Saint Valentin: Tsindira ibihembo bishimishije mu irushanwa ku nkuru z’urukundo

Yanditswe na Philbert Girinema
Kuya 5 Gashyantare 2016 saa 10:51
Yasuwe :
0 0

Nk’uko bimaze kumenyerwa, buri mwaka mu gihe hitegurwa umunsi wa St Valentin, IGIHE Ltd itegura irushanwa ku nkuru z’urukundo aho abifuza guhatanira ibihembo bituma umunsi w’abakundana ubabera umunsi udasanzwe, bakora mu nganzo bakandika inkuru y’urukundo rwabo igasangizwa abasomyi bacu.

Intego nyamukuru y’iri rushanwa ni ukwereka abakuru ndetse n’abato ko urukundo rutazimye, ko n’iyo mwahura n’ibikomeye bitabarika urukundo ruganza ikibi cyose. Iyo usomye inkuru nziza y’urukundo cyangwa se ukareba film, muri wowe urukundo rurazamuka, ukifuza kubona uwo mwakundana urusa nk’urwo.

Waba wifuza kugira uruhare mu guhamya ko urukundo nyakuri ntaho rwagiye? Urifuza gutsindira ibihembo bizabahesha wowe n’umukunzi wawe ibihe byiza mu rukundo rwanyu? Sangiza abasomyi ba IGIHE inkuru y’urukundo rwanyu, utubwire kuva ku munsi wa mbere uhura na wawundi utekereza iyo wumvise ijambo Urukundo, uko mwatangiye urugendo rwanyu, ibyo mwabayemo byose, ibibi ndetse n’ibyiza, na twatundi duto twose tugira inkuru yanyu umwihariko.

IGIHE Ltd izahemba inkuru eshatu za mbere zizaba zahize izindi. Mu gutoranya izo nkuru , itsinda rishinzwe gutanga amanota rizibanda ku buryo inkuru itondetse; isomo riri mu nkuru ndetse n’ uburyohe umwanditsi azaba yagerageje gushyira mu nkuru. Ibitekerezo by’abasomyi nabyo biri mu bizagenderwaho mu itangwa ry’amanota.

Irushanwa rizasozwa ku italiki ya 11 Gashyantare 2016 I saa sita z’amanywa, abatsinze bakazatangazwa mu gitondo cyo ku wa 12 Gashyantare 2016.

Uwifuza kwitabira irushanwa yemerewe kwandika inkuru ye mu rurimi rumworoheye hagati y’Ikinyarwanda, Icyongereza cyangwa igifaransa. Abazitabira irushanwa bemerewe gukoresha amazina yabo nyayo mu nkuru cyangwa ay’amahimbano, gusa ni ingenzi kwibuka kohereza amazina yawe bwite ndetse na nimero ya telefoni twakubonaho mu gihe watsinze.

Inkuru igomba kuba yanditse muri “format” ya “word”, itarengeje amagambo igihumbi (1000) ikoherezwa kuri [email protected]

Bimwe mu bihembo bizatangwa:

- Amatike abiri y’indege yo kujya muri kimwe mu bihugu by’i Burayi

- Amatike abiri y’indege yo kujya Dubai yatanzwe na RwandAir

- Amafunguro ya nimugoroba ndetse n’ijoro rimwe muri bimwe mu byumba byiza bya hotels nziza zo muri Kigali nka The Manor Hotel, Great Seasons Hotel, Hotel Villa Porto Fino, The Mirror Hotel na Galaxy Hotel

- Massage ndetse na abonnement ya piscine na Gym muri zimwe muri Hotel zavuzwe haruguru

- Ifunguro rya nimugoroba ridasanzwe riherekejwe n’icyo kunywa byateguwe na Trattoria Restaurent

- Gutemberera kuri Muhazi Beach Hotel ukaryoherwa n’ibyiza CALAKA Ltd yateguriye abakundana mu gikorwa “Ni Rurambe”

- Mixer, telefoni ndetse n’umugozi ubashisha ecran [ya televiziyo] yawe kubona internet “K Box”, ukaba wayikoresha nka mudasobwa, byose bya KONKA

-  La Ceremoniale nayo yateganyije impano ya tableau nziza cyane

- INKSTAIN nayo izakora igishushanyo (portrait) cy’ifoto y’abakundana bazaba bihitiyemo;

N’ibindi byinshi bitandukanye.

Ushaka gusoma inkuru zatsinze umwaka ushize,

Iyabaye iya mbere ni Nugururiwe n’inyange

Iya kabiri ni Burya nawe yarankundaga

Ku mwanya wa gatatu ikaba Urukundo Rwashinze imizi nirwogere


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza