Ubuhamya bw’abakire nka Bill Gates, Buffet n’abandi ku bijyanye no kurwanya umunaniro

Yanditswe na Bizimana Jonathan
Kuya 2 Mata 2017 saa 07:20
Yasuwe :
0 0

Mu buzima bw’umuntu ahora ashaka icyamuteza imbere mu mibereho ye by’umwihariko mu bijyanye n’ubukungu; benshi bakora amajoro n’amanywa bikabahira hakaba n’abagirwaho ingaruka n’umunaniro ukabije.

Abantu bakunze kumara igihe kirekire mu kazi cyangwa bakora ntibaruhuke bihagije, rimwe na rimwe bitewe n’inshingano nyinshi bafite, batashobora kuzitaho bigatuma bahora bahangayitse kuko ibyo bagomba gukora byiyongera buri munsi.

Ikigo gitanga Serivisi z’Ubuzima (National Health Service), kivuga ko umunaniro ugira ingaruka mu buzima bwa buri munsi ushobora guturuka ku kazi, ibibazo byo mu miryango, ibishingiye ku mafaranga n’ibindi.

Abayobozi n’abashinze ibigo by’ubucuruzi bikomeye kuri iyi Si, nk’undi muntu wese bahuye n’iki kibazo cy’umunaniro ariko bawurwanyije mu buryo butandukanye ndetse bahangana n’ibi bihe bikomeye.

The Independent yashyize hanze uburyo butandukanye bamwe mu baherwe ku Isi bagiye barwanya umunaniro:

1. Bill Gates

Uyu muherwe wa mbere ku Isi, ufite umutungo wa miliyari 86 z’amadorali, washinze Ikigo cy’Ikoranabuhanga gikora porogaramu za mudasobwa (Microsoft) avuga ko akunda gusoma mbere yo kuryama.

Mu kiganiro Umunyamerika Bill Gates yagiranye na The Seattle Times, yavuze ko nubwo yaba yakererewe kugera mu buriri afata nibura isaha imwe akabanza gusomba igitabo ubundi akabona kuryama.

Bill Gates akomeza avuga ko hari inama nyinshi yakuye kuri Warren Buffet, imwe muri zo ngo ni ukoroshya ibintu ntiwumve ko byacitse.

Ati ‘Buffet afite ubushobozi bwo guturisha ibintu, agakora ibiri ngombwa ndetse agatekereza ku by’ibanze. Ni imyitwarire iranga abahanga’.

Yakomeje atangaza ko ari iby’agaciro kuba abiha umwanya we, akirengagiza ibitari ngombwa amaso akayahanga ku bifite agaciro.

2. Tim Cook

Umunyamerika Timothy Donald "Tim" Cook uyobora Apple ntiyita ku bamuca integer.
Nyuma yo kubona impamyabumenyi y’ikirenga muri Kaminuza ya Glasgow, umuyobozi w’uruganda rwa Apple, Tim Cook agira inama abanyeshuri yo guhora mu nzira iboneye no kutita ku magambo y’ababaca intege mu buzima.

Avuga ko gutega amatwi umuntu wese buri gihe byagutera umunaniro bikaba byanakwangiriza ubwonko ugahora utekereza ko ntacyo ushoboye cyangwa se ukumva ubuzima bukubihiye.

3. Meg Whitman

Margaret Cushing “Meg” Whitman ni umuherwe w’Umunyamerika, atangaza ko arwanya umunaniro ajya ku mazi kuroba.

Uyu mugore yanyuze mu bigo bikomeye nka P&G, eBay ubu akaba abarizwa muri cyitwa Hewlett-Packard. Mu kiganiro yagiranye na Fast Company yavuze uburyo akunda cyane kuroba yifashishije indobani.

Whitman n’umuhungu we, ngo buri mwaka bajya kuroba inshuro esheshatu.

Mu bushakashatsi bwakozwe na Kaminuza yo muri California, ishami rya Merced bwagaragaje ko kujya mu mirimo ikunezeza bigabanya cyane umunaniro ndetse binafitiye inyungu nyinshi umubiri.

4. Warren Buffet

Warren Buffett, umuherwe wa kabiri mu bafite imitungo myinshi ku Isi, afite miliyari 75.6 z’amadorali

Uyu mushoramari ukomeye ku Isi, ni umuntu ugira ibimushimisha byinshi umwihariko we ukaba gukunda gucuranga gitari.

Buffet yigeze kugaragaza iyi mpano ye imbere y’imbaga kuri televiziyo.
Ubushakashatsi bwakozwe n’Ishami rya Merced muri Kaminuza ya muri California bugaragaza ko kwiga ibikoresho byo gucuranga bifasha mu kugabanya umunaniro.

5. Sherly Sandberg

Sherly Sandberg, umuyobozi ushinzwe ibikorwa muri Facebook we azimya telefoni mu masaha y’ijoro.

Sherly ngo impamvu imutera kuzimya telefoni mu ijoro, aba agira ngo yirinde gukoresha imbuga nkoranyambaga.

Aganira na USA Today, Sherly yavuze ko iyo agiye kuzimya telefoni ye bimubabaza, ariko ngo bimurinda kubangamirwa n’izo mbuga nkoranyambaga igihe aryamye ndetse bigatuma mu gitondo ashobora gukora akazi neza.

Ubushakashatsi bwagaragaje ko kureba muri mudasobwa na telefoni nijoro ni bibi kuko urumuri rwazo rushobora kubuza umubiri kurekura imisemburo yitwa ‘metalonin’, ifasha umuntu gusinzira.

6. Jack Dorsey yita kuri gahunda aba yihaye

Mu kiganiro yagiranye na Forbes, umuyobozi wa Twitter, Jack Dorsey, yavuze ko uburyo yifashisha ngo arusheho gutera imbere ari ukwita kuri gahunda aba yateguye. Buri icyo azakora n’umunsi azagikoraho byose biba byanditse guhera ku munsi wa mbere kugeza ku cyumweru.

Yakomeje avuga ko kuri we yumva umunaniro waterwa no gukora ibintu utari ufite muri gahunda bityo gushyiraho gahunda ukurikiza byagufasha kurwanya uwo munaniro.

New York Magazine yo ivuga ko Dorsey yiruka hafi ibirometero icyenda buri gitondo.

7. Susan Wojcicki aruhukira mu muryango we

Umuyobozi wa YouTube, Susan Wojcicki avuga ko kugira ngo arwanye umunaniro yiha umwanya uhagije wo kuruhuka no kwitekerezaho, ibintu avuga ko ari ngombwa cyane.

Susan atangaza ko mu gihe umuntu Atari mu kazi abona uburyo bwo gukora gahunda ze atuje mu gihe agarutse mu kazi.

8. Elon Musk ntatinya ibimutegereje

Elon avuga ko ba rwiyemezamirimo nubwo bagira ubwoba bwo gutsindwa batajya baterera iyo ahubwo bakomeza bakagerageza. Buriya ngo ubwoba burashira ariko icyizere ntikijya gishira. Bityo ngo abantu bagomba kurwanya ubwoba bwatuma badakomeza kugerageza, ntibabuhe agaciro mu buzima bwabo.

9. Indra Nooyi icyo yitaho ni ukwigirira icyizere

Umuyobozi wa PepsiCo, Indra Nooyi, yatojwe kwigirira icyizere akiri mu bwana bwe. Uyu mugore yatangarije Business Insider, ko nyina yajyaga amuha imyitozo mbere yo gufungura ngo Indra na murumuna we bandike ijambo rivuga ku byo bakora baramutse babaye abaminisitiri b’intebe cyangwa perezida. hanyuma nyina akaba ari na we utora uwabikoze neza hagati ya Indra na murumuna we.

Nooyi akomeza avuga ko undi muntu wamufashije kwigirira icyizere ari Sekuru kuko ngo iyo hari ikintu cyamunaniraga yamuhaga igihano cyo kwandika ku gapapuro ngo ‘nta cyo nzireguza’ inshuro 200.

Nooyi avuga ko iyo yibutse ubuzima yanyuzemo yibuka byinshi bimufasha gutuma ahorana uburyo bwo kugena gahunda ze. Yibwira ko afite ubushobozi bwo gukora ikintu neza kurusha abandi.

10. Jeff Bezos arangwa no guseka inshuro nyinshi

Uwashinze ikigo cya Amazon, Jeff Bezos avuga ko n’ubusanzwe yikundira guseka cyane.

Jeff atangaza ko umunaniro utangirira ku kutita ku kintu ufiteho ubushobozi. Mu yandi magambo atanga inama yo kumenya aho bipfira, ukagerageza kubigarura mu buryo hanyuma ugakomeza gukora ibiguteza imbere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza