Ubuzima Mukanyandwi yabayemo kugeza agerageje kwicisha isuka umugabo we

Yanditswe na IGIHE
Kuya 20 Ukwakira 2017 saa 08:30
Yasuwe :
0 0

Mu 1995, Mukanyandwi Séraphine na Mbarushimana Jean de la Croix bo mu Karere ka Rulindo, umurenge wa Kisaro nibwo bashakanye, ariko babana mu buzima bubashaririye bitewe n’ihohoterwa rishingiye ku mitungo no ku gitsina umugore yakorerwaga.

Mu kiganiro Mukanyandwi yagiranye na IGIHE, yavuze ko umufasha we bakimara kubana yaranzwe n’ingeso mbi ziganjemo ubusinzi, gusahura umutungo w’urugo n’ibindi.

Mukanyandwi yavuze ko yakorewe ihohoterwa rimugiraho ingaruka zo kubyara abana benshi, ababyara mu buryo budasobanutse.

Yagize ati “Nahuye n’ihohoterwa ry’umutungo, ndinda kubyara abana barindwi kubera ihohoterwa n’imyumvire mike yo kutagera aho abandi bari no kumva ko ndi umuntu wo hasi, ntagera aho abandi bari ngo tuganire, ndetse ni nabyo byatumye mbyara bariya bana bose (barindwi).”

Aya makimbirane yakajije umurego bamaze kubyarana abana babiri agenda akura kugeza ubwo basigara biyorasa ibitandukanye kandi bari mu buriri bumwe.

Ati “Byagiye biza gahoro gahoro, bigera aho igitanda kiba kimwe ariko noneho uburingiti bwo kwiyorosa bukaba bubiri, yaba yantekereje, yarazaga ka karingiti akakajugunya hasi, bikaba ngombwa ko akora icyo ashaka ariko njyewe ntagishaka.”

Mbarushimana yari agiye kwicishwa agafuni

Aya makimbirane yarakomeje kugeza ubwo umugabo agurishije imitungo yose ubukene butaha urugo, umugore ararambirwa kugeza ubwo atekereje kwicisha umugabo we agafuni.

Ati “Twabaye muri ubwo buzima, nagura itungo ryateza imbere urugo, akarigurisha ngeza aho mbona imibereho irandambiye, ngera aho ntekereza kuvuga nti n’ubundi uyu mugabo mbona ntacyo amariye ngiye kumwica. Narabyutse mu buriri mfata agasuka, njya aho aryamye ari kugona, yariye njye ntariye, ndavuga nti ndamwishe birarangiye. Namanitse isuka ariko nibaza ko agiye kunsigira abana barindwi ko bizangiraho ingaruka nyuma. Ndogera ka gasuka ngasubizayo.”

Yavuze ko kuba ataramwishe ari Imana yakinze ukuboko, nyuma aza guhabwa impanuro n’imiryango itandukanye zijyanye n’imibanire myiza na we azumvisha umugabo buhoro buhoro kugeza abyumvise, biyemeza gucika ku ngezo mbi zose.

Ubu bafashe iya mbere bagiye gusezerana imbere y’amategeko

Uyu Mbarushimana ahagaze imbere y’imbaga yari mu bikorwa byo gutangiza ubukangurambaga bw’iminsi itatu, ku miyoborere n’imibereho myiza mu muryango mu Karere ka Rulindo, yiyemeje gufasha urugo rwe, ndetse avuga ko bagiye gusezerana imbere y’amategeko.

Yavuze ko ubu atagipfusha ubusa umutungo w’urugo, ndetse ngo yishyuriye umuryango we wose ubwisungane mu kwivuza.

Ati “Ubu mbasha kugurira umuryango wanjye ubwisungane ndetse nanagera aho abaturanyi babanye nabi nkabasha kubigisha ko bagomba kugira umutekano mu rugo.”

Mukanyandwi yavuze ko bamaze kwemeranya ko bazasezerana imbere y’amategeko, ubu Mbarushimana batemberana akamwita ‘Cheri’ abababonye bagatungurwa bakanifuza kugera ku rwego bagezeho babana neza.

Minisitiri w’uburinganire n’iterambere ry’umuryango, Espérance Nyirasafari yavuze ko gusigasira amahoro mu muryango, bizagerwaho binyuze mu kwimakaza ihame ry’uburinganire n’ubwuzuzanye.

Yagize ati “Umuryango niwo shingiro rya byose, ntacyo twageraho tudafite umuryango urangwa n’ubwubahane, ubwuzuzanye hagati y’umugabo n’umugore, aho abana batureberaho bakazakura bafite indangagaciro na kirazira by’umuco wacu.”

Raporo yashyizwe ahagaragara na Komisiyo ya Sena ishinzwe uburenganzira bwa muntu, igaragaza ko amakimbirane akurura impfu zo mu miryango ari kwiyongera cyane nk’aho mu 2010 abantu bagera kuri 400 bahohotewe, bakaza kugabanuka mu mwaka wakurikiyeho ariko mu 2014 bakagera kuri 450 no ku 1000 mu 2015.

Ubwo hatangizwaga ubukangurambaga bw’iminsi itatu ku miyoborere n’imibereho myiza mu muryango
Mukanyandwi Séraphine yavuze ko yari agiye kwica umugabo we akoresheje isuka
Mukanyandwi Séraphine na Mbarushimana Jean de la Croix

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza