Aimable Kubana yatangije urubuga rucukumbura ibijyanye n’urukundo

Yanditswe na Munyengabe Murungi Sabin
Kuya 3 Gicurasi 2016 saa 10:29
Yasuwe :
0 0

Kubana Aimable wakunzwe cyane mu ikinamico ‘Urunana’nka Semana, yatangije urubuga rutanga inama ku rukundo, abashaka abakunzi no gusigasira umubano w’abashakanye.

Mu myaka yashize, Aimable Kubana yakoraga ikiganiro ‘Ijoro ry’Urukundo’ kuri City Radio, cyanyuzwagamo ibibazo byose bijyanye n’ijoro ry’urukundo cyo kimwe n’ibibazo byibazwa ku rukundo.

Yongeye gushyiraho uburyo azajya yifashisha mu gukemura ibi bibazo biciye ku rubuga yatangije rwa wateta.comrucukumbura ibijyanye n’urukundo byose.

Kubana yanakinnye mu « rukundo n’ibigeragezo », « Iraha ry’akanya gato ritamara ipfa » n’izindi. Amaze imyaka itanu aba mu Bufaransa aho akora akazi k’ubuvuzi n’ubujyanama ku buzima.

Mu myaka yose amaze atumvikana mu kiganiro ‘Ijoro ry’urukundo’ ngo ntiyigeze agihagarika ahubwo yagikoraga mu bundi buryo. Yifashishije urubuga yatangije, azajya atanga ubujyanama ku bakundana, abagira ibibazo by’ububobere buke mu gihe cy’imibonano mpuzabitsina ndetse ngo azajya ahuza abasore n’inkumi bifuza kwinjira mu rukundo.

Yagize ati “Kuri uru rubuga natangije nzajya ntanga imiti ku bafite ikibazo cyo kutagira ububobere ndetse no kongera ibyishimo mu ijoro ryanyu ry’urukundo. Hanashyizweho uburyo bwo kubona umukunzi wifuza hirya no hino ku Isi binyuze kuri wateta.com cyane cyane ko mu minsi micye izaba iri no mu rurimi rw’Icyongereza.”

Kuri uru rubuga, Aimable Kubana azajya anyuzaho inkuru y’uruhererekane y’urukundo yise ‘Amayobera y’Urukundo’, izajya yandikwa mu buryo bw’urukurikirane itambuke kuwa Mbere, Kuwa Gatatu no kuwa Gatanu.

Ati “Iyo nkuru ikora ku mutima, iteye amatsiko, uyisomye yibaza ikizakurikiraho. Ibyo ariko si igitangaza iyo umuntu yasomye cyangwa yakurikiye izindi nkuru nanditse.”

Mu nkuru z’urukundo Aimable Kubana yanditse zikamenyekana cyane mu Rwanda harimo iyitwa “Urukundo n’ibigeragezo” yarimo abakinnyi uwitwa Maliza na Rurangwa bo ku Kirwa cya Ijwi. Ni na we wanditse iyitwa “Iraha ry’akanya gato ritamara ipfa”, yabagamo abakinnyi Suzi na Gatari.

Kubana yanashyizeho igice cyahariwe inkuru z’ubuzima zizajya zigisha abantu kwirinda indwara no kubereka inzira nyayo yo kugira ubuzima buzira umuze.

Ati “Byose byatekerejweho neza kugira ngo uru rubuga rubashe gusubiza ibibazo byanyu byose mu buryo bukwiye kandi buri wese abashe kugira ibyishimo byimbitse.”

Kurikirana Ijoro ry’Urukundo na Aimable Kubana


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza