Rwamagana: Yataye umugabo babyaranye arambiwe kuba mu bukode

Yanditswe na Tombola Felicie
Kuya 25 Ukuboza 2017 saa 10:42
Yasuwe :
0 0

Muri sosiyete habonekamo ingo zinyura mu bigeragezo biremereye, abatabashije kwihangana bagasenya mu gihe ukubana kwabo kutubakiye ku rukundo rwihangana.

Mabuja Emma Marie w’imyaka 30 yatanze ubuhamya bw’uburyo yataye umugabo babyaranye amuziza ko adafite inzu ndetse atizigamaga ngo bazayigereho.

Dufashwenimana Emmanuel y’imyaka 33 n’umugore we Mabuja Emma Marie w’imyaka 30 ni abaturage bo mu Karere ka Gasabo, Umurenge wa Remera bafitanye abana babiri.

Mu kiganiro Duhumurizanye gitambuka kuri Radio Ijwi ry’Ibyiringiro kivuga urugendo rw’ubukirisitu n’ibyo Imana yabakoreye, uyu mugore n’umugabo we bagarutse ku buryo bakundanye bahujwe na radio kuko bose bakundaga guhamagara, bose ari abana ba bucura iwabo.

Nubwo babanye mu buryo busa n’ubusekeje ndetse batanasezeranye, uyu mugore yangaga ibintu byitwa gukodesha kuko yari yarasabye Imana umugabo ufite inzu.

Mabuja ati “Ikintu cyatumaga nshaka kumuta nyuma y’imyaka itatu tubana ni uko nabogana ko tudahuza mu bijyanye no kuba twagira ikintu twizigama cy’ejo hazaza, nkabona turimo kubyara kandi abana bazakenera kwiga.”

Nari narabwiye Imana nti “Sinshaka umugabo ukodesha, numvaga ko nubwo namukunze nkamushaka ariko ubukode tuzabuvamo vuba. Niyo ntego numvaga mfite, nabimubwira akavuga ngo ndashaka gukira vuba ngo mbe ndetse ibyo tuzaba tubikora.”

Bakomeje kubana batyo aho bakodeshaga mu Karere ka Rwamagana, umugore agashengurwa no kuba badafite inzu ndetse atanamenya ho umugabo we ashyira umushahara.

Ati “Uyu mugabo nashatse mbere, yakoreraga i Kigali yazaga gakeya i Rwamagana, undi mugabo twariduturanye wari umufundi we yansuraga kenshi. Yambwiye ko afite amafaranga yo kuzagura ikibanza ndetse agahita yubaka numva koko namusanga.”

Uyu mugabo ngo yamubwiraga ko bazabyarana yaramaze kumuha inzu ku buryo azajya arera abo bana yumva ko ari iwe. Ati “Kumva ko agiye kunyubakira nkagira iwanjye, ni icyo yanshukishije.”

Dufashwenimana Emmanuel ngo ubwo umugore we yamubwiraga ko agiye kwigendera, yagize ngo ni ibintu byo kuganira ariko birangira bamuhamagaye ko umugore we agiye kwimuka.

Ati “Narindi i Kigali mu kazi barambwira ngo umugore wanjye arimo kwimuka nahise ntaha . Naciye mu buyobozi mbabwira ibyabaye bambwiye ko kuva tutarasezeranye ntacyo nabaza.”

“Umugabo wari umujyanye yaransetse cyane ati ‘Umugore yarakunaniye kumutunga reka mwijyanire.’”

Yagiye kuraguza ngo umugore we agaruke

Uyu mugabo wari usigaye wenyine, yagiye kuraguza kugira ngo umugore we agaruke, bamubwiye ko nagaruka azishyura ibihumbi magana atatu mirongo irindwi n’ifaranga rimwe (370.001 Frw) gusa ngo umuti bamuhaye ku bihumbi 20 Frw ngo ntacyo wakoze kuko n’ubundi umugore ntiyaje.

Baje gusubirana kubera urubyaro

Nubwo umugore yari yarataye umugabo we wa mbere, umwana babyaranye yajya avugana na se kuri telefoni kenshi ndetse akajya abwira abandi bana ko se aba i Kigali ko aho aba atari kwa se. Ibi yajyaga abivuga umugabo wa nyina abyumva.

Uyu mwana wakundaga se cyane, ise yaje kumusura asanga umugabo wamutwariye umugore adahari. Niko kuboneraho akanya ko kuganira n’umugore, banoza umugambi wo gusubirana.

Baracyakodesha

Uyu muryango waje gusubirana ukomeza kuba mu bukode, babana neza nyuma yo kugandukira Imana, bakanyurwa n’ubutumwa bwa Yesu bumviye mu ivugabutumwa ryakozwe n’Itorero ry’Abadiventiste rya Nyabisindu (Remera).

Mabuja ati " Ntabwo naje kuri Radio kwigamba ibibi nakoze ahubwo naje gushimira Imana ibibi yankuyemo kuko hari n’ubwo najyaga ntekereza kwiyahura."

Bigishijwe Ijambo ry’Imana barabatizwa, babwirwa ko kubana badasezeranye ari ukubana nk’indaya bahita basezerana byemewe n’amategeko.

Bavuga ko batangiye kwizigamira kandi ko Imana izabafasha bakabasha kugira inzu yabo bwite nk’uko byahoze mu nzozi z’umugore.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza