Uburyo umuntu ahumeka bishobora kurwanya umunaniro ukabije

Yanditswe na IGIHE
Kuya 10 Ukwakira 2017 saa 07:38
Yasuwe :
0 0

Imibereho yuje umunezero ikomeje kuba nk’umuziro kuri benshi mu batuye isi ndetse bamwe ntibazi uko bashobora gukabya izi nzozi, nyamara ubushakashatsi bwerekana ko umuntu ashobora kugera ku munezero akoresheje imyitozo yo guhumeka.

Ibiza, intambara, amakimbirane mu bantu n’ibindi bikomeza guteza guhangayika gukomeye ari na ko biviramo abantu ibindi bibazo birimo ihungabana, guta umutwe (stress), agahinda gakabije n’ibindi byiyumviro bibi bishobora gukururira umuntu kugwa mu kaga gakomeye, nk’uko Dr Hiteshini Jugessur, impuguke mu by’imibereho ya muntu yabitangarije IGIHE.

Dr Hiteshini ni umwalimu mpuzamahanga ukorana na Art of Living Foundation, ikigo gikorera mu bihugu 156 mu gutanga amasomo yo kurwanya no kwivura umunaniro w’ubwonko hagamijwe guteza imbere imibereho myiza kandi irangwa n’akanyamuneza.

Art of Living Foundation yashinzwe n’umugabo w’Umuhinde, Sri Sri Ravi Shankar, mu 1981 ikaba itanga amasomo afasha mu kurwanya umunaniro binyuze mu guhumeka, gutekereza n’imyitozo ngororamubiri n’iy’intekerezo izwi nka ‘yoga.’

Uyu muryango n’undi uwushamikiyeho udaharanira inyungu witwa International Association for Human Values (IAHV) itanga ubujyanama ku kanama k’Umuryango w’Abibumbye gashinzwe ubukungu n’imibereho myiza (ECOSOC).

Dr Hiteshini azamara uku kwezi (Ukwakira) mu Rwanda yigisha abantu uko barwanya umunaniro bakoresheje guhumeka n’ubundi buryo butandukanye akaba amaze imyaka 17 atanga aya masomo mu bihugu bitandukanye ku isi ahereye muri Canada aho akomoka.

Umwinjizo mu masomo ya porogaramu y’ibyishimo (Happiness Program) ufata iminsi itatu, akaba yasoje itsinda rya mbere mu cyumweru gishize naho irindi tsinda rikazatangira ku wa 13 Ukwakira 2017 muri The Manor Hotel i Nyarutarama mu Mujyi wa Kigali.

Uretse aya masomo y’intangiriro, Hiteshini yavuze ko hari andi yo ku rwego rwisumbuye ategura abantu bakaba abarimu.

Yagize ati “Uko umuntu ahumeka bigaragaza uko amerewe mu ntekerezo ze, bityo guhumeka ku muvuduko wihariye bikabasha gusubiza intekerezo mu bitereko. Uburyo bwo guhumeka buroroshye ku buryo buri wese abasha kubyikoresha yibereye mu rugo ariko bufite imbaraga zihambaye mu kuvura intekerezo.”

Yongeyeho ko bafite amasomo yihariye ku bana, imfungwa n’abagororwa, ku bagezweho n’ibiza, abashinzwe umutekano n’andi agenewe abanyacyubahiro.

Hiteshini yavuze ko bateganya kubaka Happiness Centre (Ikigo cy’Ibyishimo) muri Kigali nk’ibyo bafite mu bindi bihugu aho abantu bajya bagafashwa kuruhuka no gusubizwa imbaraga mu mubiri ku buryo bahava bishimye.

Ikigo ‘Art of Living’ kimaze imyaka itanu gikorera mu Rwanda kikaba kihafite umwigisha utanga amasomo ku buryo buhoraho. Kigenda kigira uruhare mu gukemura amakimbirane akomeye hirya no hino ku isi, kikaba giheruka guhuza inyeshyamba zo mu mutwe wa FARC na Guverinoma ya Colombia bagasinya amasezerano y’amahoro muri Nzeri 2016 ashyira iherezo ku ntambara yari imaze imyaka 52. Iki kigo kandi gishimirwa uruhare mu biganiro by’amahoro muri Iraq, Côte d’Ivoire, Kashmir no mu bindi bice by’isi.

Ubushakashatsi bwakozwe n’Ishyirahamwe rikora ibijyanye n’imitekerereze muri Amerika [ American Psychological Association] mu 2014 bwagaragaje ko umunaniro ukabije wateje 54% kurwana n’abantu ba hafi yabo mu gihe inyigo 65 zakorewe ku migabane ine y’isi zerekanye ko imyitozo yo guhumeka ifasha mu kugabanya umunaniro ukabije ku kigero kiri hejuru ya 40%.

Dr Hiteshini Jugessur ni impuguke n'umwalimu mpuzamahanga mu masomo y'ibyishimo atangwa na Art of Living Foundation

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza