Agakungu yagiranye n’uwo bahoze bakundana kamubyariye amazi nk’ibisusa

Yanditswe na Kanamugire Emmanuel
Kuya 22 Kamena 2016 saa 10:22
Yasuwe :
0 0

Ni umugabo uvuga ko urugo rwe rugeze aharindimuka kubera agakungu yagiranye n’umukobwa bahoze bakundana, kugeza ubwo babyaranye umwana.

“Twiganye kaminuza, twasangiye akabisi n’agahiye, ababyeyi be bitambitse mu rukundo rwacu batuma ntamurongora bamwohereza kwiga mu mahanga. Nyuma y’igihe kirekire tutabona twaje kongera kubonana narashatse na we yararongowe [….]twahuje urugwiro tubyarana umwana waje kuvuka asa nanjye nezaneza. Ibyo nakoze byambyariye amazi nk’ibisusa kuko ubu urugo rwanjye rugeze aharindimuka.”

Nk’uko akomeza abivuga ngo amaze imyaka itanu ashakanye n’umugore babyaranye abana batatu, ariko mbere ye hari undi mukobwa bakundanye igihe kirekire, ndetse ngo bari bariyemeje kuzabana akaramata iyo bitazamo kidobya.

Yagize ati “Umukobwa iwabo bamwohereje kwiga mu mahanga, bagamije kuntandukanya na we. Muri ako gahinda kose nari mfite ko gutandukanywa n’umukunzi wanjye, hari undi mukobwa wambaye hafi anyitaho anyereka urukundo ruzira uburyarya kugeza ubwo namusabye ko yambera umugore, ubu tumaze kubyarana abana batatu.

Nyuma y’imyaka itanu wa mukobwa bahoze bakundana yaje kuva mu mahanga agaruka mu Rwanda gusura abo mu muryango we.

“Ninjye washatse mbere ye kuko nabonaga tutazabana, ndetse ni we wampaye uburenganzira bwo gushaka kuko yangaga kubabaza ababyeyi be batashakaga ko mbabera umukwe. Yaje mu Rwanda yarashatse undi mugabo babyaranye umwana umwe. Umunsi wa mbere tubonana twahise dukora imibonano mpuzabitsina yahise ivamo umwana w’umuhungu dusa nk’intobo.”

Uyu mugabo avuga ko uyu mwana yabaye umurunga ukomeye hagati yabo bombi, ndetse yongera n’urukundo bari bafitanye.

Ati “Inshuro nyinshi ndamuhamagara cyangwa nkamwandikira mubaza amakuru y’umwana, umugore wanjye yaje kubimenya none yambwiye ko tugomba gutandukana. Numva mfite ipfunwe z’ibyo nakoze ndifuza ko umuntu wese uzasoma ubu buhamya yangira inama kuko sinifuza ko abana banjye naba ukubiri nabo kandi rwose n’umugore wanjye ndamukunda.”

Uyu mugabo avuga ko akunda umugore bashakanye byemewe n’amategeko, ariko kandi ngo n’uyu bahoze bakundana aramukunda dore yanamubyariye umwana, akaba asaba ko yagirwa inama.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza