Uko wakongera kubaka umubano nyuma yo gushwana n’umukunzi

Yanditswe na Tombola Felicie
Kuya 18 Kanama 2017 saa 12:41
Yasuwe :
0 0

Bavuga ko gukora amakosa ari ibya buri wese naho kubabarira akaba ari impano y’Imana kuko aho umuntu ava akagera adashobora kubaho nk’intungane adakosa.

Uko umuntu yagerageza kwigengesera kose hari ubwo bimushyikira agakora ikosa akaba ari yo mpamvu ari ngenzi kwiga uko twabana nabo dukundana nubwo ibyo byose byabaho.

Uko ikosa ryamera koso ibyo mwaba mwapfuye byose, igihe ukunda umuntu uba ugomba no kumugarukira igihe yakosheje.

Ntabwo ari ibintu byoroshye ariko birashoboka nk’uko inkuru yasohotse mu kinyamakuru elcrema cyandika inkuru z’urukundo n’imibanire ibigaragaza.

Iyi nkuru ntabwo ivuga ko ugukunda cyangwa uwo ukunda utazongera kumukorera amakosa ukundi, ahubwo iragaragaza ko nubwo byaba byabaye utagomba hari uburyo mwiyunga mugakomeza urugendo.

Kubanza kumenya amakosa yawe

Ntabwo umubano ushobora kugaruka igihe cyose utemera amakosa ndetse ngo uyasabire imbabazi.

Nubwo waba utakosheje ariko ukaba ushaka ko amakimbirane arangira, uba ugomba guca bugufi, ugasaba imbabazi kuko akenshi bitungura mugenzi wawe uba uzi ukuri ariko akaguma kwizima.

Niyo rero uteye intambwe zo gusaba imbabazi nk’uwakoze amakosa , mugenzi wawe arishima no kukubabarira bikamworohera

Gusaba imbabazi zitari iza nikize

Hari ubwo umuntu asaba imbabazi bya nikize, bitamuvuye ku mutima, ku buryo usanga asa n’uwikinira.

Ku bantu bakunda gusaba imbabazi biba bisaba ko wegera mugenzi wawe biguturutse ku mutima kandi rwose uciye bugufi.

Iyo uko witwaye mugusaba imbabazi bitagaragaza ikikuri ku mutima izo mbabazi ntacyo ziba zivuze.

Iyo usabye imbabazi bya nyirarureshwa biba biri kongera uburemere bw’ikosa ryakozwe aho kugira ngo umubano ugaruke ahubwo ukarushaho gusenyuka.

Kuganira ku ikosa ryakozwe

Abantu bamwe bavuga ko kugarura ibyashize nta kamaro igihe ikosa ryababariwe, ko biba ari ukuzura akaboze bikaba byakongera guteza umutima mubi.

Nyamara iyo muganiriye ku kibazo cyabayeho, biroroha no kukibagirwa burundu ntigihore kibukwa kurenza uko wagifungirana muri wowe.

Kuganira ku byabaye bituma ubifata nk’amateka mwanyuzemo aho kubigumana nk’urwibutso rubi.

Ugomba kwibagirwa

Kubabarira nyako kujyana no kwibagirwa, hari ubwo umuntu akubwira ngo yarakubabariye maze mwagira icyo mupfa akagarura amateka yose mwanyuzemo.

Uretse no kuba bigarura icyizere hagati yawe n’umukunzi wawe, biba ari na byiza kuri wowe kuko ntabwo ugomba kubika ako gahinda mu mutima wawe.

Niba umuntu asabye imbabazi, wimubabarira gusa ahubwo unanibagirwe kugira ngo ukomeze kugenda nta mubabaro.

Garagaza koko ko wahindutse

Guhinduka kwiza ni ukudasubira mu ikosa ryababariwe, nibyo bigaragaza ko atari ibintu wari wagambiriye ndetse ko wahaye agaciro imbabazi wahawe.

Ntabwo ubuzima bw’abakundana bukwiriye kubaho mu guhora basabana imbabazi aho kwishimira urukundo rwabo ngo batekereze ku bibateza imbere.

Guhinduka bigaragaza ko wifuza ko urukundo rwanyu rutera imbere aho guhora musenya mukongera mukubaka bityo bityo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza