Imyitwarire ishobora kugira uruhare mu isenyuka ry’ingo

Yanditswe na Umutoni Rosine
Kuya 29 Ukuboza 2016 saa 08:59
Yasuwe : XX
0

‘Tuzatandukanywa n’urupfu’ ni rimwe mu magambo agize indahiro hagati y’abakundanye biyemeje gusezerana kubana ubuzima bwabo bwose kugeza batandukanyijwe n’urupfu. Nyamara nubwo ibi baba barabirahiriye imbere y’amategeko ndetse n’ukwemera kwabo, ntibibuza ko umunsi ku munsi humvikana ingo zisenyuka hadaciye kabiri.

Urubuga Patheos rusanzwe rutanga inama zifasha abashakanye kurushaho kubana neza ruvuga ko uku gutandukana ahanini usanga guturuka ku myitwarire y’umwe mu bashakanye ituma bananirwa kwihanganirana.

Uru rubuga ko rukomeza ruvuga ko abashakanye baramutse bashoboye kwirinda imyitwarire ikurikira, hari icyizere ko amakimbirane mu ngo n’umubare wa gatanya byagabanuka.

Guhishanya ibyo muvugira ku mbuga nkoranyambaga

Nubwo imbuga nkoranyambaga ari bumwe mu buryo bworoshye butuma abantu barushaho kuganira no kwegerana, uramutse utitwararitse zishobora kuba imbarutso y’ibigeragezo n’amahari mu rugo rwawe.

Iyo utangiye guhisha uwo mwashakanye ibiganiro uba wagiranye n’abo muhurira ku mbuga nkoranyambaga, cyangwa ukaba ufite imbuga usura ariko utifuza ko abimenya, uba uri kwikurura ibibazo kuko bituma atangira gutakaza icyizere yakugiriraga.

Haranira kuba umunyakuri no kutagira icyo umukinga, imbuga nkoranyambaga zikubera uburyo bwo gutuma murushaho kwegerana aho gutuma mwishishanya.

Kubika inzika

Baca umugani mu Kinyarwanda ngo ‘Ntazibana zidakomanya amahembe’; nk’abantu ntabwo bishoboka ko mubaho umwe atagira ikosa akorera mugenzi we.

Niba wifuza ko umubano wanyu ukomeza kuba mwiza, ihutire kwemera ikosa no gusaba imbabazi uwo mwashakanye igihe wamukoshereje. Uwakosherejwe nawe aba akwiye gutanga imbabazi.

Abashakanye bakwiye kwirinda kubika inzika kuko aribyo bikunze kuba intandaro yo gucyurirana no gukoresha amakosa y’ahashize nk’intwaro yo kubabazanya.

Igihe abashakanye badafite umutima wo kubabarirana igihe habayeho gukosa, urugo rwabo ntirushobora kuramba kuko bituma bahora mu ntonganya zidashira.

Kuvangura umutungo

Gushyira hamwe ni imwe mu ntwaro zituma abashakanye barushaho kubana neza. Iyo bashakanye bafite konti imwe muri banki bituma bose bafatanya kugenzura uko umutungo w’urugo ukoreshwa.

Iyo batangiye kuvangura ariko niho bigera ugasanga buri wese arigenga ku kintu runaka yita icye ku buryo bigeraho n’ubuzima babamo bugatandukana.

Urugo ni uguhuza byose, iyo mwatangiye kubigabana muba muri kwerekeza mu nzira yo gutandukana.

Guha abana umwanya uruta uwo uha mwashakanye

Umwana n’imbuto y’urukundo iba itegerezanyijwe amatsiko n’ubwuzu bwinshi hagati y’abashakanye ku buryo iyo ahageze usanga buri wese amuharira umwanya we hafi ya wose.

Hari n’abagera kuri rwa rwego usanga batakibona umwanya wo kuganira no kwishimana nk’abashakanye ku buryo iyo abana bamaze gukura ku buryo biba ngombwa ko batangira kwibeshaho, ababyeyi bisanga umubano wabo utakimeze neza nka mbere.

Kwaguka k’umuryango ntibikwiye kuba intandaro yo gutandukana ahubwo buri wese yagakwiye guharanira guhora hafi y’uwo bashakanye kandi n’abana babo bakarushaho gukurira mu muryango wuje urukundo.

Gufata icyemezo utemeranyijweho n’uwo mwashakanye

Kugishanya inama no gufatira hamwe imyanzuro itandukanye ni ingenzi cyane hagati y’abashakanye kuko bituma barushaho gufatanya no gushyigikirana.

Rimwe na rimwe bibaho ko umwe mu bashakanye ashobora gufata icyemezo ku kintu runaka wenyine bitewe no kumva ko wenda ariwe uri mu mwanya mwiza.

Nyamara aba yirengagije ko ibyo akora byose nta kabuza bigira ingaruka ku mufasha we n’umuryango wose muri rusange.

Gutegura uko uzabaho nimuramuka mutandukanye

Abashakanye bifuza kubana neza mu mahoro n’urukundo birinda ijambo gutandukana mu buzima bwabo bwa buri munsi.

Iyo iteka iri jambo rihora mu kanwa kanyu, bituma mutangira gutekereza uko muzabaho nyuma y’uko mutandukanye; ugasanga bitwaye umwanya mwagakwiye gukoresha mushaka icyatuma ibibazo mufitanye bikemuka.

Burya ababasha kurambana s’uko baba batarigeze bahura n’ikibazo gishobora kubatandukanya ahubwo n’uko baha agaciro ikibahuje kurusha ikibatanya.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza