Inzira y’inzitane Hakiyamungu yanyuzemo kugera ku ntsinzi akesha imiyoborere myiza

Yanditswe na Sitio Ndoli
Kuya 11 Werurwe 2017 saa 03:22
Yasuwe :
0 0

’Iyi miyoborere myiza ku Rwanda Imana iyibakomereze ibakubire karindwi duhagarare bwuma, muturi imbere tubari inyuma haki ya mungu, tugire amahoro…’, iyi ni imvugo y’umusaza Habyarimana Joseph itazibagirana mu mitwe ya benshi bari bitabiriye banakurikiye Umushyikirano ku nshuro ya 14 wabereye muri Kigali Convention Centre umwaka ushize.

Habyarimana wamenyekanye nka Hakiyamungu afite imyaka 65 atuye mu mudugudu wa Kamabuye, Akagari ka Kizura mu murenge wa Gikundamvura mu karere ka Rusizi, nubwo atariho yavukiye kuko avuka mu murenge wa Nyabitekeri mu yari komine Gafunzo, ubu ni mu karere ka Nyamasheke.

Mu mateka ye ntahwema kugaruka ku gahinda yatewe n’uburyo ubutegetsi bubi bwamwimye amahirwe yo kwiga yari umuhanga mu ishuri ariko agakora ibizamini agatsindwa kuko yari Umushi.

Umunyamakuru wa IGIHE yamusuye mu rugo iwe ari kumwe n’umugore we n’umukwe we ukomoka muri Repubulika Iharanira Demokarasi ya Congo (RDC), amuganiriza bimwe mu bimukora ku mutima atazibagirwa mu buzima bwe.

Habyarimana bigaragara ko akunda kwizihirwa, ntazibagirwa akarengane ko kubuzwa amashuri kugeza n’aho ahisemo kujya gushakira amahirwe i Bukavu ariko na byo ntibimuhire uko yabyifuzaga.

Yagize ati “Najyaga mba uwa mbere cyangwa uwa kabiri ariko nakora ikizami nkatsindwa. Batwitaga Abashi kandi ngo ntibashakaga ko babakandagira.”

Akomeza avuga ko icyo gihe haje ikitwaga CERAR(Centres de l’Enseignement Rural et Artisanal au Rwanda, ni ukuvuga ibigo byatangirwamo amasomo yibanda ku myuga), kigahuza abanyeshuri bo mu makomini atanu ari yo; Gafunzo, Gisuma , Kamembe, Gishoma na Bugarama na bwo agakora ikizamini akaba uwa mbere, bigatangaza benshi impamvu adatsinda ibizamini bya leta.

Ati “Nahize [muri Cerar] umwaka umwe ngira agahinda mpita nambukira hakurya kuri Antenne du Banda i Bukavu mpiga imyaka ine mu mashuri yisumbuye na bwo mba uwa mbere. Mama yaje kurwara cyane kuko ari njye bari barabyaye gusa biba ngombwa ko mva mu ishuri nza kumurwaza, sinongera no kubona ubushobozi bwo kurisubiramo, sinabona n’akazi.”

Agace Habyarimana atuyemo imihanda yarakozwe, yifuza ko baramutse babonye amashanyarazi baba bageze muri paradizo

Ubuzima bwakomeje kumusharirira ariko mu 1982 ashakana na Nyirangendahimana Josephine babyarana abana 17, gusa hariho barindwi kuko abandi bagiye bicwa n’indwara.

Nyuma ya Jenoside yakorewe Abatutsi mu 1994, yarahungutse avuye muri RDC akora akazi ko kuroba mu kiyaga cya Kivu.

Avuga imyato imiyoborere myiza

Mu 2007 Habyarimana yafashe icyemezo n’umuryango we bagurisha isambu bari bafite mu murenge wa Nyabitekeri bimukira mu wa Gikundamvura mu karere ka Rusizi ari naho atuye kugeza ubu.

Ubuzima bwe bwarahindutse kuko ubu ari Perezida wa Koperative Umucyo y’abasaza 331 bafata inkunga y’ingoboka y’izabukuru. Mu 2015 Perezida wa Repubulika, Paul Kagame yabemereye imodoka bayihabwa kuwa 17 Werurwe 2016.

Iyi modoka ikora akazi ko kujyana ibihingwa byo muri uyu murenge birimo imyembe, umuceri n’ibindi, ikanabafasha kugeza umusaruro wabo w’ibitoki ku isoko.

Habyarimana Joseph n'Umugore we Nyirangendahimana Josephine

Habyarimana yongeye gukomoza ku ijambo ‘Haki ya Mungu’ ryashyize ku butaka abari bateraniye mu mushyikirano wa 14, rikanatuma aba icyamamare, avuga ko ari indahiro arahira yivuye inyuma yemeza ko ntakizamutesha inshuti ye Paul Kagame kubera ibyiza yamugejejeho n’abanyarwanda muri rusange.

Ati “Yantumiye ataha Gaz methane ku ntara turataramana kuva saa moya z’ijoro kugeza mu mu ma sayine z’ijoro, muri Kigali Convention Centre mbere nta mukene nkanjye wari kujyayo; mu nama nkuru y’igihugu n’abize ntibayijyamo.”

Yongeraho ko Umurenge wa Gikundamvura usigaje kugeramo umuriro w’amashanyarazi n’amazi meza ugahinduka paradizo n’urubyiruko rwaho rugahanga imirimo irimo gusudira, kogosha n’ibindi.

Habyarimana Joseph yamenyekanye ku izina rya Hakiyamungu nyuma yo gusetsa abitabiriye Inama y'Umushyikirano ya 2016
Habyarimana ageze iwe mu rugo ari gukomanga ngo bamukingurire
Habyarimana yicaye iwe hamwe n'umufasha we baganiriza Umunyamakuru wa IGIHE

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244