Irushanwa ku nkuru z’urukundo: Izihiga izindi zamenyekanye

Yanditswe na Larissa Kanamugire
Kuya 12 Gashyantare 2016 saa 05:30
Yasuwe : XX
0

Inkuru z’urukundo eshatu zahize izindi mu irushanwa ryateguwe na IGIHE Ltd zamenyekanye nyuma y’amajonjora yakozwe mu nkuru zirenga 60 zoherejwe n’abitabiriye irushanwa.

Hari hashize icyumweru iri rushanwa ngarukamwaka ritangijwe, ndetse uko imyaka ishira niko abitabira irushanwa bagenda biyongera.

Mu nkuru zirenga 60 zoherejwe, 46 ni zo zari zujuje ibisabwa, akaba ari zo zasangijwe abasomyi (kanda hano uzisome).

Kugira ngo inkuru yemerwe bimwe mu byasabwaga harimo kuba yaragombaga kuba ari inkuru mpamo y’urukundo rw’uwayanditse; yoherejwe muri “format” ya “word” ndetse itarengeje amagambo 1000.

Mu gutanga amanota ku nkuru hakaba hibandwa cyane cyane ku buryo inkuru yanditsemo. Ni ukuvuga uko ibitekerezo bikurikirana; ubutumwa buri mu nkuru ndetse n’ uburyohe umwanditsi yagerageje gushyira mu nkuru ye.

- Inkuru yaje ku mwanya wa mbere ifite umutwe ugira uti “Isine isa n’inyambo”, ni inkuru yanditse neza, ibitekerezo biyigize bitondetse neza ndetse ikaba yaranashimwe cyane n’abasomyi k’ubwo isomo ry’ubudahemuka ririmo.

Ibihembo byagenewe inkuru ya mbere birimo amatike abiri y’indege yo kujya Dubai yatanzwe na RwandAir; ifunguro rya nimugoroba ndetse n’ijoro rimwe muri kimwe mu byumba bya Hotel Villa PortoFino; Massage muri The Mirror Hotel; Mixer ya KONKA ndetse n’igishushanyo (portrait) cy’ ifoto abakundana bazaba bihitiyemo izakorwa na Inkstain.

- Inkuru iza ku mwanya wa kabiri ifite umutwe ugira uti "Nararose". Nk’uko abivuga mu nkuru ye, yitangiye umukunzi we mu buryo budasanzwe, benshi bumva “mu iyobokamana”.Ni inkuru itangira isa n’umuvugo ndetse inuzuye amagambo asa n’amakabyankuru. Uko uyisoma niko ugenda ugira amatsiko yo kumenya ibikurikira. Gukunda mugenzi wawe kurusha uko wikunda ntibishobora benshi, ni kimwe mu byatumye iyi nkuru iza ku mwanya wa kabiri.

Ibihembo nyir’inkuru n’umukunzi we bagenewe birimo amatike y’indege yo kujya mu gihugu kimwe I Burayi; Ifunguro rya nimugoroba ndetse n’ijoro rimwe muri kimwe mu byumba bya Galaxy Hotel iherereye mu Kiyovu; abonnement ya piscine ya Great Seasons Hotel mu gihe cy’amezi atatu; Tableau bazihitiramo yo muri La Ceremoniale ndetse na telephone ya KONKA.

- Inkuru iza ku mwanya wa gatatu ifite umutwe ugira uti "Namubonye rimwe, mutegereza imyaka irindwi". Inkuru ishimishije cyane, uko umanuka uri kuyisoma ugenda uta icyizere cy’uko bazongera guhura ukundi, ugatungurwa no kubona uburyo uwawe koko ntaho ajya. Si ibyo gusa kuko umwanditsi yagerageje gushyira ibirungo mu nkuru, hamwe usoma ukisanga wamwenyuye.

Ibihembo bigenewe uwanditse iyi nkuru ndetse n’umukunzi we birimo ifunguro rya nijoro ryo muri Great Seasons Hotel; ijoro rimwe muri The Manor Hotel; ifatabuguzi( abonnement) ry’ukwezi muri “gym” na “piscine” bya The Manor Hotel ndetse na K-Box yatanzwe na KONKA

N’ubwo twagiye dutangaza ko hazahembwa inkuru eshatu gusa, IGIHE Ltd yifuje guhemba izindi nkuru ebyiri nziza arizo “ Yampanaguye amarira y’urukundo” na “When two hearts become one” bakaba bagenewe amafunguro ya nimugoroba muri Restaurant Trattoria ndetse n’ijoro rimwe mu cyumba cya The Mirror Hotel.

Hari kandi indi nkuru yanditse neza ndetse yari ifite amahirwe yo kuba iya mbere ariko ubwo twavuganaga n’uwayanditse ngo tumumenyeshe ko yatsinze, yaje kutubwirira ko inkuru atari iye bwite, bikaba byatumye ikurwa mu irushanwa, akaba ari inkuru ifite umutwe ugira uti "… Njye namwise Shyaka

Dushimiye abitabiriye irushanwa bose kandi tubifuriza gukomeza gukundana urudashira, turashimira cyane n’abaterankunga bashyigikiye iki gikorwa aribo RwandAir, The Manor Hotel, Great Seasons Hotel, Hotel Villa PortoFino, The Mirror Hotel, Galaxy Hotel, Restaurant Trattoria, KONKA Group, InkStain na La Ceremoniale.

Tubonereho no kubifuriza umunsi mwiza wa St Valentin kuri mwese.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE