Ibyo ukwiye kwitaho igihe uwahoze ari umukunzi wawe agusaba andi mahirwe

Yanditswe na Philbert Girinema
Kuya 21 Mata 2016 saa 11:24
Yasuwe :
0 0

Birasanzwe ko uwo mwigeze gukundana nyuma mukaza gutandukana agusaba ko mwasubirana, nyuma yo kwitekerezaho no gusanga warasize icyuho mu buzima bwe.

Mbere yo kumuha ayo mahirwe ariko ugomba kubanza gutekereza ukibaza niba koko bikwiye.

Hari ubwo mushobora gusubirana ugasanga mubanye neza kurusha mbere, hari n’igihe ariko ushobora gusanga uri guta umwanya.

Niyo mpamvu urubuga El Crema rugira abantu inama yo kubanza gutekereza ku bintu bikurikira mbere yo gufata umwanzuro wo gusubirana n’uwahoze ari umukunzi wawe cyangwa se kumwima ayo mahirwe.

1. Menya impamvu akugarukiye

Igihe uwahoze ari umukunzi wawe agarutse agusaba ko mwasubirana icyo ukwiye kwibazaho no gutindaho si ukuba agarutse ahubwo ni impamvu itumye ashaka kugaruka.

Ese agarutse kubera kuko yumva adashoboye kubaho wenyine akaba akeneye kugira uwo baba bari kumwe cyangwa se ni uko amaze gutandukana n’uwo bakundanye nyuma yawe?

Ese aho ntiyaba agarutse kubera ko yatekereje agasanga hari amakosa yakoze yatumye mutandukana bityo akaba ashaka kuyakosora?

Ibi byose ni ibibazo ukwiye kwibaza nawe ukabimuza ndetse ugafata umwanya wo kureba niba ibisubizo yaguhaye ari ukuri ukabona gufata umwanzuro.

2. Impamvu yatumye mutandukana

Ikindi kintu ukwiye kubanza kumenya mbere yo gufata icyemezo ni impamvu yatumye mutandukana.

Ukwiye kubanza kumenya niba mwaratandukanye kubera ikintu runaka mutabashaga kumvikanaho cyangwa se niba ari uko yari afite undi ashaka kugusimbuza cyangwa yaguciye inyuma.

Niba mwaratandukanye kubera ko hari ibyo mutari muhuje bigatuma muhora mu ntonganya, gusubirana nawe ntabwo ari icyemezo cyiza keretse mubanje kuganira ku buryo muzakemura ibyatumye mbere mutabasha kubana.

Biramutse byaraturutse ku kuguca inyuma, aha naho ugomba kubanza kwitonda kuko ushobora gusanga ariko ateye akazanabikomeza nyuma yo kumuha andi mahirwe.

3. Uko mwari mubanye mbere yo gutandukana

Ese mbere yo gutandukana wabona umubano wanyu uhagaze ute? Ese wabonaga mwese muri mu rukundo koko?

Niba warabonaga umubano wanyu ufite aho uganisha icyo gihe biroroshye gukemura ibyatumye muca ukubiri mukaba mwakomezanya.

Niba ariko urukundo rwanyu rutari rukomeye, rushingiye ku mibonano mpuzabitsina gusa cyangwa umwe muri mwe ataragaragazaga ubushake bwo kuba mwakundana iteka, ntukwiye kwirirwa usubirana nawe kuko n’ubundi nta cyerecyezo urukundo rwanyu ruba ruzigera rugira.

4.Ese urumva uzongera kumwizera

Icyizere ni kimwe mu bintu bya mbere bikenewe kugira ngo urukundo rukomere kandi rushinge imizi.

Mbere yo gufata umwanzuro wo kongera gusubirana n’uwahoze ari umukunzi wawe ugomba kubanza ukibaza niba muri wowe wumva ufite ubushobozi bwo kuzongera kumwizera.

Igihe wumva udateze kuzongera kumugirira icyizere nta n’impamvu yo kwirirwa umuha andi mahirwe kuko n’ubundi mudashobora kurambana.

Kongera kumwizera kandi bijyana n’uburyo wumva ukimutekereza n’urukundo ukimufitiye.

Niba wumva waramuzinutse ku buryo buri uko umubonye cyangwa umutekerejeho umutima wawe ushengurwa n’agahinda, ibyo kumuha andi mahirwe ba ubyibagiwe.

5.Ese yiteguye gukora iki ngo umugarukire

Igihe uwahoze ari umukunzi wawe ari kugusaba ko mwasubirana ntugomba kumwemerera utarabanza kumenya intambara n’urugamba yiteguye kurwana ngo yongere yegukana umutima wawe.

Niba ntacyo yigeze akora ngo arwanye ko mutandukana, kwihangana n’igihe bizamutwara ngo musubirane biri mubizakwereka ko koko afite ubushake bwo gusubirana nawe kandi atazongera gutuma mutandukana.

6.Ese watangiye ubuzima bushya

Niba nyuma yo gutandukana warabonye undi mukunzi cyangwa se ukaba waramaze kwibagirwa ibijyanye nawe byose, nta mpamvu yo kongera kugirana umubano nawe.

Ntukwiye gusubirana nawe kubera ko umufitiye impuhwe ariko mu mutima wawe bitakurimo kuko n’ubundi n’iminsi mike mushobora kongera gutandukana.

7. Mufate umwanya wo gukemura ibyo mutumvikanaho

Nyuma yo kureba ziriya ngingo twavuze haruguru ukumva ushaka ko koko gusubirana n’uwari umukunzi wawe, mugomba gufata umwanya mugasasa inzobe, mugakemura bya bindi byose byababangamiraga mbere mutaratandukana.

Mugomba gushyira ku murongo ibintu byose byabitambitse bigatuma mutandukana kuko bidakemuwe byatuma n’ubundi umubano wanyu udatera intambwe.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza