IGIHE.com > Abantu > Kubaho > Urukundo
Nabyifatamo nte mugihe umukunzi wanjye ambenze?

Nabyifatamo nte mugihe umukunzi wanjye ambenze?


Yanditswe kuya 3-05-2012 - Saa 12:33'

Kubengwa bishobora gutuma uhungabana kurusha ikindi kintu cyose cyaba cyarakubayeho kuko ahanini hari abavuga ko iyo ubenzwe uba wumva ko hari igice cy’umubiri wawe gipfuye, hakaba n’abandi bavuga ko urukundo rukomeye nk’urupfu.

Igitabo twifashishije cyitwa ’Ibibazo Urubyiruko Rwibaza n’Ibisubizo Byabyo’ kivuga ko ubusanzwe iyo urambagizanya n’umukobwa cyangwa umuhungu w’inshuti yawe muri ibyo bihe urukundo rwanyu muba mwumva rugenda rwiyongera, ugasanga mwirirwa mwohererezanya ubutumwa bugufi burimo amagambo y’urukundo, rimwe na rimwe mugahana impano kugira ngo mwerekane ko mwitanyeho, mugakora ibishoboka byose mugategerana amatwi mukumvikana mu byo muvuga ubwanyu ku buryo ahanini usanga umukobwa cyane cyane uba yumva ko afite umukunda nyakuri. Gusa nta byera ngo de kuko hari igihe kibaho ukabengwa, ibyo wabonaga nk’ibyiza bikaba byanaguteza agahinda wumva ko katazigera gashira.

“ Twari tumaze imyaka itanu dufitanye ubucuti, kandi yari amaze amezi atandatu andambagiza. Igihe yahagarikaga ubucuti twari dufitanye, ntiyigeze anabimbwira. Yagize atya areka kumvugisha gusa! Numvise nihebye, nshengurwa n’agahinda! Nakomezaga kwibaza nti ’ubu se ikibi namukoreye ni ikihe?’" ibi ni ibyatangajwe na Rachel wanzwe n’uwahoze ari umukunzi we ku buryo ibyishimo yagiraga hambere byayoyotse.

Kwanga kubyemera

Abenshi banga kubyemera bavuga ko ejo cyangwa ejo bundi azisubiraho, Hakabaho abarakara bavuga ko bidashoboka ko bakorerwa ibintu nk’ibi, abiheba bavuga ko badafite igikundiro nta wundi uzigera abakunda n’abandi babivuga ukundi.

Aba bose n’ubwo bibababaje, bagomba kwakira ibyababayeho kuko bigera aho bigashira n’ubwo ibyakubayeho bizaterwa n’izindi mpamvu bitewe n’igihe urukundo rwanyu rwari rumaze n’aho rwatangiriye.

Uko wakwakira n’icyo wakora ku byakubayeho n’uko wamara inzika mu mutima

Hari abantu bajya bavuga ko nyuma y’igihe n’ibintu bibabaje bigera aho bikibagirana. Igihe uwo mwakundanaga yakubengaga, ushobora kuba warumvaga ayo magambo ntacyo avuze. Impamvu ni uko igihe ubwacyo kidahagije kugira ngo ibibazo bikemuke.

Iyo ugikomereka urababara, ariko nyuma y’igihe igikomere kirakira. Uba ugomba kugira icyo ukora kugira ngo amaraso adakomeza kuva kandi ububabare bugabanuke kandi ukirinda ko icyo gikomere kijyamo umwanda. Uko ni nako bigenda ku gikomere cyo mu mutima.

Gerageza ibi bikurikira:

Fata igihe cyo kurira: ntihakagire ikikubuza kurira kuko na Bibiliya ubwayo ivuga ngo hariho igihe cyo kurira n’igihe cyo kuboroga (Umubwiriza 3:1,4). Kurira si ubugwari kuko igihe Dawidi yari umurwanyi w’intwari yagiraga agahinda kenshi, yaravuze ati: “ijoro ryose ntosa uburiri bwanjye, uburiri bwanjye mbwuzuza amarira.” (Zaburi 6:6)

- Komeza kwita ku buzima bwawe: gukora siporo no kurya neza bizagufasha gusubirana imbaraga watakaje bitewe n’uko yakubenze. Bibiliya ivuga ko “imyitozo y’umubiri igira umumaro.” (1 Timoteyo 4:8)

- Jya usenga Imana uyibwira uko umerewe: Bishobora kutakorohera kuko hari bamwe babengwa bagasigara bumva ko Imana ibifitemo uruhare. Baribwira bati “Nasenze inshuro nyinshi nsaba Imana ngo impe uwo tuzabana, none dore uko bigenze!” (Zaburi 10:1)

Ese byaba bikwiriye kumva ko Imana ariyo ihitiramo abantu abo bazashyingiranwa? Ntibikwiye rwose kuko n’iyo umwe abenze undi Imana nta ruhare na ruto iba yabigizemo kuko birazwi neza ko Imana yita ku bantu bayo (1 Petero 5:7).

Ubwo rero ujye umubwira ibikuri ku mutima kuko Bibiliya ivuga iti " Mujye mureka ibyo musaba bimenywe n’Imana kandi amahoro y’Imana asumba cyane ibitekerezo byose, azarinda imitima yanyu n’ubushobozi bwanyu bwo kwiyumvisha ibintu binyuze kuri Kristo Yesu."

Ikindi ni uko ugomba gutangira gutekereza ku buzima bwawe bw’ejo hazaza, igihe kizagera ubone ko ibintu byasubiye ku murongo.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO