Amasomo atanu y’ingenzi yakubakirwaho mu mibanire y’abashakanye

Yanditswe na Bizimana Jonathan
Kuya 31 Ukuboza 2017 saa 11:30
Yasuwe :
1 0

Mu mibanire y’abashakanye hari iby’ingenzi byo kwitwararika bituma umubano hagati ya babiri uramba bagakomeza gusoroma ku mbuto zawo ndetse ituze rigahora rirangwa mu rugo rwabo.

Mu minsi ya mbere abashakanye bamaze igihe gito bambikanye impeta y’urudashira, batangira kubaho mu buzima bwo kumenyerana no kwigana bitewe no kuba buri wese aba afite imico yihariye ishingiye ku ho yarerewe n’ubuzima yanyuzemo.

Umunyarwanda yaciye umugani ko ukurusha umugore aba akurusha urugo, ari naho benshi bashingira bamufata nk’umutima warwo ugena imiterere n’iterambere ryarwo.

Ikinyamakuru Nairobi News cyanditse inama z’uburyo umugore yakwitwara mu rugo rwe kugira ngo akomeze abungabunge umubano mwiza n’umugabo we ariko na nyir’ubwite yabigizemo uruhare.

1. Ntabwo uzemeranya n’umugabo wawe buri gihe

Inshuro nyinshi hari igihe ababana batumva ibintu kimwe ku ngingo runaka. Ibi ni ngombwa cyane, gusa bisaba koroherana hagati yabo kuko ibiganiro bishobora gushibukamo igisubizo cyatanga umuti urambye hakabaho kwiyunga.

2. Kugira abavandimwe ni byiza, ariko inshuti zo ziba akarusho

Abantu benshi bitegura ubukwe bafashwa n’imiryango yabo. Umuryango ni wo ukora urutonde rw’abashyitsi, ibinyobwa n’ibiribwa, aho buzabera, ndetse hari naho usanga hakiri umuco utuma umuryango ugira uruhare mu guhitiramo umusore umukobwa bazabana.

Abahanga mu by’imibanire batanga inama ko biba byiza ku bamaze gushyingirwa kutareka za nshuti kuko usanga arizo zibitaho mu buzima bwabo bwa buri munsi, bagasangira ibyishimo n’umubabaro.

3. Ntuzatume inshuti zigucika umaze gushaka

Burya ngo inshuti wari ufite utarahura n’umugabo wawe uzazizirikane kandi n’izo mwahuye waramaze kurushinga uzakore ibishoboka byose ntuzitakaze. Mu gihe habaye ukutumvikana n’umugabo wawe, inshuti zanyu, cyane cyane izubatse ingo, zibafasha gukemura icyo ikibazo.

Inshuti wari ufite utararushinga, niba muri zo hari abakiri inkumi cyangwa abasore, ntuzabasuzugure ngo wumve ko wabarenze mutakiri ku rwego rumwe. Ni ngombwa kwibuka ko ibiri hejuru bishobora kumanurwa, kandi ntawamenya wasanga bazakugirira akamaro mu bihe biri imbere.

4. Umugabo wawe ni yo nshuti yawe nyakuri

Umugore n’umugabo bashobora kubana batumva ibintu kimwe gusa nta gikuraho ko nta kintu gishobora kwitambikana hagati y’aba bombi baba bafitanye igihango cyo kuba inshuti magara mu buzima bwabo.

Hagomba kubaho gusigasira ubucuti ku mpande zombi kandi haba nta rukundo nyakuri rubaranga, ukarushakira hasi hejuru.

5. Imyanzuro ifatwa ntiyishimirwa na buri wese

Niba mwemeranyijwe guhitamo ikintu, byaba kuzabyara abana, amazina muzabita, aho muzatura, n’ibindi… mugihitemo uko mubyifuza ubundi ntimwite ku magambo ya rubanda.

Ikintu gikunze gutuma ingo zitumvikana ni uko umugore aba yiringiye ibintu bimwe na bimwe, nyamara agasanga si ko biri. Aho usanga hari abibwira ko bazajya bafatanya mu mirimo yo mu rugo n’iyindi nyamara bikarangira atamurebye n’irihumye. Ibi bishobora gutuma aba bombi bahora bashwana mu rugo rwabo uko bwije n’uko bucyeye.

Umwaka wa mbere nyuma yo gushyingirwa ntabwo uba woroshye, gusa kubwizanya ukuri bifasha byinshi. Niba utararushinga, ntuzagire igitekerezo cy’ukuntu ibintu bizaba bimeze mu rugo rwanyu kuko bishobora kuzatuma ubabara uramutse usanze ibyo wibwiraga atari ko biri.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza