Aimable Kubana yagaruye ‘Ijoro ry’urukundo’ mu buryo bwihariye

Yanditswe na Munyengabe Murungi Sabin
Kuya 14 Werurwe 2016 saa 10:43
Yasuwe :
0 0

Umuhanzi wanabaye umunyamakuru igihe kirekire mu kiganiro ‘Ijoro ry’urukundo’, agiye kongera gutanga ubujyana mu bijyanye n’urukundo n’ibyafasha mu gusigasira umubano mu ngo.

Azwi mu ikinamico Urunana nka Semana, yanakinnye mu « rukundo n’ibigeragezo », « Irahary’akanya gato ritamara ipfa » n’izindi.

Amaze imyaka itanu aba mu Bufaransa aho akora akazi k’ubuvuzi n’ubujyanama ku buzima. Mu myaka yose amaze atumvikana mu kiganiro ‘Ijoro ry’urukundo’ ngo ntiyigeze agihagarika ahubwo yagikoraga mu bundi buryo.

Ati « Nubwo maze imyaka irenga itanu ndetse gukora ikiganiro ‘Ijoro ry’urukundo’ kuri radio, ariko sinigeze ndihagarika, haba mu mitekerereze yanjye ya buri munsi ndetse no mu nyandiko zanjye za buri gihe. »

Arongera ati « Ntabwo nashyizeho ikiganiro cy’ijoro ry’urukundo mu rwego rwo gukora akazi nataha ngo bihagararire aho […] Ni ikintu kinkora ku mutima kuva kera, kandi nzi neza ko sosiyete nyarwanda itavuga mu buryo bweruye ibijyanye n’ijoro ry’urukundo nyamara kandi ari ryo shingiro ry’ingo zubatswe n’urukundo muri rusange. »

Yasabwe na benshi kwandika igitabo gikubiyemo inama ku rukundo n’ibijyanye n’ijoro ry’urukundo. Yarashunguye asanga igitabo kitazafasha mu buryo buhoraho no gukemura ibibazo bya buri munsi ahitamo gushinga urubuga ruzajya rumuhuza n’abakenera inama ku rukundo bihoraho.

Ati « Abantu benshi bakomeje kunyandikira bambaza niba nakwandika igitabo cy’ijoro ry’urukundo. Nari mbifite mu mushinga, ariko naje gusanga igikwiye ari ugukora urubuga mbasha guhuriraho n’abakunda bose ikiganiro ijoro ry’urukundo kandi nkanabasha gutanga inama bakeneye mu gihe gikwiye. »

« Igitabo nacyandika ariko ibibazo bindi byaza nyuma sinajya mba ndi kumwe nabo ngo mbashe kujya inama n’abakunzi b’ikiganiro ijoro ry’urukundo. »

Yashinze urubuga yisewateta.com, rugizwe n’inkuru z’urukundo, inama za muganga w’impuguke, urubuga rw’ibibazo by’abakunzi, umwanya wahariwe abagore bagira ikibazo cyo kuma mu gitsina.

By’umwihariko uru rubuga ruzajya rushakirwaho inshuti ku bifuza kurushinga, hazajya hanatambukaho filime ngufi zijyanye n’iby’ijoro ry’urukundo Aimable Kubana yanditse.

Ati « Hari umugabo wigeze kungezaho ikibazo cye ambwira ko afite umugore mwiza kandi akunda cyane, ariko ko kubera kuma bikomeye mu gitsina cy’umugore we babanje kujya bitabaza agakombe kamazi hafi mu gihe cy’ijorory’urukundo.
Ibyo byaje gutuma kwifuza umugore bishira, yabazaga icyo yakora […] Niyo mpamvu kuri uru rubuga harimo umwanya wa ‘Ryoherwa mu rukundo’, bizajya bifasha abo bantu. »

Aimable Kubana yashatse umuganga w’Umufaransa w’impuguke mu by’imibanire y’abantu, uzajya utanga inama.

Ati «N’abakeneye inama za muganga hari umuganga w’Umufaransa dukorana uzajya utanga ibisubizo mu gihe tuzajya tuba tubonye ko koko icyo kibazo gikwiye inama za muganga. »

Kubana avuga ko yatinze kugaruka ‘Ijoro ry’Urukundo’ kuko yabanje kwiga ibijyanye na muntu n’imyitwarire ye kuva bamutwise kugeza ashaje.

Ati «Ubu mfite diplôme yabyo. Ubumenyi bwanjye bumfasha kuba hafi y’abakunzi bose b’ijoro ry’urukundo mu buryo bweruye. »


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244