Ubupfumu na siyansi mu kuzura abapfuye muri iki gihe

Yanditswe na Herve Ugirumukunda
Kuya 18 Ukwakira 2017 saa 04:37
Yasuwe :
0 0

Abatuye Isi bagira imyemerere itandukanye ku ngingo y’ukuzuka kw’abapfuye. Hari abemera ko nyuma y’urupfu umuntu azukira mu bundi buzima, abemera ko uwapfuye agaruka ku Isi mu ishusho y’ikintu runaka, hari n’abatagira icyo bemera.

Vuba aha hari n’umupasiteri uherutse kwihanukira atangaza ko ashobora kuzura abapfuye akabahamagara ari mu rusengero bakamwitaba, bakava mu buruhukiro bw’ibitaro mu Mujyi wa Kigali bakamusanga.

Iyi nyandiko iragaruka ku bupfumu bw’uko uwapfuye cyangwa roho ye ishobora kugaruka ku Isi, akavugana n’abo yasize bakamubaza iby’aho avuye cyangwa bakamubaza ahazaza habo uko hameze ndetse na siyansi yo kuzura uwapfuye akagarukana ubuzima.

Ukuzura abapfuye mu myemerere ya kera mbere ya Yezu

Mu idini rya kera ry’Abagereki, bemeraga ko hari abagabo n’abagore benshi bazuwe mu bapfuye bakagarurwa mu buzima ntibongere gupfa ukundi. Abo ni nka Asclepius bavuga ko yishwe n’ikigirwamana Zeus nyuma akagirwa nawe umudapfa.

Igihangange Achilles nawe Abagereki bemeraga ko yazuwe na nyina Theris akaba ubuziraherezo mu bishanga cyangwa mu birwa by’abahiriwe.

Abanyamisiri bo bemeraga ko iyo umuntu apfuye akavugirwaho imitongero yo mu gitabo cy’abapfu ashobora kuzuka akaba ikigirwamana. Mu gihe abandi baturage basengaga ibigirwamana babisaba ko uwabo wapfuye azabaho neza, rimwe bakanabiha ruswa y’ibitambo, ngo bizamwiteho.

Abahanga muri siyansi baracyahanyanyaza bashaka icyatsinda urupfu burundu

Mu kinyejana cya 19, Umushakashatsi mu bijyanye n’isanzure, Nikolai Fyodorovich Fyodorov yakunze gushaka uburyo siyansi yakoreshwa mu kuzura abapfuye ntibazongere gupfa burundu.

Uburyo bwa mbere yumvaga umuntu yazurwamo ni ubwo gukusanya ibisigazwa byaboze by’umubiri wa muntu bikaba byavugururwa hakoresheje ubutabire. Ubwa kabiri ni uguhera ku turemangingo umubyeyi ahererekanya n’abana be. Ku bwe yasangaga yakoresha umwana akagarura se wamubyaye binyuze byo bahuriyeho mu mubiri.

Yumvaga umwana afite imwe mu mitekerereze n’imyitwarire ahuriyeho n’ababyeyi be, bityo akaba igice cy’ababyeyi be cyasigaye ku Isi ku buryo cyakoreshwa hakaremwa undi muntu usa, utekereza kandi witwara nka se cyangwa nyina.

Nubwo Fyodorov yemera ko roho y’umuntu ipfa mu gihe yashizemo umwuka, ariko ngo binyuze muri siyansi, byazashoboka ko muntu amenya gusubiza ubuzima ibyaboze na roho ikaba yaremwa bundi bushya.

Uyu mugabo yari afite intego yo gushaka intsinzi y’urupfu, ubundi akazura abakurambere bapfuye bakagaruka bakabana n’abariho ubuziraherezo.

Nubwo ibitekerezo bya Fyodorov bisa nk’inzozi, kugeza ubu hari abashakashatsi bakomeje kugerageza gukora impanga (kopi cyangwa clone) ya muntu ku buryo mu gihe kiri imbere, umuntu ashobora kuzajya arwara agapfa, kopi ye igahita ikorwa igakomeza kubaho nk’uko yabagaho.

Ni ubushakashatsi bwatangiye mu myaka 50 ishize ku nyamaswa, bwaciye agahigo mu 1996 ubwo Ikigo Rosin cyo muri Ecosse cyakoraga kopi y’intama yiswe Dolly. Iyo ntama yakozwe bafashe uturemangingo tw’iyindi, baturemamo igi, baritera mu yindi ntama y’ishashi, iza kubyara umwana witiriwe umuhanzikazi Dolly (Parton).

Iyi ntama yaje kurwara iricwa mu 2003 imaze imyaka irindwi ivutse. Kuri ubu inyamaswa zishobora gukorerwa kopi zirimo inka, ingurube, imbwa, injangwe, imbeba n’izindi.

Muri 2004 Kaminuza Nkuru ya Koreya y’Epfo yatangaje ko yakoze kopi y’igi rya mbere ry’umuntu ariko muri 2006 biza kuvumburwa ko batabigezeho. Kugeza n’ubu ubushakashatsi buracyakomeje nubwo abanyamadini babirwanya, bavuga ko ari uguhinyuza Imana yaremye muntu.

Abashoramari bashyira akayabo muri ubu bushakashatsi kuko biyumvisha ko buzabyara amafaranga nko mu gutubura inyamaswa zitanga inyama, cyangwa nko mu gihe umubyeyi w’umuherwe yazajya apfusha umwana akifuza ko bamukorera undi usa neza n’uwo yari afite.

Kuzura abapfuye mu birabura

Muri Afurika idini ry’aba Voodoo, rizwiho kuzura abapfuye bakagaruka badafite roho (zombies) bakabakoresha icyo bashaka. Rikomoka ku baturage b’aba Yorouba babayeho mu kinyejana cya 18 na 19 mu cyitwaga Dahomey.

Ryasakaye cyane mu bihugu bya Togo, Benin na Nigeria. Abacakara bajyanwe muri Amerika barijyanyeyo, kuri ubu rigaragara cyane muri Haiti no mijyi imwe ya Leta Zunze Ubumwe za Amerika.

Aba voodoo barimo ibice byinshi bitewe na roho basenga, hari abasenga Agwe ariyo roho yo mu mazi; iy’umukororombya yitwa Awida Wedo; irinda imva yitwa Baron Samedi n’izindi.

Umupfumu ukomeye cyane mu ba Voodoo ni Max Beauvoir wapfuye muri Nzeri 2015 azwiho kuba yareretse abatuye Isi ko ibyo bita ‘Zombie’ (bazanga), ibiremwa bitagira roho byasakaye muri za filime zitandukanye bibaho.

Muri Gicurasi 1962 umugabo wo muri Haiti witwa Clairvius Narcisse yarapfuye bashiki be Marie Claire na Angelina bamubona ashyingurwa.

Nyuma y’imyaka 18, mu 1980, umugabo yasanze Angelina ku isoko amubwira ko ari Clairvius, amurondorera uko yazuwe n’umupfumu w’umu voodoo akajya amuhingisha ibisheke nk’umucakara.

Byaje kuvumburwa ko umuvandimwe wa Clairvius Narcisse yagambanye n’uwo mupfumu, akamuha uburozi bwo kumusinziriza kugeza aho umutima uhagaze ariko ntapfe burundu, ari yo mpamvu bagiye kumuhamba babona yapfuye burundu, nyuma umupfumu aramutabura mu mva amuha ubundi burozi bumukangura ariko nta bwenge afite, ku buryo azajya amuhingisha.

Nyuma y’imyaka ibiri uwo mupfumu yaje gupfa, Clairvius aratorongera, ariho yaje kubonana n’umuryango we nyuma y’imyaka 18. Yabayeho indi myaka 14 noneho arapfa bya nyabyo.

Mu kwemeza ko ibyavuzwe kuri uyu mugabo ari byo, umupfumu Max Beauvoir yahuye n’umwarimu wo muri Kaminuza ya Harvard, Wade Davis, amwereka ifu ihindura umuntu bazanga (Zombie), yandika igitabo ‘The Serpent and the Rainbow’ cyaciye ibintu ku Isi kikaba n’intandaro ya filime nyinshi zikorwa ku biremwa by’umwijima.

Abiyita abapasiteri n’intumwa z’Imana muri iki gihe baba bazura abapfuye?

Inkubiri y’abitwa abakozi b’Imana yadutse cyane cyane mu ntangiriro z’ikinyejana cya 21, bavuga ko basengera abantu bagakira indwara, bagakira imivumo batewe na satani, karande z’imiryango n’ibindi.

Mu rwego rwo kwemeza abayoboke babo ko bakorera Imana yanditse muri Bibiliya koko, abo bapasiteri bakora ibyo bita ibitangaza bitandukanye, hari abagenda ku mazi [bakarohama] ariko ikiruta ibindi bavuga ni ukuzura umuntu.

Mu mezi abiri ashize umupasiteri wo mu gace ka Anambra muri Nigeria witwa Chukwuemeka Ohanaemere yagaragaye mu mashusho ari mu rusengero, abantu babiri bamuzanira umurambo w’umugore bavuga ko yapfuye barira, bamumutereka imbere, undi amwubarara hejuru ngo aramuzura.

Naho muri Kenya, muri Kamena 2017, uwiyita umuhanuzi, Owuor, avuga ko yazuye umugore witwa Rosa, wo mu gace ka West Pokot ngo kuko yazutse hashize isaha yohereje ubutumwa bwa SMS buvuga ngo ‘ibintu biri bugende neza”.

Hari n’abandi benshi bavuga ko bazutse, bagahuriza ku buhamya buvuga ko malayika yabatembereje mu ijuru no mu kuzimu akabatuma ku batuye Isi.

Yewe hari na Pasiteri Matsoeneng wo muri Afurika y’Epfo uherutse kwihanukira avuga ko yarwanye n’ingabo z’ikuzimu akica satani na Paul Sanyangore wo muri Zimbabwe wavuze ko yahamagaye Imana kuri telefoni.

Kuri abo hiyongeraho Pasiteri Rugagi wo mu Rwanda uvuga ko azahamagara uwapfuye mu buruhukiro bw’ibitaro mu Mujyi wa Kigali akamusanga mu rusengero ari muzima.

Hari n’undi wo muri Zimbabwe wari waratangaje ko Perezida we Robert Mugabe azapfa ku wa 17 Ukwakira 2017, ariko ngo yavuganye n’Imana asanga yahinduye uwo mugambi.

Kugeza ubu nta bushakashatsi cyangwa iperereza rihamye ryemewe ryari ryakorwa ku byo aba bapasiteri bavuga, gusa biramutse ari byo byaba ari kimwe mu bintu bikomeye byahindura amateka ya muntu, agakira akababaro aterwa n’urupfu.

Pasiteri Chukwuemeka Ohanaemere ahamya ko yazuye umugore
Achilles intwari ivugwa mu mateka y'Abagereki, bemeraga ko yapfuye akazuka
Clavius Narcisse uvuga ko yazuwe, yongeye kubaho imyaka 14 abona gupfa burundu
Intama Dolly niyo yambere yakozwe binyuze mu buhanga bw'abantu mu mateka y'Isi
Mama Rosa yishimiye ko yazuwe na Pasiteri Owuor wo muri Kenya
Nikolai Fyodorov yemezaga ko siyansi ishobora kuzura umuntu mu bapfuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza