Uburanga bw’Abanyarwandakazi buvugisha abanyamahanga imyato y’urwababyaye

Yanditswe na Claude
Kuya 11 Werurwe 2015 saa 06:40
Yasuwe : XX
0

Abanyamahanga benshi bari mu ngeri zitandukanye, haba mu byamamare byo mu mikino nk’umupira w’amaguru, Basketball, muri Sinema, umuziki n’ibindi, bakandagiye ku butaka bw’u Rwanda mu myaka ishize, bagiye bashima isuku, umutekano, amahirwe y’ishoramari biri imbere mu gihugu.

Ikindi kibagaragarira kurusha ibindi bakavuga ko bishimiye haba mbere yo gusubira iwabo cyangwa bagezeyo, ni ubwiza bw’Abanyarwandakazi.

Ibyamamare bivuga ku buranga bw’Abanyarwandakazi, mu gihe kandi abakora ubusesenguzi bw’uburanga ku bihugu bya Afurika bashyira u Rwanda mu bihugu bya mbere muri Afurika bigira abakobwa bafite b’uburanga.

Hari n’urutonde rwashyizwe ahagaragara n’ikinyamakuru MgAfrica muri Nzeri 2014, u Rwanda ruza ku mwanya wa gatatu mu kugira abakobwa buje uburanga ku Mugabane wa Afurika.

Ubu buranga buri muri byinshi mu bikurura Abanyamahanga bagasubira iwabo birahirau Rwanda nk’uko baba babonye ibindi byiza nyaburanga, imiterere y’ikirere, isuku, umutuzo n’ibindi.

Dore bimwe mu byamamare byatwawe n’ubwiza bw’Abanyarwandakazi

Shaggy

Ubwo uyu muhanzi akaba n’mururimbyi w’icyamamare ukomoka muri Jamaica yageraga mu Rwanda tariki ya 13 Ukuboza 2008, atumiwe n’isosiyete y’itumanaho ya MTN yizihizaga imyaka 10 yari imaze ikorera mu Rwanda, yatunguwe n’ibyo yabonye byinshi mu gihugu kiri ku mugabane witirirwa ko ukennye.

Uyu mugabo bakunda kwita “Mr Love Lover” yatangaje ko abakobwa b’Abanyarwandakazi bamunyuze imbere y’imbaga y’abari baje kumureba kuri Stade Amahoro.

Diamond

Uyu muhanzi Nassibu Abdul uzwi mu muziki nka Diamond ukomoka muri Tanzania ubwo yageraga mu Rwanda bwa mbere muri 2014 Ukuboza mu gitaramo “East African Party” ; nawe yavuze ko mu byamushimishije n’abakobwa bo mu Rwanda barimo.

Yagize ati “ U Rwanda ni rwiza, rurangwamo isuku ariko ikindi nabonye rufite abakobwa beza ku buryo nkeka ko kuri b’abahanzi baba bifuza amashusho y’indirimbo zirimo abakobwa beza bitasaba kujonjora, nkeka ko bifunga nk’amaso bagafata uwo ari we wese”.

Ramsey Noah

Uyu musore akomoka muri Nigeria ndetse akaba azwi cyane muri sinema, nawe,yaje kugera mu Rwanda ku butumire bwa Minisiteri y’Umuco na Siporo ikiyobowe na Habineza Joseph bitewe n’ubuhangange bwe.

Ramsey benshi bakunze kwita Raji kubera filime yakinnye igakundwa cyane, nawe yaje gutangarira ubwiza bw’Abanyarwandakazi yagiye abona mu bice bitanduye yagenze bya Kigali.

Abanyarwanda na bo bazi umwihariko wabo

Uretse kuba abanyamahanga barimo n’ibyamamare banyurwa n’ubwiza bw’Abanyarwandakazi usanga n’abasore b’Abanyarwanda ubwabo bemeza ko kimwe mu mpano u Rwanda rufite n’Abanyarwandakazi barimo.

Umusore witwa Bikorimana Karimu ufite imyaka 31 ucuruza ibyuma by’modoka mu Mujyi wa Kigali yemeza ko Abanyarwandakazi ari beza cyane ugereranije n’ibindi bihugu bitari bike bya Afurika.

Yagize ati “Nanjye icyo nemera ni uko dufite abakobwa beza cyane ku buryo nemeza ko nta n’umugabo w’i Kigali ugishaka umugore agendeye ku bwiza kuko yabura uwo afata n’uwo areka…”

Umunyarwandandakazi Umutesi Mary ufite imyaka 28 uba i Paris mu Bufarasa, ubwo yaganira n’umunyamakuru wa IGIHE na we yamwemereye ko umuco n’ubwiza bw’Abanyarwandakazi ari kimwe mushimwa na benshi aho batuye.

Yagize ati “Twishimira kuba turi Abanyarwanda bavuga ko abakobwa bo mu Rwanda ari beza cyane, ko u Rwanda ari igihugu kirangwa n’isuku n’umutekano.”

Yakomeje avuga ko kenshi usanga n’ibyangombwa bigaragaza ko ari iby’u Rwanda bihabwa agaciro cyane bitandukanye n’ibyo mu bihugu bihana imbibi.

Ikindi abenshi bahurizaho ni uko umubare munini w’urubyiruko rutuye mu Mujyi wa Kigali batemeranya n’uko abakobwa bahatanira kuba ba Nyampinga b’u Rwanda Atari bo baba ari beza kurusha abandi, ko hari abakobwa benshi beza cyane ariko badakunda kwigaragaza ku buryo nta wapfa kwemeza ko ubaye nyampinga aba ari we mukobwa wa mbere mwiza mu Rwanda.

Masengesho Eric utuye mu Murenge wa Kimisagara yagize ati “ Erega mu Rwanda hari abana benshi beza cyane kandi cyane birenze urugero ariko baba badashaka kwiyerekana bitewe n’impamvu zabo bwite, abanga kwiteza ababyeyi, hari n’ababa batabibonera umwanya.”

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE