Ubuhamya bwa Mugeni watewe inda ubugira kabiri n’uwo yafataga nk’umubyeyi

Yanditswe na Prudence Kwizera
Kuya 7 Gashyantare 2017 saa 07:06
Yasuwe :
0 0

Umukobwa witwa Mugeni (izina rayahinduwe) utuye mu Karere ka Huye atanga ubuhamya bw’ukuntu yaguye mu bishuko aterwa inda ubugira kabiri n’umugabo yafataga nk’umubyeyi we, kubera kugira irari no kwifuza kubaho mu buzima burenze ubushobozi iwabo bafite.

Uyu mukobwa w’imyaka 19 y’amavuko kuri ubu afite abana babiri yabyaye mu buryo atateguye, avuga ko abayeho mu buzima bushaririye, akaba yicuza uburyo yanze kumvira inama yagiye agirwa n’ababyeyi be.

Mu buhamya yahaye IGIHE, Mugeni yagarutse ku buryo yabyirutse afite amaraso ashyushye, uko yaje kujya gushaka akazi ko mu kabari n’uko yaje guterwa inda ya mbere umukoresha we agahita amwirukana kandi ariwe wayimuteye, ndetse n’uko bongeye guhura amutera iya kabiri.

Mugeni avuga ko mu mwaka wa 2015 ubwo yari afite imyaka 17 y’amavuko akirangiza kwiga mu amashuri yisumbuye mu bijyanye n’amahoteli, yaje guhura n’umugabo bahuza urugwiro amwemerera ko yaza akamuha akazi mu kabari ke.

Icyo gihe ngo yahise abyemera yishimira ko agiye kujya abona amafaranga yo kugura icyo akeneye kandi ngo yabonaga uwo mugabo amufitiye impuhwe kuko yari yamaze kumufata nk’umubyeyi.

Ati “Kuko numvaga nshaka akazi kandi umuryango wanjye nta bushobozi buhagije wari ufite, Uwo mugabo namubonaga nk’umuntu w’umubyeyi ibyo ambwiye ndabyemera kandi numvaga ngomba gushaka icyo nkora nkajya mbona amavuta yo kwisiga nkigurira n’imyenda myiza ntiriwe mbisaba ababyeyi.”

Yanze kumvira inama yagiriwe na nyina umubyara

Mugeni avuga ko akimara kubona akazi ko mu kabari, nyina umubyara yamugiriye inama ko akwiye kukareka amubwira ko azahahurira n’ibibazo, ariko yanga kumwumvira.

Ati “Mama yarambwiye ngo ntashaka ko njya gukora mu kabari, ndamusuzugura njyayo ku ngufu atabishaka, ariko bamaze kuntera inda nibwo nasubije amaso inyuma nibuka ko nanze kumwumvira.”

Uko yatewe inda ya mbere

Mugeni avuga ko akimara kugera aho agomba gukora akazi ko mu kabari, yasanze uwo mugabo afite umugore n’abana, ndetse ahita atangira akabona uwo mugabo amushyira mu bana be amufata neza ati “nabaye iwe mu rugo mbana n’abana be. Yamfataga nk’umwana nkamufata nk’umubyeyi”.

Akomeza avuga ko bamaranye icyumweru kimwe yamutumye mu mujyi wa Huye nawe ahita amusangayo ari nabwo yamutegeye imodoka amujyana mu Karere ka Nyamagabe amusambanyirizayo.

Ati “Yahise akatisha itike tujya Nyamagabe ambwira ko hari ibintu agiye kugura nkabizana mu rugo, we agakomeza ajya Nyaruguru. Ubwo twagezeyo anjyana ahantu ntazi muri Lodge (icyumba gikodeshwa) turaryamana ari nabwo yahise antera inda ya mbere.”

Akomeza avuga ko bakimara kuva i Nyamagabe, umugore w’uwo mugabo yabaketse ahita ajya kureba nyina (ubyara Mugeni) arabimubwira ariko babimubajije bamugira n’inama yanga kubyemera.

Ati “Umugore we agiye kumumesera imyenda yabonye ya matike, ahita aza arabimbaza ndabihakana, ajya no kureba Mama wanjye barabimbaza bangira n’inama ngo mbabwize ukuri niba twaryamanye bahite banjyana kwa muganga ataba yanteye inda cyangwa yanyanduje indwara, ndabyanga mbabwira ko ntigeze njya i Nyamagabe kandi tutigeze turyamana.”

Mugeni avuga ko nyuma y’ukwezi yabuze imihango agira ubwoba ajya kubibwira nyina, ndetse nyuma yaho aza kwisanga atwite ari nabwo umukoresha we yahise amwirukana ajya kuba iwabo ari naho yabyariye.

Uko yatewe inda ya Kabiri

Mu buhamya bwe, Mugeni avuga ko atwite ndetse na nyuma yo kubyara yatangiye kubaho ahangayitse akicuza impamvu yanze kumvira nyina, gushaka indezo biza kumuviramo guterwa inda ya kabiri.

Avuga ko umugabo wamuteye inda ya mbere yamuhamagaye amusaba amafaranga yo kugurira umwana ibyo kurya n’imyambaro, nawe amubwira ko amusanga mu Mujyi wa Huye akayamuha, agezeyo barongera bararyamana amutera indi nda.

Ati “Namusanze ari mu kabari yakodesheje icyumba anjyanamo ngo tuganire ubwo tugezemo ambwira ko yateguye kumpa ibihumbi 20, ariko avuga ko atayampa tutaryamanye, kuko nayashakaga cyane ndabyemera ari nabyo byamviriye kuntera inda ya kabiri y’uriya mwana muto”.

Akomeza avuga ko akimara kubyara abana babiri, umugabo babyaranye atongeye kugira icyo amufasha ku kwita ku bana babo, ahubwo yahise yimuka mu Karere ka Huye ajya gutura i Kigali, bituma atangira kwiyambaza ubuyobozi ngo bumurenganure.

Avuga ko kuri ubu ikibazo cye yakigeje ku buyobozi bw’inzego z’ibanze na Polisi y’Igihugu kugira ngo abana be bahabwe uburenganzira ndetse bandikwe no mu bitabo by’Irangamimerere, ndetse n’ibiba na ngombwa n’uwo mugabo akurikiranwe kuko yamushutse akamutera inda akiri muto.

Aratanga inama ku bana b’abakobwa

Mugeni avuga ko guterwa inda ubugira kabiri byamuhaye isomo ku buryo yumva yagira inama abakobwa b’abangavu bari kubyiruka, bakitwararika, bakumvira inama bagirwa n’ababyeyi babo kandi bakirinda abagabo n’abasore baza babereka ko babafitiye impuhwe.

Atanga inama ku bakobwa yo kutagira irari ryo kumva bashaka kubaho mu buzima buhenze kuruta ubushobozi bw’ababyeyi babo cyangwa gupfa kwemera impano bahabwa n’abagabo.

Ubushakashatsi bwakozwe muri Mata 2015 n’impuzamiryango iharanira uburenganzira bwa muntu (Cladho), bugaragaza ko abakobwa bato baterwa inda zitateguwe, abari ku kigereranyo cya 64% babiterwa no kutanyurwa n’uko iwabo babayeho bigatuma bagira irari ryo kwifuza ibirenzeho bikorohera abababashuka.

Naho abari ku kigereranyo cya 19% bwagaragaje ko babiterwa no kubura urukundo rw’ababyeyi babo, 9% babiterwa n’amakimbirane agaragara iwabo mu miryango bigatuma bayahunga bakajya mu busambanyi, mu gihe abari kuri 6% baziterwa bahohotewe cyangwa bafashwe ku ngufu.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza