Kigali:Ibitekerezo bitandukanye ku isendwa ry’umugore wivuyemo

Yanditswe na Philbert Girinema
Kuya 29 Ugushyingo 2015 saa 08:41
Yasuwe :
0 0

Umugore wo mu gace kamwe ka Kigali yabwiye umugabo we ko imwe mu nshuti ze yamusabye ko bakora imibonano mpuzabitsina, umugabo ntiyabyihanganira ahita amubwira ko agomba guhita amuvira mu rugo.

Iki cyemezo nticyavuzweho rumwe n’abagore ndetse n’abagabo batandukanye.

Bamwe mu nshuti z’uyu mugore bamushinja kuba umupfayongo, ubwo yabwiraga umugabo we ko imwe mu nshuti ze yamusabye ko bakorana imibonano mpuzabitsina, abandi bati uyu mugore ni intwari , umugabo niwe wabuze ubushishozi.

Umwe mu bagore b’inshuti z’uwasenzwe yagize ati “Hari umugabo w’inshuti magara yo kwa [...] yasabye umugore we ko bakora imibonano mpuzabitsina akajya ahora amutitiriza, umugore ageze aho abibwira umugabo kuko yari arambiwe. Umugabo ntiyumvise ko umugore amubwije ukuri ngo amugire inama, ahubwo yahise amwirukana ngo amuvire mu rugo.”

Undi ati “Uyu mugore yivuyemo ni umupfayongo, abagabo ntibabwirwa byose, kuko ubwo yahise yumva ko byanze bikunze babikoze (bakoze imibonano mpuzabitsina) uwo mugore niwe wizize.”

Icyo bamwe mu bagabo babivugaho...

Imvugo z’abagabo batandukanye ku byakozwe na mugenzi wabo muri aka gace ziratandukanye, dore ko bamwe bashima ibyo yakoze, abandi bakamugaya.
Rudasingwa John ni umuturanyi w’uyu muryango, yatangarije IGIHE ko mugenzi we yafashe icyemezo cya kigabo.

Ati “Umugabo w’inshuti yawe, musangira akabisi n’agahiye ntashobora kuguteretera umugore, uriya mugore wa [ ...] ni we wamushotoraga. Umugabo yakoze kuba yamwirukanye, najye iwabo abanze ashyire ubwenge ku gihe.”

Ntabanganyimana nawe ni umuturanyi w’uyu muryango , anenga ibyo mugenzi we yakoze. Ati “Uyu mugabo yakoze amakosa akomeye , umugore we yamubereye imfura amubwiza ukuri yari akeneye inama , yagombaga kumuba hafi akamubwira uko azajya yitwara kuri iyo nshuti y’umuryango ntiyagombaga kumwirukana.”

Kubwizanya ukuri hagati y’abashakanye ni imwe mu nkingi zibafasha kubaka urugo rutemba amahoro, ariko kandi kuganira ku bitagenda neza cyangwa icyo babona gishobora kubangamira umubano wabo, bikwiye gukoranwa ubwitonzi n’ubushishozi buhagije, hirindwa icyahungabanya imibanire yabo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244