I Burengerazuba: Abageni bamaze ukwezi kwa buki batarabasha gutera akabariro

Yanditswe na Philbert Girinema
Kuya 8 Mutarama 2016 saa 08:18
Yasuwe :
0 0

Umugabo n’umugore imbere y’Imana bemerewe gukora imibonano mpuzabitsina mu gihe cyose bamaze gusezerana, bihawe umugisha n’umukozi wayo. Gusa mu Ntara y’u Burengerazuba hari ababyemerewe bananirwa kubikora kugeza ubwo bitabaje muganga.

Ngo inkuru mbarirano iratuba, ntabwo ubwirwa rimwe na rimwe abasha kumva uburemere cyangwa ukuri kwayo. Gusa ndakeka ko atariko biri bugende kuri iyi ivuga ku bageni bashakanye mu mpera za Kanama 2015, umusore ari imanzi ndetse n’umukobwa ari isugi bakaza kunanirwa gutera akabariro kugeza ubwo bitabaje abaganga.

Umubiri ugira ibyawo. Mu Ukwakira 2015, umunyamakuru wa IGIHE yahuriye n’uyu muryango ku Kigo Nderabuzima kimwe byo mu Ntara y’u Burengerazuba bamaze igihe kigera ku kwezi kumwe bashyingiranywe byemewe imbere y’Imana n’amategeko y’igihugu.

Hari byinshi uyu muryango wadutangarije, gusa udusaba ko twagira ibanga amazina yabo ariko inkuru igatangazwa kugira ngo abatekereza ko abantu bose basigaye bashakana barabanje kuryamana bamenye ko hakiri imanzi n’isugi mu gihugu.

Ubuhamya bw’umugabo

(Amazina yahinduwe) Nitwa Kamana André, twaje hano ku Kigo Nderabuzima kugira ngo duhure n’umuyobozi kuko twamusabye ko yatugira inama nyuma yaho tumaze ukwezi dukoze ubukwe ariko dufite ikibazo kitoroshye kuko gutera akabariro byatunaniye.

Njye (Kamana) ni ubwa mbere nari ngiye gukora imibonano mpuzabitsina, nta kibazo cy’uburwayi mfite kindi kuko ngira ubushake nk’abandi bagabo ariko iyo ngiye kubikora ndababara cyane kandi n’umugore wanjye nawe ni uko we ameze nk’uwahahamutse.

Iyo mbabaye ndabyihorera ngasaba umugore wanjye kumfasha nkabasha kurangiza, gusa we biragoye kumenya ko namushimishije niyo mpamvu twaje hano.

Ubuhamya bw’umugore

Njyewe rwose kubona igitsina cy’umugabo wanjye cyafashe umurego byanteye ubwoba, nabuze aho nihisha nkimubona, numvise ubwoba bunyishe, sinari narigeze nkinisha kuryamana n’umusore.

Umunyamakuru: Parrain na Marraine bababwiye iki igihe mwiteguraga gukora ubukwe?

Umugabo: Kuko atari yarize, nta kintu yigeze abimbwiraho, yumvaga ko mbizi neza nk’umuntu warangije amashuri yisumbuye.

Umugore: Njyewe numvaga ari ibintu bisanzwe, iyo marraine yashakaga ko tuganira icyo kiganiro cy’uburyo bafata umugabo mu buriri, nahitaga muganiriza ibindi nkamubwira ko mbizi nk’umuntu wize.

Nyuma y’amezi atatu bavuye kwa muganga, umunyamakuru wa IGIHE yasuye uyu muryango ngo amenye inama wahawe na muganga niba hari icyo zabafashije.

Umugore avuga ko kujya kwa muganga yumvaga biteye isoni ariko kuko yifuzaga umwana akabona nta kundi bizagenda, yahisemo kujyanayo n’umugabo we.

Uyu mugabo avuga ko nta kindi umuyobozi w’Ikigo nderabuzima yabavurishije uretse kubaha inama (counselling).

Kamana ati “Muganga yatubwiye ko kubabara bibaho ku bantu bakoze icyo gikorwa bwa mbere, gusa yanatubwiye ko kuba twarashakanye tutarajyaga tubiganiraho aricyo cyatumye umugore wanjye antinya ndetse nanabigerageza nkababara noneho we (umugore) akavuza induru nkamureka.”

Ikindi ngo yabahaye film zigaragaramo abantu bari gukora imibonano mpuzabitsina (pornography), maze ababwira kuyirebera hamwe bari mu cyumba, nyuma bakazagaruka kumubwira uko bimeze.

Bavuga ko batashye bagakurikiza inama bagiriwe ndetse n’iyo film bakayirebera hamwe (batiye machine laptop) maze ibyari byarananiranye birashoboka.

Ngo ku munsi wa mbere n’ubundi umugore yararize ariko umugabo yaramuretse akora uko muganga yamubwiye kuko nta kindi yagombaga gukora.

Kwa muganga ntibasubiyeyo

Kamana yabwiye umunyamakuru ko batigeze basubira kwa muganga kuko icyo bamushakiraga bari baragishoboye, gusa ngo baramuhamagaye kuri telefoni baramushimira.

Yabeshyaga ko ari umugabo uhamye…

Umusore avuga ko abamubazaga muri icyo gihe atari yakabashije gutera akabariro, yababwiraga ko ibintu byagenze neza ngo kuko kuvuga ko ntacyo yabashije byamuteraga ipfunwe.

Umugore we ngo yabwiraga bagenzi be yasize bakiri abakobwa ko bazabyibonera nibashyingirwa.

Inama bagira abasore n’inkumi

Uyu muryango uvuga ko ugira inama abasore n’inkumi ngo bajye baganira ibintu byose mbere yo gushyingirwa ariko kandi ko badakwiriye gukora imibonano mu gihe batarashyingirwa.

Uko bakundanye

Uyu musore wananiwe gutera akabariro agafata icyemezo cyo kujya gushaka umuganga yashyingiwe afite imyaka 24 naho umugore we afite imyaka 25, bose bakundanye biga mu mashuri yisumbuye mu mwaka wa Gatandatu.

Bashyingiwe bamaze imyaka itandatu bakundana ariko ibintu byo guhura kenshi ngo barabyirindaga nubwo bari batuye ku musozi umwe kugira ngo batazakora icyaha cy’ubusambanyi dore ko ari abakirisitu bemeza ko bubaha Imana.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244