Guhimisha uwo mwashakanye guceceka bishobora kubasenyera

Yanditswe na Emma-Marie Umurerwa
Kuya 13 Gicurasi 2018 saa 05:06
Yasuwe :
0 0

Ibibazo hagati y’abashakanye bikemuka binyuze mu biganiro bihuje impande zombi, iyo bidakozwe umwe muri bo akaruca akarumira bishobora gusiga urugo rurindimutse bidateye kabiri.

Kutumva ibintu kimwe bitewe n’impamvu runaka hari igihe bituma umwe mu bashakanye afata icyemezo cyo guceceka mu rwego rwo kwirinda intonganya mu gihe hari n’ubikora agamije guhima mugenzi we.

Nubwo hari ababona guceceka nk’umuti, inkuru dukesha Réveillez-vous ivuga ko uyu mwanzuro udashobora gukemura ikibazo abashakanye bafitanye kuko bishobora gufatwa nk’agahimano.

Mu muburo wayo itangaza ko “Ubundi ikibazo bafitanye ntikiba gikemutse kandi bombi birababangamira kuko bamwe mu bagabo n’abagore banga kuvugisha abo bashakanye bagira ngo babihimureho. Reka tuvuge ko umugabo ateganyije ibyo azakora mu mpera z’icyumweru atagishije inama umugore we. Umugore arabimenye maze ararakara kandi abwira umugabo we ko atamwitaho. Umugabo na we ahise amubwira ko arakazwa n’ubusa. Umugore akikubita akagenda maze kuva ubwo agaceceka.’’

Kumara igihe runaka abashakanye batavugana bishobora gutuma batuza mu gihe bazabiranyijwe n’uburakari, gusa mu gihe bibaye uburyo bwo kwihimura no kugera ku byo wifuza, nta kindi bimara uretse kongera ubukana bw’amakimbirane mufitanye no kudakomeza kubahana.

Ubushakashatsi bwagaragaje ko uburakari bwinshi bushobora gutuma umuntu agira umuvuduko ukabije w’amaraso, akarwara umutima, akiheba kandi akagira ibibazo by’igogora, kudasinzira, guhangayika cyane, kurwara indwara z’uruhu no guturika imitsi yo mu bwonko.

Guhisha uburakari na byo bishobora kukugiraho ingaruka kuko kubigumana ni nko kugendana uburwayi bukwangiza buhoro buhoro. Ibi bishobora gutuma uba umurakare cyangwa ugahora unenga uwo mwashakanye. Iyo myifatire ishobora kukwangiza kandi igatuma ubana nabi n’uwo mwashakanye.

Uko wakwirinda guhimisha uwo mwashakanye guceceka

Intambwe ya mbere yo kwirinda kugwa muri uwo mutego ni ukumenya ko ubwo atari bwo buryo bwiza bwo gukemura ikibazo.

Abahanga mu by’imibanire bagaragaza ko gutuza mu gihe uwo mwashakanye avuganye uburakari, wenda akakubwira ati “ntujya unyumva” cyangwa ati “uhora ukererwa” bidakwiye ahubwo ari ngombwa ko utahura icyo mu by’ukuri ashaka kukubwira. Urugero, niba avuze ati “ntujya unyumva” mu by’ukuri ashobora kuba yashakaga kukubwira ko udaha agaciro ibitekerezo bye.

Abanyarwanda baca umugani ko ururimi rwoshywa n’urundi. Mu gihe ubonye impaka zitangiye gufata indi ntera, hari icyo wakora kugira ngo uzihoshe.

Inama zigirwa abashakanye zigaragaza ko “kuvuga mu ijwi rituje no kwemera igitekerezo cy’uwo mwashakanye, ni ibintu by’ingenzi cyane bishobora gutuma mugenzi wawe acururuka kandi bigahosha amakimbirane. Akenshi ibyo ni byo biba bikenewe.’’

Ibi bijyana no kwita ku mico y’uwo mwashakanye, kubabarira, kuvuga ibikuri ku mutima kandi ufite amakenga no kumutega amatwi ukamwubaha.

Kuzirikana ko uwo mwashakanye ari mugenzi wawe musenyera umugozi umwe aho kuba uwo muhanganye, bizatuma utamurakarira cyane cyangwa ngo umutonganye kugeza ubwo wanga kumuvugisha bishobora gusenya urugo rwanyu.

Guhimisha uwo mwashakanye guceceka bishobora kubasenyera

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza