Ujya wibuka gushima uwo mwashakanye iyo mumaze gutera akabariro?

Yanditswe na Umutoni Rosine
Kuya 17 Ukuboza 2016 saa 03:17
Yasuwe :
0 0

Gushima ni indangagaciro ikomeye mu buzima bw’umuntu ariko kubikorera uwo mwashakanye nyuma yo gutera akabariro ni inkingi ya mwamba mu mubano w’aba bombi, bikaba n’inzira nziza yo kubarinda umunabi no gucana inyuma.

Nyuma yo guhuza urugwiro hagati y’abashakanye, umugabo ashobora kugwa agacuho kubera igikorwa gisaba imbaraga aba amaze gukora, umugore nawe akaba yatwarwa n’ibitotsi mu gihe yageze ku byishimo bya nyuma. Uku kugwa agacuho ndetse no gusa n’aho umuntu asinziriye, ntibimubuza kumva ibivuzwe byose.

Muri uyu mwanya rero ni byiza ko ubwira uwo mwashakanye ko umushimira igikorwa cyiza mumaze gukora.

Twifashishije urubuga nkoranyambaga rwa Whatsapp twabajije bamwe mu bashakanye niba bajya bibuka gushima bagenzi babo iyo barangije gukora iki gikorwa, bamwe bagize bati twibuka gushima abandi bakavuga ko nta mpamvu yo gushima kuko ibyo muba mukoze biri mu nshingano zanyu.

‘Ubwo se wamushimira umubwira ngo iki ?’

Umugabo umwe mu batanze igitekerezo, yavuze yishimana n’umugore we iyo bari guhuza urugwiro ariko kandi ngo kumushimira yumva atari ngombwa.

Ati "Ubwo se namushimira mvuga ngo iki? Mbona atari ngombwa rwose."

Hari n’umugore wagize ati "Numva biteye isoni kubwira umugabo ngo murakoze tumaze guhuza urugwiro, ibyo tuba twakoze biba ari inshingano zacu twembi."

‘Kudashima ni ubugwari, gushimwa bitera akanyamuneza’

"Mu muco wa Kinyarwanda iyo umuntu akugiriye neza uramushima yaguha inka ugakura ubwatsi, bitwaye iki kubwira umugore wawe uti urakoze nyuma yo guhuza urugwiro, abadashima nabita ibigwari kubera ko gushima bitera akanyamuneza ndetse bigatuma n’ubutaha cya gikorwa ugikora ugishyizeho umutima."

Iki ni igitekerezo cy’umwe mu bagabo, ushimangira ko ntawe ukwiye guterwa ipfunwe no gushima uwo bashakanye.

Hari n’umugore wagize ati "Mu myaka 10 maranye n’umugabo wanjye, sinabura kumushima uko duhuje urugwiro numva ari ishema kuba mufite, kandi kuba andyohereza nta cyiza nkacyo kubera izo mpamvu rero ntacyambuza kumushima."

Urubuga rwa ‘Meltystyle’ ruvuga ko uretse gushimana hagati y’abashakanye, nyuma y’iki gikorwa baba bakwiye kuganira buhoro batuje.

Ushobora nko kubaza mugenzi wawe niba akeneye umutobe cyangwa amazi yo kunywa. Umugore ashobora guhanagura umugabo ibyuya yabize, ushobora kumwiyegeza akakuryamaho n’utundi tuntu duto tugaragaza ko umwishimiye.

Abenshi mu bashakanye usanga bahangayikishwa n’ibitagenda, aho kwishimira ibyo bafite. Hari abibuka kugaya iyo igikorwa cyo gutera akabariro kitagenze neza, ariko gushima cyagenze neza ntibabihe agaciro.

Uru rubuga ruvuga ko gushima nyuma y’iki gikorwa bishobora no kuba imwe mu nzira yo gucyemura ibindi bibazo abashakanye bari bafitanye, ariko kandi ni inkingi ya mwamba mu mibanire y’abo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza