Byafata igihe kingana iki ngo wizere umukunzi mwahuriye ku mbuga nkoranyambaga?

Yanditswe na Ferdinand Maniraguha
Kuya 13 Nyakanga 2016 saa 01:50
Yasuwe : XX
0

Muri iki gihe ikoranabuhanga rifite uruhare rukomeye mu guhuza abantu binyuze mu buryo butandukanye. Benshi baharaye imbuga nkoranyambaga nka Facebook, WatsApp , Twitter,Youtube, n’izindi zitandukanye.

Ubusanzwe izi mbuga nkoranyambaga zikoreshwa n’abatari bake, ba nyirazo abenshi imyirondoro yabo iba ishobora kubonwa na buri wese, ku buryo byoroshye cyane kumenya umwirondoro n’ibiranga umuntu runaka.

Usanga iyo ugiye kujya kuri Facebook bwa mbere bakubaza amazina yawe, igihe wavukiye, umujyi n’igihugu utuyemo,ibyo ukunda n’ibindi.

Imbuga nkoranyambaga zirasa n’izamaze kuba ibiyobyabwenge mu bantu.Si igitangaza kubona umuntu adashobora kumara n’umunota atari kuri Facebook, WatsApp n’izindi, ndetse hari n’abazikoresha bicaye ku binyabiziga mu muhanda bagenda zikabarangaza rwose ku buryo bashobora no kutamenya ibyabaye n’ubatwaye akaba yabarenza iyo bagiye.

Impamvu yo kuzijyaho ziratandukanye, hari abazijyaho bagamije kwishakira amakuru no kuyohererezanya byihuse cyane ko hari n’igihe usanga ziyihutisha kurusha ibitangazamakuru, abashaka kureba inkuru zisekeje bagenzi babo, abashaka kuganira n’ibindi.

Gusa ku rundi ruhande hari n’abajya ku mbuga nkoranyambaga bafite izindi gahunda cyane cyane abasore n’inkumi bishakira urukundo rimwe na rimwe ariko rutavugwaho rumwe kuko ngo usanga rutamara kabiri.

Bamwe mu baganiriye na IGIHE, bavuze ko hari n’abahurira kuri facebook mu gihe gito gusa bakabwirana ibirebana n’ubuzima bwabo bwose ntacyo basize inyuma kandi batarabonana amaso ku maso, ndetse nyuma ugasanga hari n’abarushinze barahujwe n’ubu buryo.

Kalisa Emile utuye mu murenge wa Nyagatare mu Karere ka Nyagatare ati"Hari abo nagiye mbona bakundana bataziranye kuza ubwo biyemeza kurushinga,ariko nta wakwizera ko urwo rukundo rwaramba bitewe nuko utaba uzi imico ya mugenzi wawe.Kwandikirana kuri facebook ntibihagije ngo mube mwakwiyemeza kubana kuko umuntu ashobora kukwiyoberanyaho akiyita umutagatifu, ariko mwaba muri kumwe yakugejeje iwe mu rugo akagutangaza."

Hari bahurira ku mbuga nkoranyambaga bagahita bahuza urugwiro

Uretse ibi, hari n’ababonana bwa mbere umwe akiha undi wese ukagira ngo abari basanzwe baziranye, n’abakorera bagenzi babo ibyamfurambi nkuko Uwase Clarisse utuye mu Kiyovu mu Mujyi wa Kigali yabibwiye IGIHE .

Ati" Hari umukobwa twiganye wahuriye kuri Facebook n’umuhungu umuruta bakajya bahora baganira ndetse yagira ikibazo akamwohereza amafaranga batarahura.Hashize nk’umwaka n’igice amaze kumutangaho amafaranga menshi maze umunsi umwe amusaba kumusura ngo ararwaye, nawe aragenda agezeyo asanga umuhungu yikuyemo imyenda umubiri wose umeze nk’ubushye! Ibindi byakurikiyeho byo sinabivuga!”

Undi musore umwe mu Mujyi wa Kigali, utifuje ko amazina ye atangazwa yagize ati“Njyewe hari n’igihe nganira n’inkumi kuri Facebook nyuma y’iminsi ibiri akansura kandi iyo nsanze ameze neza nkuko nabitekerezaga duhita tubirangiza [Kuryamana] .Muraganira ukagira ngo mwari musanzwe muziranye.”

Icyo benshi mu bo twaganiriye bahurizaho nuko badashyigikiye urukundo rwo ku mbuga nkoranyambaga ngo kuko bamwe mu bazikoresha babeshya.

Ngo hari abiyitirira amafoto y’abandi, abiyita abahungu ari abakobwa cyangwa abakobwa biyita abahungu, abahindagura amazina n’ibindi byo kwiyoberanya.

Nubwo gukundanira kuri internet bitavugwaho rumwe hari abantu batandukanye bagiye bakundaniraho kandi bakagira urugo ruhire.

Byasaba igihe kingana iki ngo wihe uwo muhuriye ku rubuga nkoranyambaga ?

Abantu batandukanye ntibahuza ku gihe byafata ngo wizere uwo muhuriye ku mbuga nkoranyambaga.

Ku kijyanye n’abazikundaniraho kugeza ubwo bemeranya kurushinga,umwe mu bamotari ukorera mu Mujyi wa Kigali yagize ati“Ubundi njyewe uko mbyumva, nakundana n’umukobwa nibura imyaka itari munsi y’ibiri kuko n’umuntu muzasazana. Nkafata umwanya wo kumugenzura nkamenya imyitwarire ye n’iwabo nkahamenya.”

Undi ati“ Byasaba umwaka umwe kugira ngo umenye icyo umuntu yanga, akunda n’ibindi.”

Uwase Clarisse we ati“ Reka reka sinamwizera byo kubana, namwizera kuko ampa amafaranga ariko ibyo kuvuga ngo arankunda sinabyemeza!”

Hari abajya guhura baramenyaniye nko kuri Facebook amatsiko ari menshi, ariko buri umwe akabanza kwanga guhita yiyereka mugenzi we atarabona imiterere ye, bitabujije ko hari n’abahita bakwepana ku mpamvu yuko umwe asanze uko yari yiteze mugenzi we atariko ameze.

Bimwe mu biganiro by'abahuriye ku mbuga nkoranyambaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza