Kigali : Afite ubwoba ko uburanga bw’umukobwa bakundana bwatuma amusangira n’undi

Yanditswe na Herve Ugirumukunda
Kuya 18 Werurwe 2015 saa 07:40
Yasuwe : XX
0

Umusore ukundana n’umukobwa yita ikizungerezi yandikiye IGIHE asaba inama, nyuma yo kubona umugore mwiza waciye inyuma umugabo we akisohokanira n’umukinnyi w’umupira, nawe yagize impungenge ko umukunzi we ufite uburanga ahamya ko budasanzwe yazamusangira n’abandi.

Yatangiye agira ati “ Bavandimwe basomyi ba IGIHE, mbandikiye mbagisha inama. Nitwa Niyonkuru Dieudonne (amazina twayahinduye), mfite imyaka 27, maranye iminsi agahinda n’ikiniga ku mutima… Iyo nibutse ubuhamya bw’ibyo amaso yanjye yiboneye, umutima urashavura simbashe kuvuga, amarira akazenga mu maso.

Nakundanye n’umukobwa tukiri abana, duturanye, duhura kenshi dusabana, ariko mbifata nk’aho ari ibisanzwe. Ni umukobwa mwiza, mwiza pe! ni muri bamwe bita ab’igikundiro buri wese abona akavuga ati “koko uyu mwana ni mwiza!”

Umusore afite ubwoba ko uwo akunda yamuca mu myanya y'intoki (ifoto: Internet)

Uwo yacagaho wese ni ukuri yaramurangariraga ndetse abenshi bagahindukira, kandi, nanjye ubwo ubwiza bwe narabubonaga, yewe nkanabutangarira nk’abandi bose.

Bajyaga bakunda kumbwira ko abakobwa beza ngo uburanga bwabo butuma biyumva, ariko we siko namubonaga; oya, we yari umukobwa utuje, witonda kandi wubaha. Njye yaranyumvaga tukaganira ibi na biriya, iminsi yose tugahamagarana nta kibazo.

Uko gukomeza guhorana kenshi byaje kumviramo kumubenguka, muri njye ngenda niremamo urukundo rukomeye kuri we mu buryo nanjye ntamenye biza kugera aho namuburaga nkabura amahoro.

Numvaga tutari kumwe nkamukumbura. Namubona nkumva ibinezaneza ntazi aho biva, nkumva nahora mwirebera turi twembi twiganirira.

Sinashatse gukomeza kubihishahisha, naje kuza kumubwira ko mukunda, nawe ambwira ko ankunda dutangira urugendo rushya rw’abakundana dutyo. Icyo gihe nari ndangije Kaminuza nawe ari kurangiza amashuri yisumbuye, hashize igihe gito.

Natangiye akazi nuko ntangira gutegura uko nazabana nawe, ariko abantu bagahora banca intege bambwira ko ntakwiye gukundana nawe, kuko ngo ubwiza bwe butazatuma urugo rwacu rukomera ngo nzajya musangira n’abakire. Bahora bampa ingero, banyereka ko bitazarama ariko nkabareka nkica amatwi.

Akirangiza amashuri yisumbuye, umukobwa yarushijeho kuba mwiza cyane; atereka imisatsi noneho koko bwa buranga bwe bukarushaho kugaragara agatima kanjye gatangira kujya gakubita ku magambo inshuti zakunze kujya zimbwira.

Mu by’ukuri maze amezi make mbonye ingero ebyiri z’ingo ziheruka gusenyuka ahanini umugabo ufite umugore mwiza yashwanye n’umugore we kubera abandi bagabo bamwirukaho. Ibi bintu byanshenguye umutima.

Mu minsi mike ishize nabikoze nkana ntangira gutembera utubare neka ngo ndebe koko ko abagore b’ibizungerezi basohokanwa n’abandi bagabo. Nabaye nk’ukubiswe n’inkuba ubwo nasangaga umugore w’umugabo duturanye nawe w’ikizungerezi yasohokanye n’umukinnyi w’ikipe y’amaguru izwi hano mu Rwanda. Basomanira imbere yanjye ndabibona.

Nahise ntangira gutekereza ku uwo nita umukunzi wanjye, n’ubwo ntari namufatira mu cyuho, nawe bishobora kuzamubaho kubera uburanga bwe. Mfite ibibazo by’urudaca bisibanira mu mutima wanjye. None twazabana agahinduka, abandi bagabo bakamutwara?”

Inama twamugira: Uburanga bw’umugore ntaho buhuriye no kuba yaca inyuma uwo bashakanye agasohokana n’abandi bagabo. Niba koko nk’uko wabivuze utari wafatira umukunzi wawe mu cyuho, nta n’impamvu yo kumva amabwire ngo unashingire kubyo wabonye kuri uwo mugore w’umuturanyi wawe , uhite wumva ko n’uwo mukobwa mukundana bizamubaho nimumara kubana.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza