Bigirimana warokotse Jenoside akaza gutemwa ijosi no gutwikwa, akataje mu kwiteza imbere

Yanditswe na Jean Luc K. Mugisha
Kuya 12 Mata 2017 saa 12:59
Yasuwe :
0 0

Imyaka 23 irashize Jenoside yakorewe abatutsi ibaye, abayirokotse bakaba bakomeje urugamba rwo kwiteza imbere.

Muri aba harimo umugabo witwa François Bigirimana utuye i Kigali, warokotse Jenoside n’igico cy’abicanyi bamukase ijosi bakanamutwika mu 2008.

Mu buhamya yahaye RBA, yavuze ko mu 2008 yaguye mu gico cy’abantu batanu bashakaga kumwica akaba akeka ko ari abo yari yaratanzeho amakuru ku ruhare rwabo muri Jenoside yakorewe Abatutsi, ubwo inkiko gacaca zatangiraga gukora.

Avuga ko rimwe yatunguwe no kugwa mu gico ari mu nzira agenda, abantu bakamufata bamuzirikira amaboko inyuma, ijosi bararikeba, bamusukaho ‘essence’ maze bamujugunya muri ruhurura baramutwika, ariko akaza gutabarwa n’umuntu waciye aho ubwo yarimo ashya.

Nubwo ibi byose byamubayeho ndetse agasigara ari nyakamwe kubera ko abo mu muryango we bishwe, Bigirimana ntiyaheranwe n’agahinda bituma atangira urugamba rwo kwiteza imbere, none amaze kugera ku ruganda ruciriritse rukora ibisuguti.

Uyu rwiyemezamirimo amaze guha akazi abakozi batanu kandi ashimishwa n’uko ibikorwa bye bifite isoko rihagije hano mu Rwanda.

Kuri we, kureka kwiteza imbere ni ukunganira abagome bamuhize kugera ku ntego yabo.

Umupasiteri wo mu Itorero ry’Abadivantisite b’Umunsi wa Karindwi, Ndagijimana Samuel utuye mu nsi y’Umurenge wa Kacyiru, mu mujyi wa Kigali ni we wakiriye Bigirimana aramufasha kimwe n’izindi mpfubyi yareraga aho kugeza ubu amaze gushyingira abagera kuri batanu.

Bigirimana amaze gufashwa n’ubuyobozi kubona igishoro cy’ibihumbi 300 by’amafaranga y’u Rwanda ni bwo yatangije ibikorwa by’uruganda rukora ibisuguti.

Avuga ko abashije kugira ubushobozi yagera ahantu heza cyane hashimishije.

Nshimiyimana Emmanuel, umusore wo muri urwo rugo wize mu Buhinde, uba hafi ya Bigirimana mu bikorwa bye bya buri munsi avuga ko ubumenyi yakuyeyo yifuza kubufatanya na we mu kwagura ibikorwa, kuko bimuvana mu bwigunge agahugira mu byamuteza imbere.

Uyu musore atangaza ko iyo Bizimana yibutse ibyamubayeho, amushyira ku ruhande akamuhumuriza. Agerageza kumwereka ko ejo hazaza ari heza bigatuma adakomeza guheranwa n’agahinda.

Bizimana ni umwe mu barokotse Jenoside bakomeje urugamba rwo kurwanya ubukene n’ubwigunge kuko abayikoze bigambaga ko n’abazasigara bazicwa n’agahinda, ibi akaba ari byo bimutera imbaraga zo gukora kurushaho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza