“Nugururiwe n’Inyange” Inkuru mpamo y’urukundo (Video)

Yanditswe na Claude
Kuya 5 Werurwe 2015 saa 10:49
Yasuwe : XX
0

Nugururiwe n’inyange ni inkuru mpamo y’urukundo rwa babari, Leonidas Nshimiyimana, na Esther Abayisenga, ikaba yaratsinze amarushanwa y’inkuru z’urukundo yari yateguwe na IGIHE Ltd ku munsi mukuru w’abakundana.

Iyi nkuru, irimo umusore wasiragijwe n’abo yise ibikona bakamutera kuzinukwa gukunda. Gusa ntibyatinze yugururirwa n’inyange, ariwe mugore we ubu, ava ku izima aca ukubiri no kuzinukwa yemera isezerano ry’uwo muhoza we.

Mu nkuru yabo bagira bati:

“Nyuma y’ibyumweru bitatu, nagiye ku kazi bisanzwe.Ngezeyo nasohoye ipikipiki nakoreshaga ngo njye mu misozi.Ngeze mu nzira nasanze nibagiwe ibyangombwa bya moto, ndakata nsubira ku kazi, mparika moto hanze ninjira mu biro kubifata.

Nsohotse natunguwe no kubona umukobwa uri kwireba mu ndorerwamo ya moto yange, ndamwegera, ambonera mu ndorerwamo nza arunamuka.

Yubuye amaso arandeba, ndebye amaso ye meza manini mbona ibishashi byuzuye mu maso yange n’ubwonko numva burahindukiye; gusa nihagararaho ngirana akaganiro gato nawe gakurikira:

Njyewe: Karibu mwageze kwa muganga. Murifuza iyihe serivisi ngo mbayobore?

We (aseka): Murakoze kuduha karibu gusa ntabwo nje kwivuza.

Njyewe: Okay, noneho mwampa akanya ngafata moto nkajya mu kazi.

We (ahita ayicaraho): Iyi moto se ko ari iy’ikigo cyacu, wowe ukaba utari umukozi wa hano, uyijyanye ute kandi mu kahe kazi?

Njyewe: Excuse me, ni iyanyu gute?

We (aseka): Njye ndi umukozi wa hano kandi wowe simpakuzi.

Njyewe: Uri umukozi wa hano gute? Kuva nahagera sindahakubona na rimwe,yewe sindumva banakuvuga!

We: Nsanzwe nkora hano, gusa mu minsi ishize bari baranyohereje ku bindi bitaro kuba nsimbuye umubyeyi wari mu kiruhuko cyo kubyara. So yaje nange mpita ngaruka, ubu sindaninjira mu ivuriro iriya moto muhuye ni umumotari wari unzanye (yibyiringira ijisho).

Njyewe: Nanjye maze ibyumweru bitatu hano, ndi umukozi mushya ushinzwe ubuzima no kubungabunga ibidukikije. Hagati aho nitwa Léon.

We: Ni byiza uwo mukozi twari tumukeneye. Nge nitwa Esther (amwenyura anagumya kubyiringira amaso), ndi umukozi w’ikigo cy’ubwisungane mu kwivuza.

Njyewe: Nishimiye kumenyana nawe. Nagufasha kukurebera akabazo ufite mu jisho?

We: Mwaba mumfashije kuko nirebaga mu ndorerwamo ngira ngo ngakuremo ariko byananiye. Birashoboka ko ari agasimba kagiyemo mva kuri moto.

Akimara kubinyemerera, nabikoze bwangu n’ubwuzu bwinshi, ngakuramo nifashishije akatsi gato nari nkuye mu busitani hafi aho.Mu kugakuramo turarebana, aransekera mbona ishinya ye y’umukara numva umusatsi umvuyeho.Nahise nibuka imvune nagize mu nkundo zabanje, nibuka ko kuba naraje gukora aho byabaye guhunga abakobwa, mpita mfata umwanzuro wo kudatindana nawe ngo atantwarira ubwenge kandi gahunda nk’izo narazivuyemo…”

Nyuma y’uko iyi nkuru yabo ibaye iya mbere, twarabegereye tugirana ikiganiro kirambuye, badusobanurira by’inshi ku rukundo rwabo ndetse bagira n’ubutumwa baha abakundana.

Amashusho y’ubuhamya bwabo

[email protected]
Twitter: @mazimpakajp


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza