Ibintu by’ingenzi ugomba gutekerezaho mu ijoro ribanziriza iryo gushyingirwa

Yanditswe na
Kuya 9 Ukuboza 2016 saa 10:58
Yasuwe :
0 0

Bitewe n’uburemere umunsi w’ubukwe uhabwa, benshi bawitegura mu buryo buhambaye bashaka ko uzababera urwibutso rw’iteka. Hari abo usanga barateguye ibijyanye n’ijoro ryabo rya mbere ryo gushyingirwa, hakaba n’abaterera agati mu ryinyo bikamera nkaho ntacyo bibabwiye cyangwa batazi n’ibyo aribyo.

Umunsi w’ubukwe ugomba kugusigira ibintu utagomba kwibagirwa mu buzima bwawe, iyo rero bitatekerejweho bishobora gutuma usigarana inzibutso mbi muri wowe.

Hari ibintu umukobwa ugiye gushyingirwa agomba gutekerezaho bijyanye n’ijoro ribanziriza umunsi wo gushyingirwa kuko kutabimenya bishobora kumutera ikibazo gikomeye.

1. Kumenya koroshya ibintu

Bitewe n’uko gutegura ubukwe bivuna ku mpande zombi, umusore cyangwa inkumi bose baba barananijwe n’imyiteguro, uba ugomba gufata ibintu nk’ibyoroshye.

Mu ijoro ribanziriza iryo muzashyingirwamo mugomba kumva ibintu kimwe ku buryo umunsi w’ubukwe mwese muba muhuza nta gusobanya.

Birababaza iyo umunsi w’ubukwe ugeze umugabo cyangwa umugore hari ibyo batarimo kumva kimwe bari mu byerekezo bitandukanye.

2. Gutekereza ku mibonano mpuzabitsina

Kuba wararyamanye n’uwo mugiye kubana mbere y’ubukwe, ntibivuga ko ubwo ibintu byose bijyanye n’imibonano mpuzabitsina ubizi. Ugomba kumenya ko imibonano wakoze mbere y’ugushyingirwa itandukanye cyane n’imibonano uzagira umunsi wo gushyingirwa.

Hari ibintu uzakora utakoraga ku buryo umugabo wawe azakwishimira birenzeho. Rimwe na rimwe hari ibyo umuntu aba yiteze uko biri bugende, ariko iyo byanze urababara cyane; bisaba ko byose ubitekereza mbere ndetse n’uburyo uzabikoramo.

3. Iyibagize ahashize hanyu

Mu ijoro ribanziriza iryo uzashyingirwamo, ugomba kwiyibagiza ibyo wagiye unyuramo n’umukunzi wawe. Ugomba gusaba Imana ikaguhindura kuko ugushyingiranwa niryo ntangiriro y’urukundo ku bashakanye ntabwo ari iherezo ryarwo.

Ugomba kumva ko mu rugo uzahora uri ku ishuri wiga ibintu bishya kurenza ko wakwishyiramo ko mu buzima nta gishya kibamo.

Abemera Imana bavuga ko ubuzima bw’urugo iyo butaragijwe Imana busenyuka, ni byiza rero ko uburagiza Imana no mu ijoro ribanziriza iryo kubwinjiramo.

4. Tekereza ko atari ibintu byoroshye

Ugomba gutekereza ko uzasoma umugabo wawe utamwishisha, hari ubwo byagutera ubwoba n’isoni ariko tekereza ko bizabaho. Ugomba kuzirikana ko ibyo ubona muri za filime atari byo nyirizina bizakubaho kuko buri rugo rwubakwa ukwarwo.

Hari ubwo umuntu ashyingirwa yagera mu cyumba yabona umugabo we uko ateye agaseka cyangwa akanga ko bajyana mu bwiyuhagiriro. Ibi si byiza, wowe ugomba kugenda uziko utazabikora.

5. Menya ko muzaganira

Mbere y’ijoro uzashyingirwamo ugomba kumenya ko mu ijoro ryanyu rya mbere mwashyingiwe muzaganira, akamenya icyo ubitekerezaho, akakumara impungenge ufite zo mu buriri.

Ugomba kumubwira uko wumva umerewe mu gikorwa cy’abashakanye, ntabwo wavuga ngo aribuze kubyimenyera kuko ntabwo aba azi niba urimo kubyishimira nk’umunsi wanyu wa mbere cyangwa birimo kukubabaza.

6. Kwishimira imibonano by’umugore ni mu mutwe

Menya ko kugira ngo uzashimishwe n’imibonano mpuzabitsina bitangirira mu mutwe wawe.

Mbere y’uko ushyingirwa ugomba kumenya ko ugomba kujya mu gikorwa wagishyize mu ntekerezo, wacyitayeho kuko aribwo gishobora kukuryohera.

7. Imibonano mpuzabitsina ishobora kukubaza

Menya ko niba aribwo bwa mbere ugiye gukora imibonano mpuzabitsina ishobora kuzakubabaza mu ijoro rya mbere. Niko kuri guhari , ugomba kubabara gahoro igihe utabigizemo ubwoba bwinshi.

Hari imikaya iba igiye gutangira gukora yari imaze igihe idakora, ugomba rero kubifata nkaho uri muri siporo ugakomeza kujya uzikora aho kuzitinya.

8. Umunsi wo gushyingirwa ni ijoro ryo gutangira gukundana kwanyu

Ugomba kumenya ko ijoro ryo gushyingirwa aribwo ugomba gutangira gukunda cyane uwo mwashakanye niyo ibyo wari umwitezeho byaba atariko byagenze.

Ijoro ryo gushyingirwamo riba rimwe, niyo mpamvu ugomba kuryitwaramo neza rikagusigira urwibutso ruzatandukana n’andi majoro yose.

9. Wikwishyiramo ko gutera akabariro ariho ruzingiye

Ugomba no gutekereza ku bijyanye n’imibanire yawe n’uwo mugiye kujya mubana amanywa n’ijoro.

Ese ndamwubaha, ndamutetesha, mwitaho se? Kuko ibyo byose iyo bigenda neza nibwo n’ibyo gutera akabariro bibashimisha.

10. Ugomba kugira umujyanama mwiza

Kuko mu buzima hatabamo ibyiza gusa, ugomba gutekereza ko mbere yo kwinjira mu rugo ugomba kugira umujyanama mwiza, ushobora kwiyambaza ukamubwira ikikuri ku mutima igihe hari ibitagenda neza.

Ntuzahaguruke ngo ujye gushyingirwa utarabona inkoramutima wakwisangaho igihe ubuzima bw’urugo bwagushavuje.

Hari byinshi buri wese yatekerezaho mu ijoro ryo kujya gushinga urugo haba ku musore cyangwa se inkumi gusa icy’ingenzi ni uko mutakwibagirwa gusenga Imana ngo ibibafashemo.


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza