hari n’ababyeyi birindiriza kugurira umwana imyenda, bategereje kuzabizanirwa muri ’baby shower ’, bakagura ibitajemo.

Iyi migirire yo kwishimira umwana imaze no gusakara mu mijyi y’u Rwanda ariko ntihabura n’abatayishimira.

I Nyarugenge ‘Baby shower’ yararikoze

Mu minsi ishize, umwe mu bakobwa bagiye muri ‘Baby shower’ ku Kimisagara mu Karere ka Nyarugenge, yahaye ubuhamya IGIHE uko we na bagenzi be bikoze, baguriye umwana ibishoboka byose, barabyamagananwa.

Umugabo w’umugore wari hafi kubyara yabararanganyijemo amaso, arabaganiriza, ariko aberurira mu kinyabupfura ko we adakunda imigirire ya ‘Baby shower’; anabumvisha ko ari we bireba mbere na mbere kwitegura umwana w’imfura ye ugiye kuvuka.

Impamvu yo kubirukana

Uyu mugabo ngo yahoraga abwira umugore we kujya guhahira umwana iby’ibanze kuko inda yari ifite amezi umunani nta gikoresho na kimwe baragura, ariko ntabikozwe nubwo inda ijya itungurana.

Umugore ngo yirazaga i Nyanza arindiriye ko azajya kugura nyuma ibikoresho amaze kubona ibyo ataguriwe hategurwa ‘baby shower’.

Umugabo yamubwiye ko bene iyo mico ari ukunyunyuza abantu kuko umwana afitweho inshingano n’ababyeyi be kurenza undi wese. Umugore yagize ngo ni imikino maze umunsi wa ‘Baby shower’ uragera, umugabo arareka ababyitabira bose baraza nubwo baje insigane. Bose baza baberewe mu mwambaro umwe w’ibara bari bahisemo kwambara.

Yababajije ikibagenza, uwari uyoboye amusubiza ko baje mu birori bya ‘Baby shower’.

Yabajije buri wese icyo akora, hari harimo n’abadafite akazi ndetse n’abakobwa b’abanyeshuri bakiri muri za kaminuza muri Kigali.

Yabasobanuriye ko atabyishimiye, ko ari umuco wateye wo kuba nta mubyeyi ugishaka kuvunikira uwo abyaye ahubwo akumva ko yabifashwamo n’abandi.

Umugabo ngo yavuganaga ikinyabupfura cyinshi cyane ariko ababaye, asaba buri wese gufata ibyo yari yaguze kuko bo batari barateranyije amafaranga ngo bagurire hamwe.

Barabifashe arabasezerera, ababwira ko babijyana ahubwo bakazagaruka kureba umwana yavutse.

Umutangabuhamya ati “Nubwo byatubabaje ariko yatubwiye mu kinyabupfura, yavuze ko abantu badakwiriye kwirukanka mu byo babonye byose ahubwo bakareka abafite inshingano bakazikora kuko ari bo zireba."

Imyenda y'umwana iba ari mu mpano zitwazwa muri ‘Baby shower’

Batashye bimyiza imoso, abandi baseka

Abafitanye isano n’uwo muryango bavuze ko uwo mugabo yabakojeje isoni ndetse ko bibabaje, abandi b’inshuti zisanzwe bo bataha baseka ahubwo batangira kwibaza ukuntu bajya muri ‘Bridal shower’ umukobwa agiye gushyingirwa, nyuma y’amezi make yatwita bagasubirayo bajyanye ibikoresho by’umwana nk’aho adafite ababyeyi.

Amayeri yabaye menshi muri bene ibi birori

Iyo uganiriye n’abagore n’abakobwa muri iyi minsi cyane cyane mu mijyi, usanga binubira ibirori bya ‘Bridal shower’ na ‘Baby shower’, kuko usanga harimo ukwifuza kwinshi ndetse bikaba birimo n’amayeri atangaje.

Uwimpaye [utifuje ko dutangaza umwirondoro we wose] wiga muri kaminuza yabwiye IGIHE ko hari umukobwa wari ufite ubukwe, agura Sim card nshya na we ajya kuri group ya whatsApp itegurirwaho ibirori bye, maze nyir’ibirori akaba nyambere mu gushyushya ibiganiro ashishikariza buri wese kwitanga.

Ati “ Njyewe nabimenye nyuma ko yayibagaho, yanze kugaragaza ifoto kuri profile ye ariko wasanga ari we uvuga ngo reka umugeni tumugurire ‘couvrelit’, amashuka, tumugurire gaz y’amashyiga ane kugira ngo tuzamuhe ibintu bifatika nk’inshuti ze."

Yabaga afite abandi bamushyigikiye babiziranyeho noneho wabona abandi banditseho ko bazatanga ibihumbi icumi, ugatinya kwandikaho bibiri, wenda ukavuga bitanu.

Umuhire w’imyaka 28 avuga ko akenshi bene ibi birori bitegurirwa kuri whatsApp ngo hazamo abavandimwe n’abandi ba hafi y’ugiye kubikorerwa maze bagashyirishamo abandi.

Yagize ati “Buri group ya WhatsApp, haba harimo abantu bameze nk’abatumwe n’umugeni cyangwa ugiye kubyara, bagategeka ibizagurwa, bakavuga ko bikenewe cyane ku buryo bisaba buri wese kwitanga atizigamye."

Avuga ko usanga umuntu hari ubwo yisanga mu matsinda ane cyangwa atanu kandi bose ari inshuti ze akumirwa, hose bamushyuhije umutwe.

Hari ababishima cyane nk’igikorwa cy’urukundo

Nikuze wiga muri kaminuza mu Karere ka Kicukiro we asanga ibi birori byose ari umuco mwiza wo gushyigikirana kuko nta wigira.

Ati “Byaba ‘Bridal shower’ cyangwa ‘Baby Shower’ ni igikorwa cyo kugaragaza ko umugenzi wawe umwifuriza ibyiza mu bihe bishya agiye kujyamo bitandukanye n’ibyo mwari musanganywemo. Njyewe mbona ko abavuga ko bibangamye bajya bareka kubijyamo kuko ni ubushake kandi ntawe ugushyiraho imbaraga ngo utange ayo udafite.”

Umugabo umwe, utashatse ko tumuvuga izina yatangaje ko igikorwa cya mugenzi we cyo kwirukana abari baje muri ‘Baby Shower’ atari cyiza kuko kuva wari umutima mwiza ubagenza nta mpamvu zo kubirukana.

Yagize ati “ Ntabwo rwose wabona abantu bibwirije bakaza bakugana ngo uvuge ngo ntubikunda, niba hari n’ababa bagize uruhare mu kubishishikariza abandi ariko si wowe uba wabatumye, ahubwo abo bitarimo babireka bigakorwa n’ababikunze,ntawe bakora mu mufuka.”

Inkomoko y’ibirori bya ‘Baby shower’

Nubwo ibi birori bya ‘Baby shower’ na ‘Bridal shower’ byamamaye cyane mu kinyejana cya 21 mu bihugu byo muri Amerika n’u Burayi, bigaraga ko na mbere yaho byari bisanzwe bikorwa ariko bititwa gutyo.

Aho bigaragazwa ni nko mu Buhinde aho mu mico yabo ya gakondo byitwa ‘seemantha’ bikorerwa umuntu utwite inda ifite amezi atandatu cyangwa umunani.
Umubyeyi bamuzanira impano ziganjemo imbuto, ibiribwa biryohera n’ibindi kugira ngo bafashe umwana gukura neza azavuke ashyitse.

Bamukorera kandi ibirori byo kumuririmbira kuko bemera ko umwana aba yaratangiye kumva amajwi no kuyasobanukirwa kugira ngo yishime.

Mu Misiri naho bakoraga kuva kera imihango ku mugore utwite cyangwa wabyaye ku buryo wabigereranya n’ibibaho uyu munsi.

Indi nkuru wasoma: ‘Bridal shower,’ibirori byatangiye gutera ubwoba abakobwa bakiri ingaragu mu Rwanda
[email protected]


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza