Mugabo w’imyaka 32 ntaratereta, ntaranabwira umukobwa ijambo ndagukunda

Yanditswe na Philbert Girinema
Kuya 11 Nyakanga 2016 saa 12:03
Yasuwe :
0 0

Umuhanzi niwe wagize ati ni inde utazi ko gukunda biryoha, biruhura umutima cyane iyo ufite ukwitaho ndetse rimwe na rimwe uteganya ko muzabana akaramata. Undi yungamo ati nta buzima, nta mahoro na mba kubera intinyi yo kunanirwa kumubwira ko mukunda.

Hari abasore usanga bakundwa, abakobwa bababona bagatitira ubwuzu bukabarenga ariko bagategereza ko hari akajambo kanyura umutima bazabwirwa amatwi agahera mu kirere.

Ni umusore w’imyaka 32 warangije icyiciro cya Kabiri cya Kaminuza muri Kaminuza y’u Rwanda mu mwaka wa 2013. Avuka mu Karere ka Muhanga mu Ntara y’Amajyepfo.

Kuva yamenya ubwenge avuga ko atari yatereta umukobwa ngo nibura akinishe no kuvuga ijambo ndagukunda, ubu yibaza aho azahera kuko nyina amumereye nabi amusaba gushaka umugore.

Mu kiganiro Mugabo (amazina yahinduwe) yagiranye n’umunyamakuru wa IGIHE yatangaje ko mu mabyiruka ye nta kibazo yagiranaga n’abakobwa ndetse ko banamukundaga cyane gusa ngo nyina iyo yamubonanaga nabo yaramutukaga akamubwira ko ashaka kuzaba ikurumbo kuko ari we muhungu wenyine yabyaye.

Ati “Nkinga mu cyiciro rusange (tronc commun) nari umuntu ukunzwe cyane n’abakobwa kuko nari mukuru, ariko kuko twari dutuye hafi y’ikigo nigagaho , mama yakoraga uko ashoboye akarara ambonye akanyihanangiriza ko abakobwa ari babi nimbishinga nta kintu nzageraho.”

Uyu musore ngo arangije amashuri y’icyiciro rusange yagiye kwiga kure y’iwabo ariko nabwo mu kigo cyari icy’abahungu gusa maze aguma muri bwa buzima bwo kudatinyuka abakobwa. Niyo yageraga mu biruhuko yakoraga uko ashoboye ngo nyina atamubonana n’umukobwa uwo ariwe wese kuko yari yarabamubujije.

Agiye muri Kaminuza yabaye umurokore utinya icyaha

Mu kiganiro yagiranaga n’umunyamakuru, Mugabo yatangaje ko ageze muri Kaminuza yabaye umurokore wo mu rwego rwo hejuru utinya icyaha akagera naho yumva ko kuba yabwira umukobwa ko amukunda kandi adateganya ubukwe vuba byamubera icyaha gishobora kumurimbuza.

Ati “Ngeze muri kaminuza nabaye umurokore wo mu rwego rwo hejuru. Kubera uko ku bijyamo n’ubushyuhe bwinshi nibwiraga ko ndamutse mbwiye umukobwa ko mukunda kandi ntateganya ubukwe bishobora kumbera icyaha cyandimbuza.”

-  Umunyamakuru amubaza aseka ati “kandi bivugwa ko abarokore bazi gutereta?”

-  Mugabo ati “njyewe siko nabyumvaga, numvaga ahubwo mbagiriye impuhwe nkanabasengera uko nsenze, mbereka ko urwo rukundo rwabatura mu bishuko”

Uyu musore ngo uko yakomezaga kwirundurira mu gakiza ibyo gukundana n’abakobwa byagendaba bimuvamo bigeza naho bamuhimba akazina ka pasiteri.

Ati “Byageze aho bakajya banyita pasiteri, nibazaga rero ukuntu bazambona mpagararanye n’umukobwa cyangwa nagiye kumusura nkumva nabangayitse ndabireka burundu.”

Ndi umuntu utinya guhemukirwa

Mugabo ngo hari ubwo byamuzagamo agakunda umuntu akumva agiye ‘gupfa’ ngo ariko akibaza icyakurikiraho aramutse ahakaniwe.

Ati “Hari ubwo byambayeho rimwe niga mu mwaka wa nyuma wa kaminuza, nkunda umukobwa birandenga ariko nkibaza ko ampakaniye namaze kwivamo kubyakira byambera ikibazo gikomeye, noneho ndeka kubimubwira.”

‘Mama wanjye amereye nabi ngo ndongore’

Uyu musore utaratera umukobwa na rimwe cyangwa ngo akinishe gukoresha ijambo ndagukunda ngo ubu ari ku gitutu cya nyina umuhoza ku nkeke ngo arongore.

Ati “Iyo mbwiye mama ko nkirimo kwitegura ngo nzakore ubukwe bwiza arambwira ngo basi mbe muzaniye uwo mukobwa amurebe abone kuntera inkunga.”

Urugano rwo ngo byahumiye ku mirari kuko bamubwira ko impamvu y’iyi ntinyi ari uko atanywa inzoga.

Ati “Abasore dukorana buri gihe usanga bambwira ko impamvu nta nshuti mfite mbiterwa no kutanywa inzoga ngo ngire akanyabugabo.Abandi dusengana abo nisanzuraho bose ndabaruta nkumva ko kubagisha inama byatuma banyuzamo ijisho. Ahubwo mungire inama.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244